اللهم اجعله خيرا.. ثلاثة أيام حتي الآن منذ يوم الجمعة الماضي ولم يحدث أي انقطاع للتيار الكهربائي.. معقول؟ يارب يكون المانع خيرا يا وزير الكهرباء . هل حليتوا مشاكل الكهرباء بعد الشر؟ الحقيقة أنا خايفة أفرح الفرحة ما تكملش ونرجع للضلمة تاني اللي فضحتنا في العالم كله واحنا في السنة ال31 من الألفية الثالثة، عموما نورك يا وزير الكهرباء يكفي وزيادة .. أنا بس عايزة أفكّرك بوعد كنت قد قطعته علي نفسك علانية وعقب توليك الوزارة بأنك لن تسمح بقطع التيار الكهربائي في مصر، وبأن مصر لن تعود إلي نظام المناوبة من جديد، ذلك النظام الأغبر الذي كانت فيه الكهرباء توزع بالحصص بين المدن والقري علي مستوي الجمهورية وكان كل مواطن مصري نصيبه اليومي من الكهرباء ومن قطع الكهرباء يعني من النور و الضلمة.. حصل ده ولاّ ماحصلش؟ طيب حافكّرك بحاجة تانية يا باشمهندس.. مش انت برضه كنت وعدتنا إن الوزارة لو اضطرت لقطع الكهرباء عن الناس حتبعت لهم رسائل قصيرة علي المحمول مسبقا بالمواعيد عشان يعملوا حسابهم ويكونوا مستعدين زي أي دولة متحضرة تحترم شعبها ؟ طيب ليه بقي ما نفذتش وعودك خلال الأيام الغبراء الماضية التي قضيناها في العتمة؟.. يالّلا هوه مين يعني في البلد دي بيوعد ويوفي بوعده ، أنا بس خايفة عليك من دعا الناس .. كام واحد كان قايم بالليل والنور مقطوع ورجله اتخبطت في حاجة ورفع إيده يدعي عاللي قطع النور؟ يا راجل ده لمّا النور كان بيقطع كانت كل الناس بترفع إيديها بالدعاء في لحظة واحدة وكأنهم في يوم عرفة.. وبدل ما يلعنوا الظلام بقوا يلعنوا اللي كان السبب في هذا الظلام.. عموما احنا عارفين إن الكلام والشكوي مش حيفيدوا بحاجة ، إنما حنحاول نستفيد من قطع النور لو حصل تاني زي ما مشايخنا نصحونا في التليفزيون.. أتاري قطع النور ده يا جدع له فوائد عديدة، فجلوس جميع أفراد الأسرة في حجرة واحدة يقوّي أواصر المحبة بينهم، ويذكرهم بظلمة القبر، ويجعلهم يتذكرون أخوانهم الفقراء، وكمان سوف يريحهم من الضجيج الإعلامي، وسيدفعهم للنوم مبكرا حتي لو كانوا طلبة في امتحانات فمش مهم ده خالص لأن اللي ذاكر ذاكر خلاص.. همّ حييجوا دلوقت واحنا في الأيام الأخيرة وعايزين يذاكروا؟ ولكي نكون أمناء ونحن نعرض المشكلة فنحن نعلم تماما يا سيادة الوزير إنك قد توليت الوزارة والمشاكل فيها متلتلة علي رأسها عدم كفاية انتاج الكهرباء علي المستوي المحلي، ولكن هذه المشاكل ليست مسئولية الشعب ولكن مسئولية الحكومة التي يجب أن يكون لها رؤية وخطة ودور ملموس لحل المشاكل.. أمّال يعني إيه حكومة؟ بس برضه أمانة عليك يا شيخ تعمل لك شوية همة تمنع بيها قطع الكهرباء ولو لفترة الامتحانات ورمضان بس وبعدها يا سيدي إبقي اقلبها لنا ضلمة.