( المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات، ولكن أحيانا يجعل من يسمعه هو الذي يغشى عليه). ( حصاوي يزوره رجل من بلدياته فيدعوه حصاوي إلى فنجان شاي وكرسي معسل على المقهى) حصاوي: إنت نورت مصر. بلدياته: منورة بأهلها.. سلامات كده.. وإيه الأخبار يا سي حصاوي؟ حصاوي: مفيش أخبار. بلدياته: إزاي بقى؟ حصاوي: زي الناس.. ما هو الأخبار بنعرفها من الجرايد والجرايد ما عادش حدّ بيقراها. بلدياته: معقولة؟ ودا يبقى اسمه كلام بالذمة؟ حصاوي: الناس بتقرا اللي بيتكتب على الفيس بوك. بلدياته: ودي مين اللي بيكتب فيها؟ حصاوي: أي حد.. حتى لو كان لسه عيل في ابتدائي بلدياته: يا ساتر حصاوي: وأنت أمّال بتقرا أنهي جرنان؟ بلدياته: ما بقراش حاجة خالص.. أمّال أنا جاي أسألك ليه؟ حصاوي: طيب يبقى أنا أجيب لك أخبار منين؟ بلدياته: وانتوا بتغلبوا يا بتوع البندر؟ تجيبوها من على النت زي ما بتقول. حصاوي: وتصدق مين.. دا كل واحد بيكتب اللي على كيفه.. بس أنا ماعنديش نت أساسا. بلدياته: إنت كمان؟ أمّال عايش إزاي؟ حصاوي: أديني بتعالج. بلدياته: من إيه بعد الشر؟. حصاوي: والله ما أنا عارف.. ما أنا لو كنت عارف كنت عالجت نفسي. بلدياته: وليه ما تروحش لدكتور؟ حصاوي: إنت بتروح لدكاترة؟ بلدياته: الصراحة لا.. أول هام لأن الروشتة بتاعتهم غالية قوي.. يعني ممكن تجيب لك أمراض وحشة.. سكتة قلبية، ضغط واكتئاب بعد الشر وحاجات ياما. حصاوي: وتاني هام؟ بلدياته: يكتبوا لك في الروشتة أدوية كتير.. تروح تشتريها تطلع أغلى من أجرة إيد الدكتور.. والمصيبة إنه يقولك تفضل تشتريها طوال العمر. حصاوي: وساكت على نفسك؟ ما عملتش حاجة في المشكلة دي؟ بلدياته: لا طبعا ما سكتش.. أنا فضلت ألف وأدور لحد ما لقيت البديل. حصاوي: دوا أرخص شويه؟ بلدياته: لا دكتور أرخص كتير.. ولاد الحلال دلوني على راجل مبروك وواصل.. هو وإخوانه الدكاترة عاملين جمعية.. يعرفوا حالتك من غير ما يكشفوا ويرقوك ويصرفوا لك وصفة معتبرة.. مشيت عليها بقيت عال. حصاوي: أنا كمان بطلت الدكاترة مش بس عشان الفلوس، عشان بخاف.. أصلهم بيعالجوا الناس غلط. بلدياته: يقطعهم.. اللي بقولك عليهم دول ولاد حلال ويعرفوا ربنا.. يكفي إنهم بيعالجوا الغلابة والمساكين وساعات يدوهم سكر وزيت وسمنة وخير كتير. حصاوي: بس السكر والزيت والسمن مش دوا، دا أكل وممكن العيان يموت بسببه. بلدياته: إزاي مش دوا؟، دا كل الأمراض بتيجي من تحت راس الفقر.. إنت ما سمعتش عن الدكاترة دول؟ حصاوي: مش واخد باللي.. مالهم؟ بلدياته: دول جماعة خيرية فيهم دكاترة كتير وكبيرهم اسمه الدكتور مرسي. حصاوي: سمعت عنه دا حتى دكتور جامد قوي ومتعلم في أمريكا، وساعات يدي الناس فلوس كمان. بلدياته: شفت؟، ينصر دينه هو وإخوانه.. وألاقيه فين؟، إديني عنوانه قوامك. حصاوي: دا صعب تقابله. بلدياته: طبعا.. أكيد الناس عليه أمم. حصاوي: أصل هو عليه حراسة شديدة. بلدياته: طبيعي.. مش بيعمل خير حصاوي: لأ دا عليه حراسة لأنه مسجون. بلدياته: اسفوخص على دي بلد.. عشان إيه؟، عشان بيعطف ع الغلابة؟، هو كان عالج الناس غلط وسبب لهم مرض جامد؟ حصاوي: لا هما قالوا إنه هو وأصحابه ادّوا الناس صابونة. بلدياته: يا سنة سوخة.. ماهو لازمن يدي لكل واحد صابونة عشان ينضف.. دي حكومة ظالمة.. ليه تعمل كده؟. حصاوي: أصل الناس بعد ما صوتوا له في الانتخابات سحبوا كلامهم ورجعوا وقالوا مش عايزينه. ( بلدياته يغشى عليه ) لينين الرملي "هرش مخ".. الأحد 5/1 /14 1 أيظن؟ الأستاذ هيكل يتكلم كثيرا وكعادته يقول بين كل كلمة وأخرى كلمة "أظن"، حتى لا يقع في الخطأ، لكنه يثبت أن بعض الظن إثم!. 2 الثوار إياهم يحتجون على الشرطة والجيش والقضاء والشعب، ونسوا في الزحمة الاحتجاج على وجود المعزول وإخوانه في السجون! 3 فزورة سهلة ما الفرق بين زعيم إخواني هتف مرات: "رايحين على القدس بالملايين"، وزعيم وعدنا مرات أكثر بإلقاء إسرائيل في البحر ثم مات؟!. 4 أسوأ ما فيها أسوأ ما في الثورة أن الإعلاميين فرضوا علينا كل من هبّ ودبّ ليتفلسف علينا، هذا بالإضافة إلى نظريات الإعلاميين الثورية نفسها!. 5 حرية ع الآخر أخشى أن يأتي اليوم الذي يمنح فيه كل مواطن حق أن يسعد نفسه بنفسه بعيدا عن الآخرين. 6 ممنوع الاقتراب صعب أن نبني المستقبل قبل أن نعرف ماضينا وتاريخنا الحقيقي بلا تزييف، لكن ذلك خط أحمر ممنوع الاقتراب منه أو التصوير! 7 الخطة الخمسية كان يا ما كان ولا يزال، بيننا أشاوس يدافعون عن فلسطين الوطن السليب، ويؤجّلون مشكلات مصر إلى الخطة الخمسية القادمة، الحمد لله أن عندنا سرايا القدس!.
