تداولت وسائل الإعلام نقلا عن وكالة أنباء الشرق الأوسط والcnn , مساء أمس نبأ وفاة مبارك إثر إصابته بجلطة في المخ, وفي حالة من تضارب الأنباء تم نفي الخبر خلال دقائق معدودة, وأُعلن إصابته بأزمة قلبية ونقله إلى مستشفى المعادي بعد تدهور حالته الصحية بمستشفى طره.. وفور إعلان الخبر سواء بالتأكيد أو النفي تباينت التعليقات على الفيس بوك, مابين الشماتة والتجاهل والتزام الحياد أو الدعاء له أو السخرية من تكرار إشاعة وفاته .. ومن أبرز هذه التعليقات كتبت ياسمين: المحكمة الدستورية العليا تقضي ببطلان موت مبارك. في حين ربطت دينا خبر وفاته بفوز مرسي فقالت: هو مات لما لقى الناس تحتفل بمرسي, لو كان استنى ليوم الخميس وسمع إن شفيق فاز كان زمانه قام يجري. وعلق بدر : أحمدك يارب عندنا رئيسين للبلد وجنازة اللي قبلهم في يوم واحد وردت سها: يوم تاريخي في مصر ,الشعب كله فرحان,الإخوان والثوار فرحانين بفوز مرسي, والفلول فرحانين بفوز شفيق, واللي بيكره مبارك فرحان انه مات, واللي بيحبه فرحان انه حي..! وفاة مبارك إعلاميا ولان إعلان خبر وفاة المخلوع لم تكن المرة الأولى في وسائل الإعلام حيث تكررت أكثر من مرة منذ تنحيه, كتبت مانيفال " إلى الرئيس المخلوع حسني مبارك..أرجوك حدد موقفك من الوفاة، خد قرار فوري إحنا مش فاضيين ورانا انقلاب عسكري ودستوري ومليونية في التحرير عندها مطالب مش فاضيين للتهريج ده." وعلقت مروة: " مبارك مات أكتر من الواد بتاع أين أشيائي في فيلم لا تراجع ولا استسلام" وعلق حامد ساخرا: واحد بيقول لصاحبه مبارك مات ... قال له تاني ؟ حتى الموت مش بيشبع منه؟ وقالت رحاب: إحنا بقينا دايما كده بنشكك في الحقايق ... مبارك مات السنة دي ييجي تسع مرات وكل مرة بردو كان بيصحي تاني. وفي تويته كتبت نوارة نجم: مبارك رجع مات تاني? ربنا يطمنكوا أنا كنت قلقت عليه لما لقيته مش بيموت بقاله فترة، وكنت حاشيع اسأل عليه ده مش عشرة يوم ولا اثنين. لَم الشمل وبعد تصريحات فريد الديب, محامي المخلوع عن حالة مبارك في سجن طرة، وافتقار مستشفى طرة إلى التجهيزات اللازمة, ربط البعض بين التصريحات ونقله لمستشفى المعادي وبداية مسرحية الهروب من مصر أو الهروب من طره لمكان أفضل, فكتبت نادية: الشيء الوحيد المؤكد الليلة: "مبارك خرج من مستشفي سجن طرة بعد 17 يوم نجح فيها في لم شمله مع أولاده, والآن هو في المستشفي العسكري مع سوزان" وعلقت زينب: المعلومة اللي نطلع بها, أن مبارك في المعادي, يعني خرج من طرة. وكتبت سامية : طيب بما إن كل الناس بتفتي نظريات, لازم أدلي بدلوي أنا كمان: مبارك ماماتش وبيستعبطوا عشان ينقلوه من مستشفى السجن اللي كانت مضايقاه من غير تكييف. وتساءل محمد: هو يا ترى مبارك هيقضي بقية حياته بعد ما يموت فين ؟ شرم ولا السعودية فداك روحي يا ريس وعلى الجانب الآخر ومن أمام مستشفى المعادي حيث تجمع العديد من أبناء مبارك أمام المستشفى, علق احدهم قائلا : أنا جئت عشان مبارك والاطمئنان على صحته, فقد عشنا في ظل حكمه ثلاثين عاما في سلام وهدوء , أما نحن الآن فأصبحنا مستهدفين من أي دولة. وعلى صفحة "إحنا آسفين يا ريس" , الصفحة الأشهر لتأييد المخلوع, كتبت صفاء: يارب اشفيه وعافيه هو وكل مريض وارحم عبادك المسلمين وارحمنا من الشماته يارب. وعلق احمد, اللهم ارحم الرئيس وصبره, ده حسنى مبارك يا ناس وأضافت هبة" الله يشفيك يا ريس وياريتنى كنت مكانك ..فداك روحي يا ريس إشاعات العسكري ورغم كل هذه التعليقات والآراء, هناك من اتخذ موقف الحياد وربما التجاهل, واعتبار الخبر مجرد سلسلة من الإشاعات التي يتبناها العسكري لتدبير ما هو أعظم, فكتب احمد: خلينا في التحرير أحسن وفى رفض الإعلان الدستوري ... يسقط يسقط حكم العسكر. وعبر حسابه على تويتر كتب عبد الرحمن يوسف: اللي يقول لك مبارك مات ... قل له ده مش موضوعنا, كلمني عن الانقلاب الدستوري !!! وعلق احمد: كل ما المجلس العسكري يتزنق يقولك مبارك مات ... حرب استنزاف نفسية رهيبة, اثبت مكانك.
