وجه عصام سلطان، نائب رئيس حزب الوسط، لومه للدكتور عبد المنعم عبد الفتوح، رئيس حزب مصر القوية، قائلا: "صدمة الناس فيك كبيرة"، ودعاه إلى أن ينضم إلى اعتصام رابعة العدوية لدعم البسطاء الذين يدافعون عن أصواتهم. وقال سلطان في رسالته التي كتبها عبر صفحتة الشخصيه على "فيسبوك" اليوم الخميس: "أخي الدكتور عبد المنعم أبو الفتوح، بلاش الحنية الزيادة وأنت بتتكلم عن الخائن القاتل المنقلب، وتذكر القسوة والكره لدرجة العمى حين كنت تتكلم عن المنتخب". وأضاف: "أخى الدكتور عبد المنعم، صدمة الناس فيك كبيرة، هرولت إلى الطرطور بمجرد إشارة، وتمنعت عن المنتخب لمرارة فى نفسك لم تستطع التغلب عليها. أخى الدكتور عمرك ما كنت أبدا بتاع لف ودوران، وكلام فى كلام، ومسك العصاية من النص، وتصفية حسابات شخصية بحتة، وسكوت على حق واضح، وطناش على باطل أوضح". واستطرد قائلا: "أخي.. تعال إلى رابعة العدوية، لدعم البسطاء الذين يدافعون عن أصواتهم فى أكثر من عشر جولات انتخابية خلال عامين.. بلاش حكاية الأصوات.. طب تعالى لدعمنا ضد الانقلاب زى ما دعمناك فى الانتخابات.. هى مش السياسة بردو خد وهات، مصالح يعنى؟ وإلا إنت نظامك وان واى؟". وأضاف: "بصراحة أنا مشفق عليك، لا يحطك التاريخ جنب البرادعى وشفيق وبكرى وعكاشة وإلهام ودحلان وبهلوان، خليك مع الغلابة تكسب، وشيل الإخوان ومكتب الإرشاد والشاطر والارتكاريا من دماغك". "والله العظيم 80٪ من اللى هنا مهومش إخوان! دا إحنا معانا ليبراليين ويساريين وناصريين، مسلمين ومسيحيين، متدينين ومش متدينين، وفى ناس مابتصليش خالص وما بتصومش وهما أحرار، ومحدش له دعوة بحد، الاحترام المتبادل يسود الكل، وضد الانقلاب، وبس". وأضاف: "اعتبرنى باتكلم بالنيابة عن أصحابك وأصدقائك وإخوانك وأحبابك إللى زعلانين منك أوى ومش راضيين يكلموك من كتر الزعل، واللى كانوا واقفين معاك فى جولة الانتخابات الاولى، ضد الكل بمن فيهم مرسى، يعنى مش إخوان ولا حاجة". "أسهل حاجة كنا فى الوسط عملنا زيك بالضبط، واتلككنا بخلافنا المعروف مع الاخوان، بس كنا هندوس على مبادئ كتييييير أوى.. ومكناش هنعرف ننام بالليل من تأنيب الضمير، يارب نشوفك زى ما كنت زمان، واقف مع الحق من غير حسابات و لا توازنات، أنت بتفكر فى إيه؟ هو أنت وحمدين صباحى فاكرين إن السيسى هيعمل انتخابات رئاسية وهترشحوا نفسكوا مرة تانية؟ اصحى ياراجل ياطيب اصحى يا نايم وحد الدايم.
