أثارت الفنانة حلا شيحة، جدلًا واسعًا، في الآونة الأخيرة، على منصات السوشيال ميديا، ومواقع التواصل الاجتماعي المختلفة؛ "فيس بوك،"تويتر"، و"إنستجرام"، وذلك بعد هجومها على الفنان تامر حسنى،الذى شاركته بطولة فيلمه الجديد "مش أنا"، المعروض حاليًا، والذي يحقق إيرادات عالية، جعلته يتصدر قائمة الأفلام المعروضة في الوقت الحالي. وأعلنت حلا"، أنها تبرأت من الفيلم، بسبب بعض مشاهد الأحضان التى جمعتها مع تامر حسنى، وذلك رغم تحقيق العمل لإيرادات عالية، منذ بدء عرضه في السينمات، وهذا الأمر جعل كثيرا من نجوم الفن، يهاجمون حلا شيحة، ويعلنون رفضهم لطريقة تعبيرها؛معلنين أن الفن رسالة وليس شيئا يخجل منه أحد، كما رد عليها تامرحسنى، ومخرجة العمل، سارة توفيق، وهاجمت زوجها معز مسعود. هذه الأزمة رغم أنها سخيفة، إلا أنها ساعدت في تكثيف الدعاية للعمل مجانا ، حيث ارتفعت مشاهدات كليب "بحبك"، الذي أعلنت حلا شيحة رفضها التام له، وذلك بسبب شغف وحب الاستطلاع لدى الجماهير، التى أردات أن تعرف المشاهد التى اعترضت عليها شيحة، واقترب الكليب منذ بدء عرضه، يوم 13 يوليو الجاري، حتى الأحد، من الوصول إلى 6 ملايين مشاهدة، لتساهم حلا بطريقة غير مباشرة، في انتشار الكليب أكثروأكثر. وجاءت بداية هذه الأزمة، عندما كتبت حلا شيحة عبر حسابها الرسمي على موقع "إنستجرام"، قائلة: "أنا اتفاجئت جدا بنزول كليب يجمع فيه مشاهد متفرقة من الفيلم، وخصوصا بعد آخر بوست نزلته، ووضحت فيه أنا إيه.. واتفاجئت أكتر خصوصا بعد وعد تامر حسني ليا، وتأكيده إنه هيحترم رغبتي، وبعض الطلبات اللي طلبتها منه، بكل احترام وود،الصيف اللي فات، وأكد لي إنه حيحترم رغبتي". وأضافت "حلا": "إحنا يمكن نجحنا بمقاييس الدنيا، بس صدقوني بمقاييس ربنا إحنا لم ولن ننجح، أنا عارفة ومتأكدة ان زملائي جواهم خير، بس للأسف فتنة الشهرة والنجاح مش بتخلينا نشوف ونقيس الأمورصح، بتكلم من قلبي، الكليب ده ميرضيش ربنا". وتابعت:"أنا عيطت لأني شفت نفسي في المشاهد دي.. دي كانت زلة نتيجة ظروف مريت بيها، وكلنا بنغلط، ولازم نغلط علشان إحنا بشر، بس المصيبة إننا بنغفل وبننسي". وقالت "حلا": "أنا مش هتكسف من حد، أنا تبت من المشاهد دي، وهي لا تصح، وأنا غلطت وبصلح، وأهم حاجة إن ربنا يرضى عني، لأن في الآخر ده اللي حينفعنا، مش الشهرة ولا النجاح، لا هو مش نجاح أصلا،علشان النجاح الحقيقي حاجة تانية خالص، احنا أغلبنا ناسينها إلا القليلين منا، الفن لو بيخلينا نبعد عن منهج ربنا، ومنبقاش قدوة لولادنا،يبقي باطل وميبقاش فن". واستطردت قائلة: "احنا كلنا عندنا امتحان في الدنيا دي، وحابة افكرك بالفيديو ده يا تامر، اللي قولت فيه أنا مش بتمنى أموت وأنا مطرب، أنا دايما خايف کده.. كلام أكيد قولته في لحظة صدق جواك وجوانا كلنا،شوفه تاني يمكن يفكرك أن جواك أكيد