(المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات) (حصاوي جالس مع جاره) الجار: شفت برنامج باسم يوسف الجمعة اللي فاتت؟ حصاوي: بصراحة خفت ما رضتش أشوفه. الجار: وتخاف من إيه؟ حصاوي: أصلهم رافعين عليه قضية والحكومة ناوية له على نية سودة. الجار: طب دا هو لكن أنت مالك؟ تخاف تتفرج عليه ليه؟ حصاوي: مش جايز يكونوا بيسجلوا أسامي الناس اللي بتشوف البرنامج بتاعه، وبعد ما يخلصوا منه يرفعوا قضايا على الناس اللي كانوا بيتفرجوا عليه؟ الجار: هياخدوا براءة. حصاوي: إيش عرفك؟ ومع ذلك ممكن الحكومة تستأنف الحكم. الجار: ولو.. المتفرجين ممكن يكسبوا الاستئناف. حصاوي: مجلس الشورى يسبق من دلوقت يطلع قانون جديد. اللي يتفرج أو سبق اتفرج على برنامج باسم يتحبس سنة مع الشغل وبأثر رجعي. الجار: القضاء يرفض القانون دا. حصاوي: القضاء ما لوش دعوة بوضع القانون. القانون بيحطه اللي بيعينهم مرسي في مجلس الشورى. الجار: نادي القضاة مش هيسكت ويعترض. حصاوي: طظ. الجار: النادي يدول القضية ويشتكي لمجالس القضاء العالمية. حصاوي: امسك. الحكومة ساعتها تشتكي أن القضاء بيستقوي بالخارج وتعتقل رجال القضاء وتحبسهم. الجار: وهو فيه قانون كده؟ حصاوي معرفش لكن القانون يتحط في ليلتين. الجار: أمال إيه العمل؟ حصاوي: بسيطة. هو مش باسم عمل البرنامج بتاعه تقليد لبرنامج صاحبه جون ستيوارت اللي في أمريكا؟ الجار: أيوه ولسه كان معاه في أمريكا. حصاوي: كويس. يبدلوا مع بعض، جون يدي لباسم وقت في البرنامج بتاعه ينتقد فيه أمريكا على كيفه. الجار: والأمريكان هيسكتوا على كده؟ حصاوي: طبعًا، لأن عندهم حرية رأي. الجار: وبعدين؟ حصاوي: ييجى جون ستيوارت عندنا يطلع في برنامج باسم ويسخر من كل حاجة في بلدنا على كيف كيفه. الجار: والحكومة عندنا هتسكت على كده؟ حصاوي: تعمل ما بدالها، لو شاطرة تخلي النائب العام يبعت لجون ضبط وإحضار ويحقق معاه. الجار: وما تقدرش ليه؟ حصاوي: إحنا مش متعودين في بلادنا والبلاد الشقيقة أن أي مشكلة، بدل المحاكم والبهدلة نعمل قاعدة عرب ونجيب الطرفين المتخاصمين ونروح للكبير نكلمه وهو يحكم بينا ونرضى بحكمه؟ الجار: تمام. بس الكبير بتاعنا دلوقت يبقى الرئيس مرسي، وطبيعي يبقى مع جماعته وحزب الحرية والعدالة ومكتب الإرشاد. حصاوي: الدنيا واسعة زي الغابة والكبار فيها كتير، ولما قرد يقع مع بقية القرود يقوموا يشتكوا لمين في الغابة؟ الجار: للأسد ملك الغابة طبعًا. حصاوي: عليك نور والرئيس أوباما هو الأسد المرعب في الغابة بتاعتنا دلوقت يقوم يجيب القرد الكبير ويشخط فيه شخطتين ويقوله: اتلم ما تجيبليش وجع الدماغ. يقوم يسمع كلامه دوغري. الجار: بس كده المشكلة اتعقدت أكتر. حصاوي: بالعكس. الحكومة المصرية هتوافق إن جون سيتوارت يرجع أمريكا وينقد بلده هناك زي العادة وباسم يوسف يرجع مصر ويسخر زي ما يعجبه من أحوال مصر واللي بيجرى فيها. الجار: ومين اللي يقنع الرئاسة والجماعة ومكتب الإرشاد بكده؟ حصاوي: أوباما نفسه. هيغمز لهم بعينه يقولهم: سيبوا باسم يتريأ على كيفه. هو أنتم بيحوق فيكم حاجة (الجار يغشى عليه)