ما اعرفش أكتب فى الوطن أشعار لا ف فرحة طالة ولا حتى حداد ييجى الكلام ف اللحظة دى وينهار يصحى القديم منه وقوام يتعاد البنت قالت فستانى بص يا حداد منشور على الشط التانى سترتى بمعاد أبنودى يحلف بالسما وبتراب رايات النصر ف إيدينا واهو راجعين والله زمان يا سلاح زمن الكفاح يا ريت تكون مرتاح الآن يا عم جاهين؟ أنا اللى ف أكتوبر بانام للعصر واصحى على صوت الأغانى لمصر مع طلقة حية إنما فى حضن الجيب ولقطة قديمة مهرية ومتْعادة بحر البقر موجه رسى فى شط الغيب وفوق الميه فرشوا الجند سجادة يا بدور يا خورشيد يا ولاد الصمت يا غنوة طالعة ع الممر لفوق على الربابة بالدفا اتلصمت محلا الغنا حتى إن كان الغنا مسروق أنا اللى مفتون بالوطن ماليش إلاه ليا الله الله أكبر بسم الله عاجز أقول ف حب السمرا كيف أشاء وأحط اسمى وسط اللى اسمهم عشاق كل اللى مات عايش ما دام عاشق كل اللى مش عاشق لازم له حياة أنا اللى ف أكتوبر بانام للعصر واصحى على صوت الأغانى لمصر لا شفت لمة أو حضرت نسور كنت عايش لسه ف الضباب مسجون مأسور فى ضهر الأب مستنى والعركة دايرة بس بره السور بنت الجيران وصلت ف ليلة العيد سماها أبوها ف السجل عبور أنا اللى ف أكتوبر باشم الورد وباتدفى مع لحافى بنسيم البرد وانام للعصر تتغير الدنيا ف غمضة عين وتفضل مصر فأصحى من النجمة ف إيدى ريموت مستنى غنوة تصحصح الوجدان مضبوطة إنتى يا قهوتى مضبوط محتاج أشوف الحلم بالألوان أنا الهتاف طلع لصوتى صوت لحد الثورة ما احتلت ف قلبى ميدان صاحى من النجمة وقلبى جعان بيرسم بالسؤال رسمة ف وش القصر أجازة؟ ليه؟ خلوك أجازة بس ليه يا يوم النصر؟
