شهر مبارك.. شهر الخير.. شهر وفيه بنساعد الغير.. شهر عبادة.. صوم وصلاة.. شعر وعلى طول نستناه.. شهر بننسى معاه النوم.. قول للنايم.. إصحى وقوم.. إصحى ده شهر الخير ع الباب.. افتح للنور يا بواب.. افتح للجنة وللغفران.. افتح أبوابك.. جه رمضان.. افتح أبوابك للرحمة.. وانزل صلى صلاة التراويح.. واذكر ربك وسط العتمة.. وادخل نام والديك بيصيح.. شهر هدية من الرحمن.. اوعاك تفضل فيه خسران.. إغسل قلبك م الأخطاء.. وابعد عن زيف الأضواء.. اكسب كل دقيقة وثانية.. وبلاش تغلط.. وتقول لسه الأيام جاية.. شهر البركات.. تطهير للذات.. تدريب النفس على الطاعة.. يا شباب نعسان.. اصحى يا كسلان.. سيبك من النوم بقى والراحة.. ادعى لربك.. يفغرلك ذنبك ليلة القدر.. وتلاقى قلبك.. م الفرحة ينور زى البدر.. يا شباب مسلم.. بناديك تتعلم وتعلم.. إزاى تتعبد وتسلم.. للرحمن قلبك وكيانك.. وتزيد الحسنات فى ميزانك.. تخرج من رمضان مولود.. قلبك صافى.. بإيمان مسنود.. يا شباب بناديلكم من قلبى.. بناديلكم تمشوا معايا دربى.. درب النور والخير والحسنات.. درب المغفرة وسمو الذات.. درب المولى وصفهولنا كتير.. ونسينا نمشيه.. وحودنا كتير.. يا شبابنا.. طريقنا أهو مفتوح.. يا شبابنا.. طريقنا يرد الروح.. يا شبابنا.. تعالوا معايا نمشيه.. يا شبابنا.. ادعوا.. يا كريم اكرمنا.. وقوينا بيه. رنا محمد الحداد كوم حمادة - البحيرة - رابعة صيدلة [email protected]