رفعوا العلاوة وصبحت عشرة فى المية علشان بقى عندهم رحمة وحنية قال يعنى بيبقششوا ع الشعب من جيبهم دا كل مال البلد مع نصف فى المية *** رفعوا العلاوة وعدّوا فيها كام مليار أتاريها مكسب لحوت واحد فى نصف نهار وشوف بقى الحيتان فى الحكم كام واحد وكام وزير تحسبه واحد من التجار *** رفعوا العلاوة بكلام فيه فبركة وألغاز وخفضوا لإسرائيل المليارات فى الغاز وعايروا كل البلد بعلاوة مضروبة وكأنهم للغلابة بيعملوا إنجاز *** رفعوا العلاوة وبكرة يرفعوا الأسعار ودا طبيعى فى حكومة كلها تجار تديك قروشها بإيد وتاخدها بالتانية إيد فيها رحمة وإيد فيها لسعة نار *** رفعوا العلاوة ورفعوا ضغطنا معاها مدام المرتب هزيل والشلة وكلاها لا نافعة خمسة ولا عشرة ولا خمسين ولا مية فى المية حتى الناس هاترضاها سيد أحمد الهمشرى