للتحدث مع احد موظفينا ، اطلب الرقم صفر أنا : مساء الخير يا فندم، آسفة جدا عالازعاج بس النت سئ جدا عندى بقاله أكتر من شهر الموظف : أهلا وسهلا يا فندم نتشرف بحضرتك ............ فعلا , واضح عندى ان فيه مشكلة عند حضرتك بنعتذر جدا ، حنراقب الموقف ولو ما اتصلحتش من عندنا ، حنبعت لحضرتك مندوب لحد البيت ، شكرا لاتصالك بخدمة العملاء انا : ميرسى جدا لحضرتك كلك ذوق · بعد حوالى اسبوع جرس البيت يدق صباح الخير يا فندم احنا مندوبين من شركة .... جايين نشوف العطل منين ممكن نشوف سلك التليفون طالع منين؟ أنا : أهلا وسهلا اتفضلوا. ...................... · بعد ساعات من خروجهم للتحدث مع احد موظفينا اطلب الرقم صفر أنا : ألو ، مساء الخير يا فندم، أحب اشكركم لاهتمامكم بالشكوى المقدمة منى بس للأسف المندوبين جم قطعوا عنى خدمة النت تماما ومعاها كمان خدمة التليفون الارضى. الموظف: اهلا وسهلا يا فندم نتشرف بحضرتك؟ ............... احنا بنعتذر لحضرتك جدا يا فندم ، واكيد حضرتك مستاءة من اللى حصل ، واى حد مكان حضرتك اكيد كان حيبقى مستاء جدا ، حنصعد الشكوى حالا ونرد عليكى خلال 24 ساعة. انا : العفو ، مش مستاءة ولا حاجة، شكرا لذوقك · بعد مرور 48 ساعة: للتحدث مع احد موظفينا اطلب الرقم صفر انا : مساء الخير الموظف : اهلا وسهلا يا فندم نتشرف بحضرتك؟ انا : لو سمحتم ، المندوبين عندكمقطعوا الخط الارضى والنت وانا اتصلت وماحدش جه والخط الأرضى ما زال عطلان الموظف : احنا بنقدر استياء حضرتك يا فندم واى حد مكان حضرتك اكيد حيبقى مستاء جدا ، انا حاصعد الشكوى بتاعة حضرتك وبكرة ان شاء الله ارد عليكى · بعد مرور يومين: للتحدث مع احد موظفينا اطلب رقم صفر انا : ممكن حد يتنيل ويجى من عندكم عشان يرجعلى الخط الارضى؟ الموظف مساء الخير يا فندم ، فيه شكوى من النت؟ انا : اهو مساء والسلام ،نت ايه يابنى !! انا نسيت الرفاهية دى ، انا باطالب بأبسط حقوقى , عايزاكم تصلحوا الخط الارضى زى ما بوظتوه ، وابقى عيلة لو اشتكيت لكم من حاجة تانى الموظف : طب ممكن اتشرف بالاسم انا : وانا مش عايزة حد يتشرف بيا ، رقمى ظاهر عندك وانت عارف الشكوى كويس. الموظف : احنا مقدرين استياء حضرتك يا مدام واى حد مكان حضرتك اكيد كان حيبقى مستاء زيك تماما وتأكدى ان احنا حنصعد الشكوى بتاعة حضرتك ونرد عليكى خلال ساعات مش اكتر · بعد يوم: للتحدث مع احد موظفينا اطلب رقم صفر انا : يا باردين يا شركة جربانة ، تصدقوا انا استاهل ضرب البلغة انى اشتكيت ، شيطان مين ابن ستين ..... اللى وزنى عشان اكلمكوا ، خلاص مش عايزة النت ، تعالوا رجعوا الحرارة اللى قطعتوها ، كانت ساعة ما يعلم بيها الا ربنا ساعة ما كلمتكوا الموظف : طب اتشرف بالاسم انا : والله العظيم ما انا قايلة الموظف : طب شكوى حضرتك بخصوص ايه؟ انا : انت عارف كويس بخصوص ايه والحرارة لو ما رجعتش حاجى اعملكم فضيحة فى الشركة واخلى اللى ما يشترى يتفرج عليكم ، جتكم الارف الموظف : احنا مقدرين استياء حضرتك يا فندم، واكيد اى حد مكانك.... انا مقاطعة : حيبقى مستاء ، وفر استياءك لنفسك، عشان انا حاجى و اوريكم الاستياء على حق ......... وطبعا ماحدش عبرنى و لأنى شخصية قوية وجبارة نزلت على مفيش وبعد حوالى شهر نسيت الموضوع نهائيا و تأقلمت على الموبايل مكالمات ونت. المهم نزلت منذ حوالى اسبوع لأشترى مراتب من شركة معروفة ، وبعد ان اخترت ثلاث مراتب ، جلست مع المحاسب المحاسب : فيه مرتبتين موجودين حاليا لكن التالتة لسة مش فى خط الانتاج ، حتدخل الخط الاسبوع الجاى وممكن تستلميها يوم 30-7 انا : طب والاتنين التانيين؟ المحاسب : لا دول موجودين وممكن نبعتهملك على يوم الخميس انا : طب اوكى الموظف : توصيل المرتبة الواحدة ستين جنيه انا : طب ما الاتنين حييجوا فى يوم واحد فى نفس العربية الموظف : هو دا النظام يا فندم واحدة زى عشرة ، يعنى لو حضرتك طالبة 10 حتدفعى 600 جنيه (اه والله العظيم) انا : اوك ، مفيش مشكلة الموظف : عنوان حضرتك لو سمحتى انا : المعادى ، شارع ..... ، رقم ..... ، الدور الخامس الموظف : معلش ، احنا بنوصل لحد الدور الرابع بس انا : يعنى ايه ، حيرمولى المراتب فى الدور الرابع ويمشوا ؟ الموظف : هو دا النظام انا : امرى لله ابقى اخلى عم حسن يطلعهم ، بس ابوس ايديكم خلصونى ، انا اتأخرت جدا عندكم الموظف : احنا بنسستم البيانات يا فندم انا : طب امضيلكم على اللى عايزينه وابقى سستم براحتك الموظف: ما ينفعش ..................... اخيرا انتهيت من التوقيعات المطلوبة منى وخرجت، ادرت السيارة وقطعت امتارا معدودة ، وفجأة تذكرت شيئا هاما ، حمدت الله انى تذكرته فى الوقت المناسب ، اخرجت هاتفى المحمول. الو : شركة ..... ؟ ممكن توصلنى بالاستاذ علاء علاء : ايوة يا فندم انا : انا المدام اللى كنت عندك من دقيقتين وافتكرت ان 30-7 غالبا حاكون مسافرة ، ممكن تأجلها يومين لو سمحت علاء : ما ينفعش يا فندم ، خلاص البيانات نزلت عالكمبيوتر بمعرفة حضرتك انا : بسيطة الف وارجعلكم ، انا تحت الشركة لسه ما اتحركتش كتير. علاء : حتى لو طلعتى يا فندم برضه ما ينفعش انا : انت بتهزر ولا بتتكلم جد؟ علاء : طبعا باتكلم جد ، دا سيستم شركة انا : بالذمة دا كلام ناس عاقلة؟ علاء : لو سمحتى ما تغلطيش ، احنا ادينالك فرصتك كاملة ، ما افتكرتيش ليه ان وراكى سفر؟ انا : انت فاكرنى تلميذة عندك فى الكيلاس يا مستر علاء ؟ وبعدين انتو عطلتونى ساعة فى الحسابات وانا استحملتكم علاء : هو انتى اما فرغنالك المندوب بتاعنا يفرجك عالبضاعة مش برضه ضيعتى وقته؟ انا : تصدق انى حاطلعلك بجد ، عيب اللى بتقوله ده ، هو انا اخدت المندوب منكم وعزمته على كوزين درة عالكورنيش !! دى وظيفته يا بنى ادم ، ثم انى اشتريت فى الاخر بكذا الف ، يعنى ما ضيعتش وقت جنابه عالفاضى الموظف : والله ماحدش غصبك انا : طب وربنا لأوريك ........................ اليوم التالى صباحا: انا : الو ، خدمة العملاء؟ صوت واحدة واكلة ضفدع عالصبح :ايوة انا كنت عندكو امبارح وكنت عايزة أأجل استلام بضاعة وموظف الحسابات قاللى..... الموظفة مقاطعة : ما ينفعش انا : يعنى ايه ما ينفعش؟ طب خليهالكو الموظفة: براحتك ، بس حنحصل منك اتنين وعشرين جنيه عن كل يوم تأجير ارضية انا : ارضية ايه يا ست الحاجة؟ دى لسه ما دخلتش خط الانتاج اصلا الموظفة : طب ما احنا حندخلها عشان خاطرك ، يعنى الحق علينا!! انا : ما انا باتصل عشان أأجل دخولها خط الانتاج. الموظفة : ما ينفعش دا سيستم شركة انا : هو انتو اللى نازل عليكو اسمه سيستم شركة! !! ، باقولك ايه يا ابلة فضيلة ادينى اللى مشغلينك الموظفة : انا المسئولة وباقولك دا سيستم شركة والمرتبة حتيجيلك فى معادها ولو امتنعتى عن الاستلام حتدفعى ارضية انا : انا باقول تطلبونى فى بيت الطاعة بالمرة. ....................... سيبوكم من انقطاع النت ، وسيبوكم من دفع ارضية على شئ مش موجود ، وسيبوكم من الجليطة وقلة الذوق ، الأهم من كل الاضرار اللى لحقت بيا دى انهم علمونى طولة اللسان. انا بجد مستاءة واى حد مكانى من المؤكد انه حيستاء ، مستاء لعنيك ، مستألك ، مستاء وانا لسه مقابلك ، بس مش قادر انطق ، اصل دا بالظبط الحاصل فى سيستم الدولة ذات نفسيها. بالذمة حد يتبهدل كدة فى ام الدنيا! ! ، الشركتين اشهر من نار على علم وممكن تجربوا بنفسكم , ولا بلاش بدل ما تستاؤا زيى المشهد .. لاسقف للحرية المشهد .. لاسقف للحرية
