هاجم عدد من نجوم الفن والمشاهير، الفنانة حلا شيحة بعد تبرؤها من مشاهدها الرومانسية مع تامر حسني في كليب "بحبك"، من فيلم "مش أنا". وعلقت الفنانة منة فضالي عبر حسابها الشخصي بموقع التواصل الاجتماعي "فيسبوك"، قائلة: "مش تجريح بس مينفعش قبل الجواز كلام، وبعد الانفصال كلام، وجواز تاني كلام ونجرح في الزملاء، اللي ملهومش ذنب، هو حد ضربها على إيديها، تصور المشاهد دي، وبعدين ترجع تقول كلام تاني". وهاجم محمد العدل حلا شيحة: "لما تطلقى مترجعيش تقولي عايزة أمثل تانى". وتابعت: "يعني حضرتك مش عارفة نفسك أصلًا، مافيش مشكلة بس مش هتنصحي الناس وتنظري كمان، على حسب وجهة نظر اللي حضرتك قررتي تتجوزيه المره دي.. اللي أظن أن جوز حضرتك نفسه لو كان شايف أن الفن أو نوع الفن ده حرام ماكنش شارك فيه بأي صفة". وقال الفنان خالد سرحان : "اللي ميحترمش الفن يرجع الفلوس والفلل اللي كسبها من الفن وساعتها هصدقه". وهاجم المطرب أحمد الشامي، الفنانة حلا شيحة، بعد تبرأها من مشاهدها الرومانسية مع الفنان تامر حسني، في كليب "بحبك" لفيلم "مش أنا". وكتب الشامي تغريدة عبر حسابه الشخصي بموقع التغريدات القصيرة "تويتر": "والله أنا مبسوط من كل الردود أن الناس فاهمة، أن كل ده أكل عيش، وأن لو الشهرة فتنة وهي مقتنعة كانت هي بنفسها قفلت كل السوشيال ميديا، ووقفت كلام مع صحافة". وهاجمت الفنانة راندا البحيري تصريحات حلا شيحة، بعد تبرأها من مشاهدها الرومانسية مع الفنان تامر حسني في كليب "بحبك"، مشيرةً إلى أن هذه التصريحات من الممكن أن تعرضها للمسائلة القانونية. وكتبت رندا منشورًا، عبر حسابها الشخصي بموقع التواصل الاجتماعي "فيس بوك"، قائلة:"هو محدش فهمها أن اللي بتعمله ده ممكن يعرضها للمساءلة القانونية، وأنها بتضر بسمعة فيلم وبالتالي إيراداته؟". وتابعت: "بتتكلم عن ممثل ونجم بحجم تامر حسني بالشكل ده أكنها أحسن منه، وإحنا كلنا عارفين الخير اللي بيعمله تامر طول عمره، في الخفاء وفي العلن على إيدينا كلنا، فضله على ناس كتير أوي، وربنا جعله سبب لفتح بيوت قد كده، وهي تنصحه، لا والله هم يضحك". من جانبه وصف الفنان تامر حسني، إنه فوجئ بهذه التصريحات، وأنه يكن لحلا كل الاحترام والتقدير، وأنه لم يكذب عليها في شيء، وسيكشف الحقيقة كاملة بكل التفاصيل، لأن ما حدث ليس له علاقة بالحقيقة". وكتب تامر حسني عبر حسابه الرسمي بموقع "تويتر": "الحقيقة عمري ما بتخيل إني أدخل في نقاش بالشكل ده مع زميل بحترمه وكان بينا كل خير، للتوضيح بما إنك يا حلا كتبتِ بوست وأشركتِ الجمهور الكريم معانا، بدال ما كنتِ تكلميني شخصيًا ونتناقش بيني وبينك، فأنا مضطر أرد هنا برضو... أولاً أنا عمري ما وعدتك إن الكليب مش هينزل ده محصلش أصلاً يا حلا مش أنا خالص اللي أوعد