رجال الاعمال اللي بخلوا علي البلد كان لازم يفتكروا لما عربيتهم المحملة بالبضائع كانت بتتسرق وكانوا بيدفعوا للبلطجية فلوس كتير علشان يستردوها ايام الانفلات الامني بعد ثورة يناي والله ما هيبني البلد دي ويعمرها بجد غير الناس الطيبين المخلصين اللي بيصحوا الصبح بدري يتشعبطوا في المواصلات علشان يروحوا شغلهم وآخر اليوم وهما راجعين بيحمدوا ربنا رغم ان ظروفهم صعبة جدا ويمكن بيكملوا عشاهم نوم.. عارفين الناس دي بتعمل كده ليه.. علشان هما مصدقين بجد ان البلد دي لو ضاعت مننا مش هنلاقي بلد تاني ولا هنلاقي حتي خيام لاجئين بعد ان تكدست في كل بلدان العالم من اهالينا السوريين وقبلهم العراقيين والليبيين.. انا زعلان علشان الرئيس السيسي راهن علي رجال الاعمال لما اطلق فكرة صندوق تحيا مصر ومع الأسف خذلوه.. وكان نفسي من الاول يطلب من الشعب الغلبان ان هو اللي يجمع ال100 مليار جنيه علشان نساعد مصر في ازمتها لأننا بقينا بنتكسف بجد من طلب المساعدات.. رجال الاعمال اللي بخلوا علي البلد كان لازم يفتكروا لما عربيتهم المحملة بالبضائع كانت بتتسرق وكانوا بيدفعوا للبلطجية فلوس كتير علشان يستردوها ايام الانفلات الامني بعد ثورة يناير ولازم يفتكروا لما كانوا بيشتغلوا بنصف طاقتهم علشان مش قادرين يوزعوا الانتاج وكمان لما العمال كانوا كل يوم يحتجزوا اصحاب المصانع علشان المطالَب الفئوية.. هما تقريبا مش عارفين قيمة وثمن الأمن والامان اللي هما عايشين فيه دلوقتي لأنهم تقريبا عودانهم ياخدوا من البلد دي وبس.. فاكرين الحاجة زينب اللي اتبرعت بحلقها علشان خاطر مصر.. هو ده الفرق بين رجل الاعمال الهباش والمواطن الغلبان اللي بيحب بلده بجد..بالمناسبة دعوة الرئيس السيسي للصباح علي مصر بجنيه دعوة محترمة من راجل محترم بيحب بلده بجد وعارف قيمة الجنيه وعارف ممكن يعمل بيه ايه.. تعالوا نحسبها كده.. واه يعني لو دفعنا جنيه كل يوم لمصر.. ده ثمن سيجارة.. انا شايف الجهلة والخونة والسفلة اللي عاوزين يتفهوا المبادرة اصيبوا بإحباط لما وصل حجم التبرعات إلي مليون جنيه في اليوم وهيزيد ان شاء الله.. عارفين ليه.. لان الراجل من الفلوس اللي لمها من القليل من رجال الاعمال الوطنيين دفع منهم للإسكان الاجتماعي ولمرضي فيروس سي ومحطات الصرف والمياه في المحافظات يعني لو اي حد بص للموضوع بتركيز شوية هيكتشف انه بيحط فلوس في صدقة جارية لان الهدف من المساهمة هو تخفيف الاعباء عن الناس الغلابة المحتاجين بجد.. وبعدين فيها ايه لو نصبح ونمسي علي مصر اللي الخير اللي احنا عايشن فيه كان منها.. مصر دي البلد اللي بنعرف نعيش فيها باي فلوس وبنحس فيها بالامان مهما كانت الظروف واللي العالم كله تآمر عليها وبفضل ولادها صمدت ووقفت ورفضت الركوع.. ما احنا طول النهار بنتكلم في المحمول ونبعت رسائل هايفة ونتتريق علي بعض يعني مش هنموت لو دفعنا كل يوم الصبح جنيه وكمان في الليل نفسي نعمل كده جدعنه علشان غيرنا يلاقي مكان كويس يعيش فيه هو وولاده ويلاقي كوباية مياه نظيفة ومستشفي ومدرسة.. حد يقول يعني هو الجنيه بتاعي هيعمل ده أقوله ايوه جنيه منك وجنيه مني ومن غيرنا نقدر والله بس احنا نبدأ.. وكمان الناس اللي مش عجبها المبادرة ومش عاوزه تصبح عاوز أقول لهم ان مصر مش عاوزه صباحهم أصلا بس من فضلكم خلوا عندكم شويه دم ولو مش عاوزين تشاركوا في البناء بلاش تهدموا يعني الراجل المحترم اللي بيطلع الفجر يرمي الزبالة في وسط الشارع وعامل فيها بيه بقوله عيب.. واللي بيركب اتوبيس ويشخبط فيه بقوله بردو عيب وغيره وغيره من حركات الغل والحقد والسواد.. السيسي راهن علي الشعب وهيكسب زي ما الشعب راهن علي السيسي وكسب.. المشكلة مش في الجنيه المشكلة ان احنا في أزمة حقيقية بجد وان البلد لسه في خطر والعدو كل ما بيحس ان احنا ممكن نعبر مرحلة الخطر يفتعل اي حاجة وشوية الاعلاميين المرتزقة اللي ما يعرفوش للوطنية طريق زي الأهبل والاسود والجاهل والحقود وغيرهم طبعا من اللي الشعب كله عارفهم يطلعوا علي الناس الغلابة ويروحوا لفكر الخونة وكان مصر دي عدوتهم.. عجبني خطاب الرئيس السيسي لان كل رسالة قلها وصلت لصاحبها بالتمام.. وكمان الراجل مصمم أنه يكمل المشوار ويحقق كل الأهداف علشان كده هتلاقي ال30 مليون اللي نزلوا في 30 يونيو هيكونوا اول ناس بتصبح وتمسي علي مصر علشان خاطرها وعلشان خاطر عيون الراجل الوطني المخلص المحترم عبد الفتاح السيسي.. وصباح الخير يا مصر.
