هل تعلم أخي حامل الجنسية المصرية أن: * الهكسوس احتلوا مصر حوالى 246 سنة * الأشوريين احتلوا مصر 16 سنة *الفرس احتلوا مصر 80 سنة *الفرس رجعوا احتلوا مصر تيك أواى كدة 11 سنة وعلى فكرة مش إحنا اللى خرجناهم من مصر لا ده اليونانيين جم طلعوهم وقعدوا هما......... وإحنا قاعدين نتفرج * اليونانيون احتلوا مصر بقيادة الإسكندر الأكبر سنتين * البطالمة اللى هما يونانيون برضه كملوا احتلالنا لمدة 300 سنة وعلى فكرة بعد ال 300 سنة احتلال أوعى تفتكر إن إحنا اللى طلعناهم لالالالالا ابسليوتلى ده الرومان بقيادة أوكتافيوس هما اللى جم طلعوهم وقعدوا مكانهم ................ وإحنا قاعدبن نتفرج : الرومان احتلوا مصر 360 سنة وطبعا عاشوا فيها وتاجروا وأتجوزوا وماتوا واتدفنوا فى مصر مقبرة الغزاة وبرضه بعد ال 360 سنة دول كلهم أوعى تفتكر أن شعب مصر العظيم صحى من النوم ده البيزنطيين هما اللى جم طلعوهم واحتلونا مكانهم البيزنطيين احتلوا مصر 310 سنين وبرضه بعد ال 310 سنين دول كلهم أوعى تفتكر أن شعب مصر العظيم صحى من النوم لا برضه ده الفتح الإسلامى هو اللى جه طلعهم يعنى برضه مش المصريين اللى طلعوهم يعنى مصر قعدت 983 سنة تتفرج على الدول اللى تيجى تحتلها ويحاربوا بعض وده ييجى مكان ده وإحنا قاعدين نقزقز لب وسودانى ونتفرج على بلدنا وهى بتحتل من كل الجنسيات اللى فى العالم يعنى كنت تروح أى بلد تلاقى فيها موقف بيحمل أى حد عايز يروح يحتل مصر ده غير بقى إن إحنا البلد الوحيدة اللى حكمها مماليك (يعني عبيد) 300 سنة باسم دولة المماليك ده غير أنهم قعدوا 700 سنة العبيد هم قادة الجيش وأمراء ووزراء وغحنا قاعدين نتفرج والعالم كله يضحك علينا !!!!! *الفرنسيين جم احتلوا مصر 3 سنين *الإنجليز احتلونا 72 سنة وطبعا قبلهم كان احتلال الخلافة العثمانية 400 سنة وكله تمام أفندم رصدها نورهان أحمد 10 يوليو 2015 ونقلها سيف براندو وفى رصد آخر كتبتSahar Nouhعاوزين تفهموا طبيعة شعبنا ؟؟ شوفوا الصور اللي ماليه الفيس بوك بمواطنين متصورين مع علاء وجمال مبارك.. والابتسامة ماليه وشوشهم وعلي فكرة أنا مختلفة مع الناس اللي تصوراتها بتكبر وتقول دي خطة ووراها حاجة.. يا جماعة إحنا بجد شعب فيه كل حاجة وعكسها.. بنشتم في فنان ونقول أعماله هابطة لكن لو شفناه في الشارع بنسلم عليه ونعمله علامة النصر ونجري نتصور معاه للذكري إحنا والأولاد ونقوله كام بيت شعر نعبر فيه عن عواطفنا الجياشة نحوه.. وقيس علي كدة بقي كل حاجة... يا جماعة إحنا شعب بيشتكي م الزبالة وهو ذات نفسه اللي بيرمي الزبالة في الشارع ويقول يعني هي جات عليا... يا جماعة إحنا بنشتكي من المرور وفي نفس ذات الوقت بنكسر الإشارة ونتخانق مع العسكري اللي بياخدنا مخالفة ونركن ع الرصيف... يا جماعة.. إحنا بنشتكي من حوادث الطريق الصحراوي والسرعة وفي نفس ذات الوقت بنبعت لبعض أماكن الرادار علشان نهدي السرعة بس قبلها.. يا جماعة إحنا بنشكي من اضطهاد الغرب لينا وعايشين دور الضحية وفي نفس ذات الوقت بنعمل تصرفات تديننا أكتر وتخلي شكلنا وحش ونحط راسنا في الرمل. يا جماعة.... إحنا بنترحم علي الفن ورقيه زمان وفي نفس ذات الوقت بنقطع تذاكر ونروح أفلام المقاولات اللي بننقدها ونسمع أغاني المهرجانات اللي بنتريق عليها ونشغلها في المناسبات ونرقص عليها. يا جماعة إحنا إللي ماتش كورة بيخلينا نهتف للمدير الفني ونقفله في المطار بالورود وماتش بنسبه ونلعنه بأقبح الألفاظ ونحدفه بالطوب وكإنه مطلوب منه ماينهزمش أبدًا وكإننا مش فاهمين إن اللعب مكسب وخسارة... يا جماعة إحنا ماشين علي نمط أغنية إلا انا إلا أنا إلا أنا... دايما مستنيين البداية من غيرنا.. دايما بنحب قوي ونكره قوي ونرفض قوي ونقبل قوي ونعادي قوي ونصالح قوي وماعندناش مسطرة ولا بنقدر نحايد... يا جماعة إحنا بنشتكي من الديكتاورية والفرعنة وإحنا اللي بنكبر الديكتاتور ونفرعنه ونغنيله اختارناك وبالروح بالدم نفديك يا.... إحنا اللي بنصنع الديكتاتور وإحنا اللي بنشتكي بعد كدة منه إحنا اللي بنآله البشر ونشتكي من الاستعباد إحنا اللي بنطالب بالقانون وبنرفضه لو اتطبق علينا إحنا عاوزين قاعدة وفي نفس ذات الوقت كل واحد فينا عاوز يكون استثناء صدقوني العيب فينا والمشكلة فينا وبالتأكيد الحل فينا# وعفوًا_ إبدأ _بنفسك. وتضيفSahar Nouhإحنا بنشتكي من حالة تدهور الأخلاق وبالإحصائيات أكتر شعب بيدخل علي المواقع الإباحية ع النت إحنا بنشتم في هيفاء وهبي والمطربات اللبنانيات وملابسهم وفي نفس الوقت بنقلدهم ونجري نصورهم بالموبايل ونتفرج عليهم ونخليهم مثل للجمال إحنا اللي شوهنا الحجاب وبنلبسله بادي كارينا ونحط علي راسنا ربطة الكابوتشا إحنا اللي بنتفرج علي قناة التت وإقرأ إحنا اللي بنشتكي من جشع التجار وبنخزن البضاعة في بيوتنا قبل ما تخلص ومابنشتريش ع القد إحنا اللي رفعنا الجزم لمبارك في الميدان وإحنا اللي عملنا صفحة اسفين ياريس وبنترحم علي أيامه دلوقت إحنا اللي بنكفر المختلف ونحلل دمه وفي نفس الوقت حلمنا السفر في بلاد الفرنجة الكافرة.