بصراحة.. أنا مش فاهم.. موظفين إيه دول.. اللي عاوزين الحكومة ترفع لهم الحد الأدني لمرتباتهم.. هي الحكاية افتراء ولا استعباط.. أصل ليه المرتبات بتاعتنا تزيد.. هوه احنا أساساً قادرين نصرف المرتبات اللي بناخدها.. يا أخي ده الموظف مننا.. بيقعد يومين بلياليهم يعد في مرتبه بعد ما يقبضه..، وفيه مننا بيقعدوا يفكوا في »أساتك« الرزم أسبوع.. ده فيه مرة موظف.. زهق لما لقي مرتبه فيه ورق بنكنوت كتير.. فراح حطه علي »سيديه«.. تصدق بإيه.. مش حتصدق ده كل موظف في البلد دي.. بيأجر له أول الشهر »عربية« نص نقل.. علشان تشيل له »الزكايب« اللي فيها مرتبه، وبيبقي »ضهره« حيتقسم وهوه شايل المرتب وطالع بيه سلم »بيتهم«.. طيب تخيل بقي.. لما مرتب بياخد منك.. المدة دي علشان »تعده«، وبتأجر له عربية علشان تشيله.. ده ممكن ياخد منك وقت أد إيه علشان تصرفه..، وبعد ده كله يقول لك عاوزين زيادة.. فعلاً ده استهبال وافترا.. يا راجل.. ده الواحد مننا.. زهق.. من انه مابقاش لاقي حاجة جديدة يصرف فيها مرتبه.. ماخلاص كل موظف.. اشتري.. بدل العربية اتنين وتلاتة واربعة، وبدل الشقة.. فيلتين وبدل »الشاليه«.. خد له جزيرة في وسط البحر.. طب اقول لك علي حاجة.. عارف الموظفين بيزوغوا من أشغالهم ليه.. لأن الوقت اللي مخصصينه للشراء مابقاش مكفي، ولا مقضي.. فاضطروا »يزوغوا« السنة كلها يمكن يقدروا يصرفوا مرتباتهم..، ولعلمك.. البلد مش ملاحقة علي الحكاية دي كل يوم »تفتح« في مولات وهايبرات وسنترات وبرضه مش نافع.. العالم مش عارفة تودي فلوسها فين.. طب تعرف.. ليه »الفول والطعمية« غليوا.. علشان الموظفين زهقوا من اكل اللحمة والفراخ والاستاكوز. يا راجل.. ده أنا أعرف موظف.. كان »طهقان « شويتين.. سافر 4 شهور بره مصر هوه وعياله، واتفسح وانبسط واشتري وصرف..، وبعد ما رجع بيضرب إيده في جيب البنطلون لقي فيه »نص« مرتبه »بحالته«.. الراجل من ساعتها في مستشفي المجانين.. الله يكون في عونه»!!«