في جميع الأحوال، هتعدّي كل صعبة هتمُر بيه طول ما إنت واثق إن ربنا معاك، الخسارة الكبيرة إنّك تفقد ثقتك في ربنا، الثقة في الله هي الباب اللي من خلاله هتشوف النور بقلبك وتقدر تلمس حلمك بسهولة. في جميع الأحوال، كل اللي معاك هيسيبوك، محدش هيكمل معاك غير اللي بيحبك بجد، واللي بيحب بجد في الزمن ده نادر وجوده؛ فبلاش تفتح قلبك لأي حد يقولك بحبك، لأن كلمة بحبك مش مجرد كلمة عادية، كلمة بحبك مسؤولية واللي يكون قدها هو بس اللي هيكمل معاك للآخر. في جميع الأحوال، كل اللي قللوا منك هيندموا على كل كلمة قالوها في حقك، كل اللي إتريق عليك هيقابل اللي يتريق عليه، كل واحد في الدنيا دي بياخد حقه كامل، كل واحد شايف إنه أحسن من غيره أو أقوى من غيره هيوقع في النهاية، القلوب الطيبة هي اللي هتكسب في الآخر يا طيب. في جميع الأحوال، الجرح اللي علّم جواك هيتنسي، كل حاجة وجعتك مع مرور الأيام هتتلاشى، الوجع مرحلة بتعلمنا ناخد بالنا كويس ومنآمنش بسهولة بأي كلام، ولا نصدق أي وعد، ولا نكمّل مع حد بيكذب باسم الحب عشان يحس بشوية اهتمام أو يجرّب الحب، الحب حياة اللي قادر يعيشها هو بس اللي عارف نهايتها، ونهاية الحب "الجنّة"، خطوة بنمشيها، بنتعلم ونعلّم، بنغلط ونواجه، خطوة هتتحول لخطوات، وقلبك طول ما هو نضيف وطيب هيقابل قلب طيب، الطيبون للطيبات؛ فمتقلقش. في جميع الأحوال، نصيبك هيصيبك، والرزق مش في الفلوس بس، الرزق في كل حاجة؛ فحاول دايمًا تكون واثق إن نصيبك هيصيبك وماتستعجلش، رزقك هيصيبك وإنت قاعد زي ما إنت. في جميع الأحوال، الدنيا مش دايمة، ولو فضلت متعلّق فيها هتوقعك، ولو حاولت تجمّع فلوس كتير ويكون عندك وسواس "أنا معايا كام وهصرف ليه وهشتري ليه" هتموت في الآخر والفلوس هي اللي هتبقى، حاول دايمًا ماتتمسكش بأي حاجة في الدنيا لأن ببساطة الدنيا مش دايمة. في جميع الأحوال، هتتعلم تسامح كل اللي ظلموك، مش عشان إنت ضعيف، عشان قلبك طيب، هتتعلم تواجه كل واحد قلل منك، هتتعلم تحب، و تعرف يعني إيه حب، هتتعلم تبص لبكرة وتقرر إنت عايز إيه، وهدفك إيه، هتتعلم وهتعلّم، بس خلي بالك.. ماتثقش في أي حد يدخل حياتك عشان ماتتوجعش في الآخر.