وأخلف، الحقيقة إني احترمت كلامي معاكِ ووعدتك أشيل مشاهد تانية طلبتيها، وشلتها بالفعل، وشكرتيني عليها، ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف، أو كلميه يبعتهالك كلها موجودة". وأضاف تامر حسني: "وبعدين الفيلم بقاله 3 اسابيع في السينمات والكليب موجود جوه الفيلم هو بالنسبالك الحرام إننا ننزل الكليب على اليوتيوب بس، إنما الكليب يتشاف جوه السينمات عادي؟؟؟؟، منطق غريب فعلاً يا حلا... وبعدين هو مش أنتِ اللي مضيتِ عقد وتقاضيتِ عليه مبلغًا كبيرًا عشان الدور دا بعينه، هو مش إنتِ اللي صورتيه ومثلتيه بنفسك وبمنتهى الرضا ولاّ حد أجبرك، وللتوضيح للجمهور الكريم أنا والمخرجة الأستاذة سارة وفيق بعتنالك، وكنا بنتحايل عليكِ تيجي تشوفي شغلك قبل إصدار الفيلم عشان لو عندك أي ملحوظه تقوليها". وتابع : "ما كنتيش بتردي علينا وتليفوناتك كلها كانت بتقفل في وشنا، إنتِ للأسف يا حلا متعاملتيش صح مع الموقف كان لازم تهتمي بأمرك أكتر من كده ولو كان ليكِ أي طلب تاني كنتِ هعمله بكل حب، إنما أنتِ فجأة اختفيتي ومكملتيش تركيب صوتك في الفيلم، ولا جيتي تتصوري عشان أفيش الفيلم أصلًا ومخليتيناش نعرف نعمل أفيش مجمع... بقيتي تقفلي تليفوناتك وتكنسلي علينا كلنا وبعدين أي فيلم بيبقى ليه خطة مسبقة في الدعاية، وأنتِ عارفاها كويس، ووافقتِ عليها وده كليب رومانسي يعني معقول كنتِ عايزه المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي ده للأستاذ ماجد الكدواني مثلاً هو دا يُعقل؟". واختتم حديثه قائلا: "أنا زعلان منك جدًا يا حلا على مفردات البوست بتاعك غير الموفقة ومستحيل هرد بطريقتك اللي فيها تجريح واتهامات باطلة ليا احترامًا لحاجات كتير يمكن فايتاكِ بس مش هتفوتني، وعلى فكرة أنا واثق إنك عارفة إني مستاهلش منك كده وهكتفي بالتوضيح دا وربنا يهدي الجميع ويكتبلك كل الخير اللهم آمين". وكانت كتبت حلا منشورًا، عبر حسابها الرسمي بموقع تبادل الصور والفيديوهات "انستجرام"، قائلة: ""أنا اتفاجئت جدا بنزول كليب يجمع فيه مشاهد متفرقة من الفيلم وفي أيام ذي الحجة، أيام مباركة وخصوصًا بعد آخر بوست نزلته ووضحت فيه أنا إيه، واتفاجأت أكتر خصوصًا بعد وعد تامر حسني ليا وتأكيده إنه هيحترم رغبتي، وبعض الطلبات اللي طلبتها منه بكل احترام وود الصيف اللي فات، وأكدلي إنه هيحترم رغبتي". وتابعت: "إحنا يمكن نجحنا بمقايس الدنيا بس صدقوني بمقايس ربنا إحنا لم ولن ننجح، أنا عارفة ومتأكدة إن زملائي جواهم خير، بس للأسف فتنة الشهرة والنجاح مش بتخلينا نشوف ونقيس الأمور صح، بتكلم من قلبي، الكليب ده ميرضيش ربنا، وأنا عيطت لإني شفت نفسي في المشاهد دي، دي كانت زلة نتيجة ظروف مريت بيها وكلنا بنغلط ولازم نغلط، علشان إحنا بشر بس المصيبة إننا بنغفل وبننسى".
