كنا نسمع عن مصطلح السبلايز فى مدارس الإنترناشيونال ونقول ماشى.. حاجة بتاعت الأغنياء وأكيد هما فاهمين المصطلح وعندهم القدرة على شراء مكونات السبلايز.. إنما العدوى تتنقل للمدارس الخاصة دى تبقى مصيبة جديدة.. اسمع يا سيدى مع اقتراب دخول المدارس بدأت مدارس الناشيونال والخاصة تطلب من أولياء الأمور الالتزام بقائمة السبلايز التى تضم مناديل ورق ومبللة وصابون ومطهرات وورق أبيضّ ومنظفات للفصول وأقلام وحاجات كتير المفروض أن المدارس التى تتحصل على مصروفات فلكية تقوم بتوفيرها للطالب.. هو إحنا بنطالب بجودة التعليم يعنى المواد العلمية التى يتم تدريسها للطالب مش بنطالب ازاى نحمل أولياء الأمور أعباء إضافية فى ظل ظروف اقتصادية صعبة.. ساندوتش البيض أو الجبنة بالنسبة للتلميذ مع علبة بسكوت وعصير أصبحت وجبة مكلفة ولكنها ضرورية.. يعنى المفروض المدارس الخاصة تراعى الظروف وبدل ما تفكر فى زيادة الأعباء على الأسرة تفكر ازاى تقدم حلولاً لتخفيف الأعباء.. السبلايز اختراع قديم جديد بمعنى إنه مطبق فى بعض المدارس منذ سنوات ولكن هذا العام الظاهرة انتشرت بصورة مرعبة وتقريباً شملت جميع المدارس الخاصة الناشيونال.. كم الاحتياجات المكتوبة فى القائمة كبيرة جداً.. يعنى مفيش حاجة اسمها علبة مناديل لا من 3 إلى 5 عبوات وده فى كل حاجة.. احنا مش ضد النظافة ولا النظام ولا تحديد المتعلقات الشخصية للطفل بس ما ينفعش الطالب يبقى دافع 50 ألف جنيه مثلا ويجيب احتياجات السبلايز ب5 آلاف جنيه.. الموضوع محتاج ضوابط علشان الناس مش ناقصة.. يعنى وزارة التربية والتعليم محتاجة تتابع الموضوع وتضع ضوابط حاكمة حتى لا نترك أولياء الأمور فريسة لأصحاب المدارس الخاصة.. دعونا ننتظر.. وتحيا مصر.