سعيدة جدا ومش مفروسة أوى لأن الأخبار كتيرة جدا، امبارح مثلا كان فيه خبرين حلوين جدا أول خبر أن فيه 470 نوع دواء كان الناس بتعانى من عدم توافرهم فى الأسواق أصبحوا متوفرين وباقى 110 اصناف إن شاء الله يتوفروا خلال ال 3 شهور الجايين. ده طبعا كان الخبر مع افتتاح رئيس الوزراء لمصانع دواء جديدة امس فى مدينة 6 أكتوبر. أما الخبر الأهم واللى على الفور صرح وزير الشباب والرياضة د.أشرف صبحى بأن إجراءات متابعة قرار السيد رئيس الجمهورية بدأت فى لحظتها، طبعا ده قرار الرئيس السيسى بمراجعة الاتحادات الرياضية ماليا وإداريا. ومراجعة بعثة مصر فى أولمبياد باريس وده قرار سيادة الرئيس اللى بدأ فى تنفيذه بلغة أهل المهنة فى ساعته وتاريخه. - .. كان فيه بقى على الجانب الآخر بعض الناس على السوشيال ميديا بدأوا ينشروا فيديوهات راقصة لشباب وينسبوها لبعض الشيوخ بس حصلت حاجة حلوة أوى وعجبتنى.. أى شخص يحط فيديو من دول تلاقى 5 او 6 دخلوا كتبوا له شيل أو احذف من فضلك الكلام ده تحديدا ظاهرة انا شايفاها كويسة. هل نقدر نقول إنه تدخل فى آراء بعض ولا المجتمع يقدر يصلح أخطاءه أنا شايفة أنه مش تدخل فى آراء بعض بقدر ما هو رفض للسلوك وانتشاره، وده معناه ان فيه وعى وهو المطلوب اثباته . - تصدير العقارات برنامج عمل مهم يجب أن تسعى الحكومة اليه، فأسعار العقارات المرتفعة مع ضعف سوق الشراء وتشبع السوق المصرى الى حد معقول، يجب ان يقابله حلول اخرى تبدأ بتصدير العقارات وبرامج حياة جديدة للمتقاعدين فى اوروبا الذين يبحثون عن جو دافئ للحياة فى هدوء بعد المعاش، وبالتأكيد هناك برامج أخرى يمكن التفكير فيها تساعد على بيع العقارات الخالية وايضا زيادة العملة الصعبة، قليل من الأفكار خارج الصندوق يحل المشكلة، هذه الافكار مثلا لم اخترعها ولا هى من بنات افكارى ولكنها مستخدمة وبقوة فى دول اخرى منها دبى مثلا ومحققة ارقاما كبيرة، تصدير العقار فى العالم حجمه يقترب من 200 مليار دولار، اين حصة مصر فى هذا المبلغ الكبير؟ - علينا السعى نحو اهداف حقيقية نجحت فى دول قريبة الشبه منا.