هنموت م الجوع.. وبنبكى دموع.. ومفيش مسؤول يسمع صوتنا.. وبياكلوا كباب.. وعيشا هباب.. والفقر خلاص هيموتنا.. طب نشكى لمين.. واحنا المساكين.. وبلاش الأمن يسكتنا.. نفسنا فى حياة .. مفيهاش الآه.. ونعوض فيها زمان فاتنا.. طب قولى يجيلوا النوم ازاى.. اللى بيظلم ويدوس ع الناس.. فاكر نفسه هيعيش ع طول.. وبيكنز لولى فضه وماس.. عايزين مسؤول.. بيذوق الفول.. ويجرب يوم جوه حارتنا.. طب هاتلى وزير.. لو عنده ضمير.. أو نائب صح فى دايرتنا لو زى الناس... فيهم إحساس.. كانوا راعوا الله فى معاملتنا عايشين فى نعيم.. واحنا بملاليم.. هنعيش ونكمل رحلتنا.. هنعيش ونكمل رحلتنا. محمد الشقيرى ■ محدش عايشها بالساهل.. ديه دنيا والله ما تستاهل.. بنطلع منها بخسارة.. بنعشق واما نفهمها، بتقلب وشها التانى.. ونبدأ نشقى ونعانى.. صحيح الدنيا غدارة.. قلوب تايهة وبتفكر.. وبتقول هو ده مقدر.. نعيش فى الدنيا مش اكتر.. يدوب نفضل كده حيارى.. غرامنا كله على الفاضى.. حياتنا ماشيه كده عادى.. وبرجع برضه اقول راضى.. محدش عايشها بالساهل.. يا قلبى كله فى الآخر مسافر ماشى من الدنيا.. ليه تتعب هون الدنيا.. لتتعب انت فى الآخر.. وحاول تنسى أحزانك.. جراحك انت تداويها.. حياتك خطوة عديها. وتخلكش ف مكانك. أحمد عبد العزيز ■ تعبت منك يامصر ومن بلاويكى.. با احبك ايوه با احبك.. وباكره حبنا ليكى.. شايف بعينى ياعينى اللى عراكى.. لاقادر اسكت ولا قادر أغطيكى.. شارية اللى بايعك وبتبيعى اللى شاريينك.. حبه اللى كارهك وبتحبى اللى كارهيينك.. طارده اللى دمه بيجرى فى شرايينك.. ومستعد يضحى لاجل يحميكى! محمد أبو عصفور ■ شربنا المر لكيعانا احنا ولاد مصر المطحونة.. ساكتين الله يعينا كل حاجة حمرة ومجنونة.. راح مستقبل ولادنا تايهين فى دنيا حلزونة.. البلد بلد أبونا والغرب بيطرودنا.. اخويا وابن عمى وابن خالى غرقوا فى علبة تونة.. ناس بتأكل طوب ومونة.. وناس بتبلبع حبوب ليونة.. غطينا وصوتى واعصرى علينا يا مصر لمونة! ياسر عبد الله عميش كفر الزيات غربية [email protected] ■ الحزب الوطنى وحكامنا.. غلوا طعامنا.. خلونا نلحس طبق الفول.. لا عدنا لاقيين ملوخية.. ولاطعمية.. ولاحتى سردينة مقلية.. ولا ام الخلول.. وهما يأكلوا حاجات مشوية.. لا أعرف أنا لا أنت.. إيه هيه.. والكرش يطول.. يارب لو يأكلوا اللحمة.. يحسوا بزحمة.. ويفرفروا ويأخذوا محلول. محامى فوزى رمضان محمد حبوه كفر الدوار بحيرة ■ يارب إنت العالم.. يارب إنت الرزاق.. عمرك ما بتنسى حد علشان أنت الخلاق.. وعمرك ما فى يوم تفرق.. بين وزير كان أو حلاق.. والكل بياخذ رزقه.. زمالك أو كان بولاق.. والدنيا طايره بينا وكأننا فى سباق.. شباب كثير بتهاجر.. ولأهلها بتشتاق.. صاحب شهادة عالية.. راح يشتغل سواق.. غلبان ونفسه فى أوضة.. فى حارة أو كان زقاق.. ودمعة أم بتنزل.. ما بين لقا وفراق.. فوضت أمرى ليك.. علشان أنت الخلاق . أ محمد إمام [email protected] ■ حدوتة حدوتة.. تجمعهم حواديت.. فينا حواديت وحواديت.. مرة ملتوتة ومرات مرة.. تقسم الضهر نصين.. وياجبل مايهدك ريح.. وأدينا ماشيينه طريق.. علينا حمول.. عنينا بتقول.. لصفر مش هنعود.. وحياتنا هنعيشها يوم بيوم.. ولادامت علينا هموم.. بكره السما تصفا.. وتتزاح غيوم ونشوفها نجوم.. وياجبل مايهدك ريح.. وأدينا ماشيينه طريق.. الكتف فى الكتف صديق.. أحباب الإيد فى الإيد.. أصحاب أملنا وليد.. وامبارح وبكرة شريان ووريد.. وياجبل مايهدك ريح.. وآدينا ماشيينه طريق.. نحكى حواديتنا أغانى.. بكرة يسمعنا اللى جى ورانا.. وبكرة هييجى يلقانا.. حمول بتزيد.. وأمل جديد.. وماشيينه طريق.. وياجبل مايهدك ريح. حامد أحمد محمد سليمان ■ أنا واقف فى طابور.. والعيش أوام خلص.. أصل الأرض بور.. والطحان ملص.. القطن مازرعهوش.. وزرعوا بداله فراوله.. كسبوا كتير الهاموش.. وخدوها مقاولة.. والقصب فين ياحلاوة.. دا ساب الصعيد واصل.. بيستورده من جاوة.. واهو هو دا اللى حاصل.. والفول جابوه م الصين.. بكره يجيبوه مدمس جاهز.. وخاصة من بكين.. وده فى الفرص ناهز. م منصور عبد العال عبد الله الإسكندرية ■ ف العصر المليان ألغاز.. عصر الذرة وعصر الدش.. والمفروض عصر الحرية.. حاسس إن أنا مقهور.. مغلوب وباموت! عمال بتكلم ع الفاضى.. ومش سامع صوت! طب ما أنا فرد ف وسط العالم.. أيوه أنا فرد.. لكن حاسس إن أنا قرد.. ف وسط الغابة.. اللى حاكمها كلاب وديابة.. تعمل إيه لو كنت مكانى؟.. رد يا صاحبى وقول ماتخافش.. يمكن ردك ده يريحنى.. لو كان حتى يادوب ما أعرفش.!! طلعت سالم