في صراع، وأنا وكلنا بنغلط بس المهم في الآخر نتدارك الغلط ونصلح". وأنهت "حلا" كلامها قائلة: الله تعالى يقول في كتابه الكريم(إلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَّحِيمًا)، صدق الله العظيم، الله على كلام الله وجماله، يا سلام لو أصواتنا ومواهبنا كلها نستعملها في الخير، عشان يبقى فن بجد". ولم يقف النجم تامر حسني صامتًا، بل قام بالرد على حلا شيحة، في منشور عبر حسابه الرسمي بموقع "إنستجرام"، كشف عن أنه كانت هناك العديد من المشاهد، التي تم حذفها من العمل، بناء على رغبة الأخيرة، وأنه وفريق العمل احترموا رغبتها حتى النهاية، قائلا: "للتوضيح بما إنك يا حلا كتبتي بوست، وأشركتي الجمهور الكريم معانا، بدال ماكنتي تكلميني شخصيا، ونتناقش بيني وبينك، فأنا مضطر أرد هنا برضو". وقال "تامر": أولا أنا عمري ما وعدتك إن الكليب مش هينزل، دا محصلش أصلا يا حلا، مش أنا خالص اللي أوعد وأخلف، الحقيقة اني إحترمت كلامي معاكي، ووعدتك أشيل مشاهد تانية طلبتيها، وشيلتها بالفعل، وشكرتيني عليها، ولو حابة تفتكري المشاهد اللي اتشالت بعد إذنك روحي شوفيها في المونتاچ، عند عمرو عاكف، أو كلميه يبعتها لك كلها موجودة".
أما المونتير عمرو عاكف، فقد كشف عن طبيعة المشاهد التي تم حذفها،والمشار إليها من قبل الفنان تامر حسني، حيث أكد أنه بالفعل تم حذف مشاهد كثيرة جدًا من الفيلم، بناءً على رغبة الفنانة حلا شيحة، وكلها كانت مشاهد عادية، ومفيهاش أمر مخجل، أو مسيئ، بس حذفناها بناءعلى طلبها. كما أكدت المخرجة سارة وفيق، مخرجة فيلم "مش أنا"، أنها ردت على الفنانة حلا شيحة، بعد ما كَتبته بشأن ظهورها في الفيلم،مشيرة إلى أنها طلبت حذف بعض المشاهد في الفيلم، والفنان تامرحسني احترم وجهة نظرها، وقالت: "توجهنا للمونتاج، وفتحنا الفيلم منجديد، وهي كانت تمثل عبئا ماديًا إضافيًا على شركة الإنتاج، وهي طلبت ذلك قبل عرض الفيلم، لأنها تزوجت في تلك الفترة، وحذفنا 4مشاهد من الفيلم، وهو أمر كان يحتاج إلى دراسة، حتى لا يخل بمحتوى الفيلم". وأضافت "وفيق": "بعدها تم غلق الموضوع، واختفت حلا شيحة بعدها تماما، وحاولت أنا وتامر حسني والقائمون على الفيلم الوصول إليها فلم ترد علينا، وكانت لا ترد على رسائلنا، وتامر كان يدافع عنها، ويقول ما يحدث حرية شخصية، وبعد إطلاق الفيديو الكليب، خرجت وكتبت ماكتبته، على الرغم من أن الفيلم يعرض منذ 21 يومًا". وتابعت المخرجة سارة وفيق: "هي حاولت أن تصل إلى تامر، وقالت له إنها ترغب في العودة للسينما، من خلال التمثيل مع ممثل سوبر ستار،وهو ساندها معنويا ونفسيا، وكانت كواليس الفيلم لذيذة، حتى أنها كانت تصطحب أبناءها معها خلال التصوير، وكل المشاهد لا يوجد بها أي تجاوز، حتى المشاهد التي تم حذفها، كانت مشاهد رومانسية كوميدية،ووالدها اعتذر لتامر حسني بعدها".
