"الامتحانات علي الأبواب، وأنا لسه مافتحتش كتاب" .. هو عنوان صفحة طريفة تم تدشينها مؤخراً علي فيس بوك بمناسبة اقتراب موسم الامتحانات ولاقت تفاعلاً كبيراً من الشباب، حيث تسابق طلبة المدارس والجامعات علي الدخول عليها وإطلاق النكت والجمل الساخرة والأغاني المعدلة التي تتحدث عن خوفهم من قرب الامتحانات ونكد ساعات المذاكرة. فعلي وقع المسلسلات التركية التي حققت نجاحا كبيرا في العالم العربي قام الشباب بربط أسماء هذه المسلسلات بالدراسة والامتحانات فقالوا "الدراسة سنوات الضياع وقاعة الامتحان وادي الذئاب والامتحانات لحظة وداع وشهادة الدكتوراه الحلم الضائع وأنك تحب الدراسة ده العشق الممنوع" ومن ضمن الأغاني التي استخدمت في المذاكرة والامتحانات أغنيةعمرو دياب "أنا مهما كبرت صغير، أنا مهما عليت مش فوق" حولوها فأصبحت "أنا مهما ذاكرت هدبلر. أنا مهما ذاكرت هشيل، مش ممكن يوم أنا هنجح، ولا حتي هجيب تقدير" وأغنية يهمك في إيه أصبحت "يهمك في إيه، أشيل ولا أعيد ده امتحان ملكش تحل فيه، وهتحل إيه ده اللي بيذاكر أكيد بيبان عليه، إيه اللي قدامك دة سؤال محلتوووووش، مبقتش أخاف عليه أسيبه أو امسحووو، فاشلين كتيراتفصلوا عادي مكملوش .. واهو كل واحد بيحل اللي ينجحووو" والأغنية الشعبية الشهيرة "أنا شارب سيجارة بني.". تحولت ل"أنا دماغي بتاكلني... قاعد في اللجنة باهلفط ... والورق عمال يتلخبط والمعيد اللي ورايا قدامي... والإجابة علي طرف لساني أجي أجاوب بتلخبط ... والواد اللي ورايا بيغني ... واللي جنبي بيغش مني والباقي عمال بيعيط ...والبنات تلطم وتصوت..." وبجانب الأغاني كان هناك العديد من الحكم المتعلقة بالامتحان مثل "ازاي تحب المذاكرة زي ما بتحب الفيس بوك: أعمل لمخك Refresh - السؤال اللي يعجبك اعمله Like - السؤال اللي مايعجبكش اعمله Block - السؤال اللي تعرفه اعمل عليه Comment - واذا عجبك المراقب اعمل معه Chat - اذا كان اللي جنبك مش عارف حاجة وخلصت امتحانك قبله حاول تعمل : Post on his wall بس ربنا يستر و ما يكونش المراقب صاحي و يعملك Report .. ومن الأقوال المأثورة: "ليس كل ما يذاكره المرء يفهمه .. وتأتي الامتحانات بما لا تحتويه الكتب، لذلك .. نام وارتاح .. وابعت هات ميرندا تفاح".. وفي النهاية لايمكن ألا يضم جروب مثل هذا اقتباسا من أحد خطابات العقيد القذافي "دقت ساعة الامتحان..دقت ساعة النكد..إلي الأمام إلي الأمام..لاتراجع ولا استسلام ..... افتحوا الكتاب واغلقوا الفيس بوك... وادرسوا شبتر شبتر..صفحة صفحة..حرف حرف..وابقوا قابلوني لو فلحتوا.
