منذ بداية عملي وأنا دائما أعامل طلابي من منطلق نفسي فأستطيع أن أكسب ثقتهم فأكون منبع أسرارهم ومرجع مشكلاتهم والمستشار الذي يشير عليهم بما هو صالح ومفيد ولكني مع الأسف الشديد وقفت أمام رسالة طالبة جاءتني علي صفحتي علي الفيس بوك ولأول مرة أشعر بالعجز بل ويقشعر بدني وأنا اقرأ سطور هذه الرسالة وأنا أعرضها علي الجميع ومن يري لها ردا فليأتني به لأسترد ثقة تلميذتي أنا أعرضها عليكم بلغتها حتي لو لم تسعفها الفصحي أو خانتها الصحة اللغوية فالحرقة والغصة التي تملؤها أنستها كل قواعد اللغة ولن أعدل شيئا فيما كتبت وفي انتظار ردكم. كتبت تلميذتي بعد امتحان الثانوية العامة: ليست مشكلة أن امتحان اللغة العربية للثانوية العامة تسرب وأن صديقاتي كان معاهم نموذج إجابة من بليل ولا إن جارتنا ال ابنها بيجيب ملحق عادة بتشتكي لأمي انها سهرت مع ابنها طول الليل تحفظه الإجابة.. ولا المشكلة إن في واحد أخد ورقة الإجابة بتاعته وهرب من المدرسة.. ولا المشكلة إن أسئلة الفيزياء وإجابتها بتناقض الكتاب المدرسي.. ولا المشكلة إن امتحان الديناميكا ال انا مقفلاه يعيدوه من تاني.. المشكلة أننا خلاص بقينا مصدقين أن الدرجة بتفرق وأن التعليم شيء أساسي في بلد ما فيهاش تعليم وإلا فمن يجيبني عن هذه التساؤلات؟ يعني إيه مقفل كمبيوتر ومش عارف حتي تسطب نسخة للجهاز بتاعك.. يعني إيه مقفل فلسفة وأنت فاشل في الحوار مع الناس.. يعني إيه مقفل علم نفس وأنت مش عارف إيه ال مضايقك ولا فاهم الناس.. يعني إيه مقفل عربي وأنت أصلا فاشل إملاء وماتعرفش تنطق كلمتين فصحي صح!.. يعني إيه مقفل إنجليزي ولما تيجي تشتغل لازم تكون واخد كورسات عشان الإنجليزي بتاع المدرسة ده ما يأكلش عيش.. يعني إيه تقفل دين وأنت مبتركعهاش وماشي مع9 بنات والكذب والسب علي لسانك24 ساعة. يعني إيه مقفل جغرافيا وأنت هتستفيد إيه لما تعرف أن العراق فيها33 مليون نخلة وأن استراليا عدد الخرفان فيها أكثر من سكانها بأضعاف.. استفدت ايه من كل ما درسته لغاية دلوقتي في مصر؟ تفتكر الشغل اللي هتشتغله لما تكبر سيكون له علاقة بأي حاجة درستها اسأل أي واحد متوظف في أي وظيفة جديدة إيه أول كلمة سمعها هايقولك قالولي انسي بقي كل اللي انت درسته واللي تعرفه عن الشغل ده وبدأوا يعلموه. ده لو اشتغلت بالشهادة اللي انت اتخرجت بيها أصلا, ماهو انت عشان تشتغل مطلوب خبرة عشر سنين طب تجيب الخبرة ازاي وهم مش عايزين يشغلوك.. بلد الشهادة فيها مجرد ورقة في برواز علي الحيطة عشان بابا وماما يتباهوا بيها لما ييجي ضيوف. أو تتجوز بيها لو كنت شاب دا لو أصلا عرفت طريق الجواز منين.. علامات استعجاب كتير حول التعليم!!! دلوقتي مصلحة أي طالب النجاح وبس مع أن فيه شوية طلاب دماغهم فذة بس ما فيش حد بيسمع لهم لازم واسطة طيب أجيب واسطة منين ما عييش غير ربنا.. وربنا يصلح حال البلد دي من كل ضرر ليها. انتهت رسالتها.. عذرا بنيتي هزتني كلماتك العفوية واعترف بأنني قد عجزت عن الرد وقد تكون هذه هي المرة الأولي التي أخذلك فيها لأنه نظام مجتمع أخرج هذه المتناقضات وأملنا في الله أولا وأخيرا.