ولم يقف الأمر عند هذا الحد، حيث تشابكت خيوط المشكلة أكثر وأكثر،وعلقت المخرجة سارة وفيق، عبر صفحتها بموقع "فيس بوك"، على هجوم الداعية معز مسعود، زوج حلا شيحة، على الفنان تامر حسني،وقالت:"أستاذ معز أنا سارة وفيق، مخرجة فيلم (مش أنا)، قرأت بوست حضرتك، اللي بتوضح فيه إنك فاهم قصد حلا، عن بعض اللقطات، اللي كان المفروض نراعيها.. خلينا نتكلم بالحق بعد إذن حضرتك، إحنا نشيل مشاهد ليه؟، وبأي حق بعد ما صورت وأخدت أجرها كامل؟. وواصلت "وفيق": احنا مالنا إنك اتجوزتها!! إنت اتجوزتها فنانة وبتصورالفيلم دا، ودي حاجة بينك وبينها، إحنا مالنا، وكمان بتقول كنت هتاخد إجراء.. إجراء إيه اللي تاخده.. إنت ملكش أي حق تاخد أي إجراء،المفروض تشكرنا إننا مخدناش إجراء قانوني ضد مراتك، اللي امتنعت عن تسجيل صوتها، لدوبلاچ الفيلم، وعن تصوير أفيش الفيلم، اللي مدفوع فيه ملايين، إنت متعملش حاجة غير إنك تشكرنا، لأننا شيلنا كل المشاهد اللي هي ماكنتش عايزاها. وتابعت: وممكن أبعتها لك تشوفها، عشان تعرف بس إزاي أنا والمنتج والفنان تامرحسني، فتحنا الفيلم، وعيدنا المونتاچ تاني، على حساب الفنان تامر حسني ماديا، عشان يرضي حلا، مع أنها مشاهد من وجهة نظري طبيعية وكوميدية ورومانسية راقية، لأن دي طبيعة أفلام تامر، ومع ذلك شال كل المشاهد دي، واحترم وجهة نظرها". وقالت مخرجة الفيلم: "فيما يخص الكليب بقي، هو حضرتك كنت فين من 21 يوم، من ساعة ما الفيلم نزل؟، ماهو الكليب في الفيلم، ومصر كلها تقريبا شافت الفيلم،ومحقق أعلى إيرادات، كنت فين حضرتك؟ وهي كانت فين؟، ما هو الفيلم كله على بعضه، هينزل كمان في التليفزيونات بالكليب اللي جواه، وبعدين دا كليب رومانسي. وأضافت "وفيق": المراعاة من وجهة نظرك، هي ضرر من وجهة نظرالإنتاج، ودي مصاريف كبيرة أوي، وحلا وافقت تصور برضاها، ورغم كل دا كلمناها كتير مردتش علينا، ولا على رسايلنا، كان لازم بخبرتك تخليها تتواصل مع شغلها، وتقفل الصفحة صح، مش تخليها تقاطع شغلها،وتورطها كدا، دا لو إنت السبب في المقاطعة دي، والله أعلم". واستطردت قائلة: "بعدين حضرتك كنت فين، وهي بتكتب البوست الصبح، ليه المواعظ العظيمة الجميلة دي منصحتهاش بيها، دا لو مش إنت اللي كاتب البوست أصلًا، أنا مكنتش ناويه أرد على حلا، لأن تامر رد بمنتهى الأدب والاحترام، ووضح كل حاجة، وحلفني ما أردش عشان خاطر نفسيتها،بس إنت استفزيتني بصراحة". واختتمت كلامها قائلة: "لو إنت اللي أرغمتها تكتب بوست بالشكل الساذج دا، عشان تحافظ على منظرك قدام الناس، فأنت فضلت نفسك على حساب حلا، وللأسف خليت الناس كلها تهاجم مراتك، دا لو إنت السبب برضو، والعلم عند الله".
