عديت على كمين فى ساعة متأخرة.. الرخصة كانت سليمة بس الضحكة مزورة.. شاورلى الظابط أفوت.. الشارع هس هس بس ريحة حاجات بتموت.. ومين صاحى الساعة دى يقوللى إيه اللى جرا.. ولما طفيت النور العالى ما عرفش ليه جت ف بالى حاجات كتير واحشانى لا هى موجودة ع الكرسى اللى جنبى ولا فى الكنبة اللى ورا.. لفيت ورجعت تانى.. معقول نسيتها ع القهوة ودى ضاعت منى إزاى ووقعت فين يا ترى.. عارف.. أنا بحب البرد جدًا وبكره الهدوم التقيلة.. وكل ما أقول خلاص ترمينى الدنيا تانى ف حضن حاجات جميلة.. أخرج بره الدواير.. وارجع أحب الأجازة لما تبقى فى يناير.. والشبابيك الكبيرة اللى من غير ستاير.. عارف.. صعب أوى تبص حواليك تلاقى إن كل أصحابك فنجان قهوة ع الريحة.. وشوية ورق.. وعلبة سجاير..