(كرسى المُعاق) فتحت عينى على الدنيا.. لقيتها بتنادى عليّه.. بشوفها بتمنى وبسرح.. أخرج وألعب واتفسح.. فيه عيال كتير عماله تلعب.. تجرى وتمشى ولا بتتعب.. وكل واحل واخد دور.. والدور مجاش لسه عليّه.. فضلت أنا مستنية.. إمتى أقوم وأجرى شويه.. نفسى أبدل حالى بحال.. ويقولوا مالها كده شقية.. الناس بتبقى ساعات جنبى.. وساعات ما تبقى حواليّه.. أفضل لوحدى ساعة واتنين.. واستنى يوم واستنى يومين.. وادعى وأنا متمنية.. يجيلى حد العب وياه.. وابقى معاه متسليه.. هيّه الحقيقة أنى ما حقدر.. حفضل مكانى مش أكتر.. لا عمرى حقدر أجرى ف يوم.. ولا حتى حلم وأقوم م النوم.. أنا نفسى مره أطول الأرض.. وأجرى عليها بطول وبعرض.. لو كنت تسمع منى كلام.. وبلاش تسيبنى أعيش أوهام.. وتفك سجنى كده شوية.. وتحن مرة بقى عليّه.. أرجوك أنا مترجيّة.. تفك أسرت رجليّه.. ممكن يا كرسى. أمانى سعيد محفوظ [email protected] كراسى يا كراسى كراسى يا كراسى.. فكرينى إن كنت ناسى.. إن صديق ليه حبيب.. مش نسيبى ولا قريب.. والصلاح والتقوى فيه.. والمحبة فى قلبه ساكنة.. وللفقير دايمًا يواسى.. يا كراسى.. يا كراسى فكرينى إن كنت ناسى.. مرة جه بعد الفطور.. مالى وشه السرور.. قاللى بكرة راح أصول.. لما أدخل فى السياسة.. أصلها فن وكياسة.. وأبقى فى مجلس سرور.. ساعتها أصول وسط الكراسى.. فكرونى إن كنت ناسى.. يا كراسى.. قول أخونا وصل بسرعة.. وفى البداية عملها ولعة.. وبعد فترة.. قول تنين.. معادشى ينطق كلمتين.. وانشغل فى لون الستاير.. للعروسة أم الضفاير.. اللى وارثة بعد جوزها.. شركتين غير العماير.. وأم ابنه ياعينى سابها.. تشتكى الوحدة تقاسى.. فكرونى إن كنت ناسى.. عن مصايب الكراسى.. أحمدك يا رب انى بأكتب الموال وأغنى.. وأرسل الحب لخللى.. وللجميع أحلى التماسى.. فكرونى إن كنت ناسى!! رفعت محفوظ الإسكندرية كرسى الشيخ جلال عم مرسى جارنا ساكن.. جنب بيتنا من زمان.. أسطى باشا فى الموبيليا.. يحكوا عنه كان وكان.. إيده تتلف فى حرير.. الزباين عنده ياما كتير كتير.. الغلابة والمدير.. جه فى مرة الشيخ جلال.. قاله عايز كرسى بس يكون تيفال.. يبقى منى هدية لجناب الوزير.. اللى خللى الكرسى يتحول سرير.. بطنه بقماش حرير.. ونام وريح.. حس إنه مستريح.. رد عم مرسى قال.. تسلم الفكرة يا شيخنا.. عمر ما شوفنا فى تاريخنا.. حد م الكرسى استقال.. إلا ويا كرسى عم الشيخ جلال. أيمن يحيى- مدرس لغة إنجليزية
