أساطير كتير جدا ، ممكن تكون متلعبكة ومتشابكة وتطلع عين الواحد لغاية ما يوصل لأصل الأسطورة وناس تانية تحس إن الأسطورة اللي بتقراها أو بتتحكي ليها بتحكي واقع هي بتعيشه ، لكن الأسطورة اللي من نسج الخيال بتخلي الواحد يقعد يفكر ، إزاي حصلت ؟ وإيه الدافع ليها و لوك لوك لوك …. مش مهم ده كله لكن الأسطورة اللي بين إيدينا دي خرافية مش ممكن تبقى زي الواقع اللي بنعيشه أبدا أبدا. الأسطورة بتتكلم عن ايكاروس وديدالوس ومينوس ( محدش يقولي ايه الاسماء الغريبة دي ما اكيد الاساطير مش هيبقى اسامهيم توتو وفوتو علينا بكرة ). الأسطورة دي ليها روايات كتير جدا يعني مرة يقولك إن " مينوس " ده حاكم ظالم كان بيحكم جزيرة " كريت " بالحديد والنار وكان عنده جهاز أمني ولا جهاز أمن الدولة في زمانه، بينكل بمعارضيه اللي كانوا حبايبه قبل كده زي ديدالوس. وديدالوس ده صنع متاهة كبيرة وكان قريب من مينوس ونظامه قوي، كان بالنسبة له شماعته اللي بيعلق عليها مينوس فشله الدائم، ودائما ما يقول مينوس إن ديدالوس ده خطر على البلد والناس تتعاطف مع ديدالوس ، فكان عقاب ديدالوس إنه يتسجن هو وابنه ايكاروس في برج كبير والحراسة تكون مشددة عليه وفضل ديدالوس يقول: ده ظلم ، ده افترا ، أنا أحسن واحد يعرف في الذكاء، أنا عارف خبايا الدولة، أنا وجماعتي أذكى الأذكياء في العالم وإحنا عندنا رؤية ومشاريع ولوك لوك لوك كتير بقى والناس صدقتهم بسبب ظلم الملك الظالم مينوس. المهم الراجل اللي اسمه ديدالوس ده كان عايز يخرج من السجن ومحدش هيساعده خصوصا إن ابنه ايكاروس معاه، وايكاروس ده طول عمره جبان ومالوش كلمة، ولا يعرف حاجة عن أي حاجة مجرد إن ديدالوس يقوله يمين يقول حاضر يقوله شمال يقوله أنت تؤمر، لكن ديدالوس كان عايز يخرج بسرعة خصوصا إن حلم حياته أن مينوس ده يسيب الحكم رغم إنه في أيام كتير كان بيدعي له بطول الحياة ومعندوش مانع إن مينوس يجيب ابنه جيموس يمسك الحكم ( هو مينوس كان عنده جيموس ؟ لا بس اهو غتاتة بقى ). فكر ديدالوس يعمل إيه ؟ يبعت لمينوس يقوله الناس بتكرهك ومش عايزاك ملك لكريت يقوله أنا الحاكم والناس بتحبني، وفعلا الناس كانت بتكره مينوس وعملت ثورة عليه وانشغل الحراس اللي بيحرسوا البرج بالناس وثورتها، وهوجة المساجين عليهم، وفجأة طلع ديدالوس ريش ولزقه بشمع في ضهره وضهر ايكاروس وقاله : يا ايكاروس إحنا هنهرب من السجن لكن اوعي تنزل للناس أو تطلع للشمس احسن جناحاتك تسيح (زي السمنة في صينية البطاطس كده). وفعلا طار ايكاروس وأبوه من السجن وفضلوا يطيروا والناس اسقطت مينوس، وحب ايكاروس اللي الناس كانت بتقول عليه اهبل، ومالوش كلمة وحد بيحركه خصوصا إن أبوه فضل ينصحه انه ما يقربش من الناس ولا يرتفع للشمس، إنه يوصل للشمس وطبعا الشمس (الحقيقة يعني) حرارتها مرتفعة وبتعري أي حد يقرب منها وتكشف كذبه، وما سمعش الابن كلام الأب وفضل يطير لغاية ما وصل للحقيقة وجناحاته ساحت وبقت زي السمنة في طشة الملوخية، وريشه طار وسقط في البحر صريعا –بعد ده كله تقولي صريعا يا راجل حرام عليك – وحزن ابوه عليه وهرب من الجزيرة بعد ما كدبهم وعلاقتهم بالحاكم مينوس انكشفت وطلعوا ابناء نظام حكمه وإنهم كانوا بيروجوا ليه وانهم ولا مظلومين ولا حاجة. ________________________________ الأسطورة فيها حقيقي وفيها زيادات ، والزيادات مش معناها انها بتصادف واقع ناس عايشة معانا لكن بتصادف إن النفوس البشرية واحدة دايما حتى لو أساطير.