نشر الموسيقار خالد حماد مجموعة من الصور تجمعه بالزعيم عادل إمام عقب نهاية تصوير مسلسل "عوالم خفية" الذي قام بوضع الموسيقى التصويرية له. وكتب "حماد" تدوينة على صفحته بموقع التواصل الاجتماعي "فيسبوك" روى خلالها ذكرياته مع الزعيم قال فيها: "بمناسبة عرض الحلقة الأخيرة من مسلسل "عوالم خفية"، أولا الحمد لله على نجاح المسلسل وأبارك لكل الزملاء والأصدقاء الفنانين اللي قدام وورا الكاميرا اللي إشتغلوا فيه واللي عملوا مجهود خرافي لإتمام هذا العمل، أخيرًا ولأول مرة أنا في صور مع الغاليين الفنان عادل إمام ورامي إمام". وأضاف: "الفنان الكبير عادل إمام واللي له مكانة خاصة جدًا عمري ما أخدت معاه صورة رغم إني إشتغلت معاه 3 أفلام "أمير الظلام - التجربة الدنيماركية - عمارة ياعقوبيان" و3 مسلسلات "العرّاف - صاحب السعادة - عوالم خفيّة" وإتقابلنا كثير سواء في تصوير أو في مهرجانات أو في زيارات شخصية أو حتى سفر.. فأنا ليا معاه ذكريات جميلة جدًا في القاهرة وبروكيسل وباريس.. مش بس كدة.. مرة كنا في فرنسا بنعمل طباعة نسخ فيلم أمير الظلام وكان في آخر شهر إبريل أو أول شهر.. مايو المهم كان فترة عيد ميلاده وفي نفس الوقت عيد ميلادي.. يا سلام على السعادة إنه برج الثور زي حالاتي.. وأخدنا أخوه المنتج عصام إمام والفنان المونتير صديق عمري ماجد مجدي وصديقي المخرج رامي إمام وعملولنا عيد ميلاد وخروجة فظيعه في باريس وألاقي إن بيتعملي عيد ميلاد مع عادل إمام شخصيًا ". وعن المخرج رامي امام قال: "وكمان المخرج والصديق العمر رامي إمام صورنا مع بعض نادرة برغم إننا إشتغلنا مع بعض 4 أفلام "أمير الظلام - كلاشينكوف - بوحة - غيي منه فيه" و3 مسلسلات "العرّاف - صاحب السعادة - عوالم خفية" وبرضو صورنا مع بعض نادرة برغم كل الشغل والمقابلات والسفر اللي سافرناه واللي ماليان تعب وهزار وضحك، المهم.. من أكثر من شهرين عديت عليهم في التصوير عشان أتكلم في حاجات تخص المسلسل قبل ما أسافر روسيا لتسجيل الموسيقى التصويرية.. وكان الزعيم عادل إمام موجود هناك بيصور في إستوديو "نحّاس" ولما دخل قابلني ماقبلة جميلة جدًا وأنا المرادي "ولأول مرة ففي حياتي" اللي عملت زي أي حد من المعجبين وقولتله ينفع كدة؟! إتخض هو.. فأنا ضحكت وقولتله ينفع كل الشغل والعمر دة والسفر والحاجات دي وماليش ولا صورة معاك أتمنظر بيها على أصحابي.. فقام مكشر التكشيرة اللي بتموتني من الضحك ورفع حاجبه وقالي دة أنا اللي عاوز أتصور معاك ". وتابع قائلًا: "أنا الخضّة دي عاملها مخصوص لإن أقبلها بإسبوعين عديت عليهم في التصوير بس في مكان ثاني وكانوا مرهقين جدًا وزحمة شغل وماكونتش شوفته من 3 سنين مثلًا وأول ما دخلت عليه وأنا في منتهى السعادة والبتاع.. وهو فضل باصص ليا كدة وماتهزش وفضل يبصلي وحالة سكون بتاع 10 ثواني بيتأملني من فوق لتحت وأنا من جوايا بقول يانهار إسود على الكسفه دة نسي شكلي.. وطبعًا ال 10 - 15 ثانية عدوا عليا زي ساعتين إلا ربع وفي الآخر قام قايلي: إنت مابتمثلش ليه؟ إنت شكلك ممثل ولازم تمثل!! وقام واخدني بالحض وسلم عليا والحاجات دي.. ثبتني تثبيته حلوة بروحه وطريقتة الكوميدية الجميلة "ولو إنه كان بيقصد اللي قاله"..". وانهى التدوينة قائلًا:" 1000 مبروك على النجاح وربنا يخليك لينا يا أستاذ عادل فإنت بمثابة والد وبالفعل والد أحد أعز أصدقائي "رامي إمام" وحبيبي "محمد إمام".. ويخليك لمصر والعرب والدنيا كلها والفن المصري، وتفضل مالي علينا كلنا الدنيا فن وأعمال جميلة، 1000 مبروك لرامي إمام نجاح مسلسل "عوالم خفية" وخصوصًا إنك تعبت فيه بصفة مخرج وكمان منتج.. وفخور بكل نجاحاتنا مع بعض.. ويارب دايمًا موفق لإنك إنسان خلوق ومحترم بجد.. وطبعًا صاحب جدع وكأصحاب بنضحك مع بعض ضحك هستيري".
