مشكلة شديدة القسوة السلام عليكم ، مشكلتي بجد شديدة القسوة .. أنا كبرت يتيمة واتربيت في ملجأ مع أخواتي اللي زيي هناك صحيح اتعلمت كويس واشتغلت كمان بعد كدة مهنة كويسة جداً بالنسبة لي لكن ربنا ما يحكم على اي حد ، الخلاصة .. قابلت شاب في نفس الشغل بتاعي وحبينا بعض وعشان كان لايمكن أبدا حياتي معاه بكدبة كبيرة زي ما عمل غيري فضلت أني اصارحه بظروفي وقلت لو وافق يبقى كتر خيره .. ما وافقش يبقى ربنا مش كاتبهالي ، المهم .. اتجوزنا فعلا وقلت أخيرا الدنيا هتديني حاجة حلوة وعيشنا زي الفل وهوة كان بصراحة دايما كويس معايا .. إحنا بقالنا متجوزين 3 سنين وكان بيحصل بيننا خلافات زي كل الناس لكن بتعدي ونتصالح إنما من أسبوع حصل مشكلة كبيرة والموضوع كبر لدرجة انه في لحظة انفعال عايرني وقاللي كدة باللفظ ( يا خريجة الملاجئ ) .. أنا اندبحت بالكلمة دي اندبحت بجد بسبب حاجة أنا مليش ذنب فيها .. يبقى بعد ما أكون صريحة معاه يكون ده جزائي ؟! أنا دلوقتي مش عارفة اعمل إيه ومن كتر ما حزنت على نفسي ما قدرتش ارد على جوزي أصلا ولسة قاعدين مع بعض بس مش بكلمه خالص بقالي في حالة السكوت دي حوالي اسبوعين بعمل كل واجباتي المنزلية وبس وطول الليل بعيط عياط هيستيري .. هوة بيحاول يصالحني كتير جداً لدرجة انه مرة باس ايدي واعتذر بكلام اول مرة اسمعه منه لكن قلبي قفل جداً منه .. أنا هنت عليه يجرحني ويذلني بحاجة زي دي .. صدقوني تقيلة جداً على القلب وقاسية جداً اكتر من تصور اي حد لكن الحمد لله على كل حال ده نصيبي وربنا اكيد هيكافئني في الاخرة .. بس أنا مش عارفة أواجه مشكلتي دي .. مليش حد غير جوزي في الدنيا كلها بعد ربنا .. لكن هوة نفسه اللي جرحني وهانني .. مش عارفة أحل المشكلة اللي جوايا من ناحيته .. ياريت حد يقدر يساعدني .. عازز علية موقفي ده واني بكتب مشكلتي للناس لكن ما باليد حيلة .. شكرًا شكرًا شكرًا .. أسفة مش هقدر اكتب اسمي ولا حتى اول حرف زي ما الناس بتعمل . فضفضة محررة الصفحة .. نيفين حجازي لقد تم بيني وبين صاحبة المشكلة حوار طويل جداً على الميل الخاص بها .. وبسبب تبادل الكثير من الرسائل بيننا وجدت صعوبة في نشر تلك الردود وفضلت عرض نص المشكلة فقط لتشاركوها أزمتها حسب رغبتها ، عفوا .. أرجو من القراء لحساسية المشكلة ان يدققون في ردودهم فالمشكلة لها أبعادا كثيرة وشكرا للجميع .
