في كل بلاد الدنيا.. بعدما يتم الاطاحة.. بنظام ورئيسه.. فهناك نظامان يتم الأخذ بهما.. إما أن تجري للأخ نظام محاكمة سياسية.. عن كل الجرايم اللي عملها.. واللي قامت الثورة واندعك الشعب بسببها.. أو.. وده النظام الثاني.. يمنح الأخ نظام.. عفو عن بلاويه وافعاله السوده.. بشرط.. ان »الأمور« يقعد كده ويعترف علنا.. بتفاصيل التفاصيل.. عن كل جريمة .. شاف الشعب انه ارتكبها في حقه..، وعليه ان يقول »الجريمة« باسماء من شاركوا فيها.. وده حيكون سهل لانهم غالبا مش »حيزيدوا« عن اسماء الأسرة الكريمة ، ولو »كان« رئيس جدع شوية.. يمكن يعترف كمان عن جرايم ماعملهاش »هوهّ« بس اتعملت من ورا ضهره.. وهو »موطي بيشيل الانبوبة« ولكن علشان احنا »شعب« طيب ونظره علي قده.. ونفسه قصير.. ومالوش طقطان علي سماع اعترافات الأخ نظام بتاعنا.. لاننا في الحالة دي حنحتاج.. نسمع اقله 01 سنين.. وعلشان كده.. اخترعنا نظام ثالث.. لا علاقة له بأي حاجة.. »نقينا«.. ايوه.. »نقينا«.. للأخ نظام.. قضيتين محندقين كده.. يتحاكم عليهم، واحتمال البراءة منهم وارد.. وبكده نكون مازعلناش حد.. ووفقنا الراسين في الحلال.. الشعب.. أنبسط.. انه شاف الأخ نظام في »القفص« وبيتحاكم واصبح سوابق ومحدش حيرضي »يجوزه« بنته.. وفي نفس الوقت الأخ نظام »هوه كمان« انبسط.. ولعب في مناخيره.. مرة واتنين لأنه عارف ان التهم الموجهة إليه.. كلام فارغ.. وسهل ان يطلع منها.. وساعتها حيلعب في مناخير الشعب كله.. مشيها مناخير.. وتعالي شوف.. الأخ نظام متهم بأيه.. ياسيدي قال متهمينه.. انه اخد شقة.. يا سيدي متزعلش.. فيلا.. بأقل من سعرها.. تخيل كل اللي عمله النظام في غالبية الشعب.. أو اللي سابه يتعمل فيه وتقدر هنا تفتح قوس لاخر الصفحة وترص.. نقوم ما نلاقيش في »الكولكشن« ده كله الا تهمة هايفة.. ممكن أقل سمسار.. شقق.. بشمسية في شرم الشيخ يطلعه منها براءة.. لو قال ان فيلا الاخ نظام كانت علي المحارة ورخصتها اسكان اقتصادي.. حتقول لي.. بس.. ده متهم.. بانه قتل الثوار.. آه.. يديك طولة العمر والبال.. دي تهمة عاملة زي فيلم »علي بابا« بالظبط.. لما الحرامية.. دخلوا المغارة، وسمعوا »عطسي«.. رئيس العصابة سأل اللي جانبه انت اللي عطست.. مش انا يا معلم.. واللي بعده سأل اللي بعده.. وخدوا نص الفيلم لغاية ما صلوا للي عطس.. اللي هو في الحالة بتاعتنا أكيد.. أكيد.. هيطلع »عسكري« درجة ثالثة كان عصبي شويتين »خد« قرار ضرب النار علي الثوار بدون الرجوع لقياداته.. بس هيروح فين حنجيبه.. حنجيبه.. صحيح ليه الناس لاموني في حبك يا ستاموني. بعد محاكمة مبارك.. تم تغيير اسم فيلم أنف وثلاث عيون إلي »أنف« وثلاث صوابع.