حضرتك إحنا مجموعة بنات عاملين حركة نسائية جديدة اسمها عاوزين حقنا؟ - أهلا بحضرتك،، وربنا يوفقكم كنا عاوزين حضرتك تتكلم بأسلوب ساخر عن تهميش المرأة في المجتمع المصري ؟؟ -نعم !!! تهميش المرأه وأسلوب ساخر!! طب إيه المقابل هنشتري من حضرتك المقال ب 50 جنيه ولو الدنيا مشيت هيبقى ليك لقمة عيش حلوة؟ -50 جنيها!! أنا كتاباتي لا تقدر بتمن، وبعدين تهميش إيه اللي المرأة بتعاني منه في مصر!! لحد إمتى هتفضلوا عايشين في دور الضحية.. قعدتوا تقولوا معا لتصبح المرأة نصف المجتمع لحد ما بقت كل المجتمع.. حضرتك إحنا أقليه دلوقتي.. إحنا الرجالة اللي عاوزين نبقى نص المجتمع بجد. البنت من أول ما بتتولد وهي واخدة حقها تالت ومتلت، كام ولد اضرب بسبب أخته الصغيرة أو الكبيرة من أبوه أو أمه بسبب دموعكم دموع التماسيح.. واستغلالكم لهرمونات الأنوثة في غير موضعها. كام طفل أخته نزلته في أواخر الشتا قبل اللي فات عشان يجيبلها حاجة من السوبر ماركت أو الصيدليه. كام واحد نزل يوصل أخته درس الكيميا عند مستر حمدي وحش الكيمياء. حضرتك عندنا البنت لو كتبت "يارب" على الفيس بوك بيجيلها 3000 لايك، وتمنتلاف شير والعيال الحكاكة يدخلوا يقولولها قد إيه إنتي عميقة.. انتي تقربي لأحلام مستغامني! في حين إن "الولد لو كتب تفسير الشعراوي كله محدش بيعبره وبيعمل لايك لنفسه عشان يسلي نفسه. حتى المترو نصه عربيات سيدات والنص التاني السيدات منتشرين فيه، وتلاقي البنت تيجي تقف جمبك وترفع النضارة الشمس.. فتقوم وتقعدها، وأول ما تقعد تنزل النضارة الشمس تاني عادي جدا ولا كأن في اعتبار للبني آدم اللي واقف ده. حتى الشغل كل الشغل مطلوب آنسة حسنة المظهر.. طب بالنسبة للشباب اللي عاوز يشتغل عشان يتجوز ولا الهوا. ولو شغالة في الحكومة مجرد ما تولد بتاخد إجازة شهور مدفوعة الأجر، وأول ما ترجع بتيجي متأخرة ساعة عشان واخدة ساعة رضاعة.. اللي هو لو مخلفة ممدوح فرج مش هيرضع في ساعة يعني. ولو نزلوا البنات سيلز على منتج في كارفور زي زبادي ولا شيكولاته البنت بتاخد ضعف الولد في الأجر. البنت في الجواز كل اللي بتتحمله مسئولية اختيارها في حين أن الولد بيشيل الليلة كلها. الراجل مطلوب منه إنه يشتغل ويشقى ويصرف وهي تقعد تتفرج على قناه زي ألوان وتعمل كيكة البرتقان وتضربها لوحدها هي والعيال، وفي الآخر قبل ما تنام تفتح الفيس تكتب "إلهي أنت تعلم كيف حالي".. وتقوليلي عاوزين تبقوا نص المجتمع!! طب عارفة أنا كنت راكب النهاردة ميني باص جت واحده حوالي 120 كيلو قعدت جمبي، وكل شوية تقولي ما تتاخر شوية ما تتأخر شوية يا عم انت.. ناهيكي إن واحدة تقول ما تتأخر دي أصلا.. بس خفت تقول إني بتحرش بيها قعدت اضم في فخادي لحد ما قطعت خلف!! نص مجتمع إيه ارحموا أهالينا بقى أنا هعمل حمله رجال بلا حقوق وهبهدلكوا دكتور جيمي هندفع في المقال 200 جنيه! - أممممممممم،،، عاوزاه إمتى حضرتك.
