أكد الفريق أول عبدالفتاح السيسي، القائد العام للقوات المسلحة وزير الدفاع، أن الجيش لا يؤمر إلا بإرادة وأوامر المصريين، فقط. وقال: هو أنتم فاكرين إن خير أجناد الأرض جاية من فراغ ولا إيه.. دي علاقة خاصة جدا بين شعب مصر وجيشة ولا تنفصل. وتابع السيسي: لكن لما أشوف ويتقال من شهور إن في (هناك) زي عسكري في الشارع وسلاح بيتهرب من دول كتير وبعدين يتقال إن جزء من الجيش المصري انفصل يعني دي مؤامرة.. إن الفترة الي جاية يتقال الجيش بيحارب بعضه والله العظيم والله العظيم والله العظيم الجيش المصري علي قلب رجل واحد. وأوضح: الكلام دا خطير جدا والجيش المصري مش زي أي جيش تاني وما ينفعش الكلام دا يتعمل معانا.. نقعد نتكلم ونشحن بأنه جهاد في سبيل الله ونخلط الأوراق ومش عاوزين أبدا نقف وننظر إلي موقع أقدامنا وإحنا لازم نقف ونفكر.. يعني أنت مستعد يا تهد البلد يا تحكمها.. فهل يعقل هذا؟. يعني يا تدمر جيشك يا ييجي معاك... وهذا أمر في غاية الخطورة. وشدد السيسي : نحن ليس لنا خيار إلا برضا المصريين. لكن أن يتصور أحد أنه يمكن بالعنف والأرهاب فلن يحدث. وتابع: أقول لكم ولكل المصريين حتي ننتبه وأقوله أيضا للجيش والشرطة والقوي السياسية حتي ينتبهوا والأزهر والكنيسة حتي يقوما بدورهما واحنا مش هنستني لما تحصل مشكلة كبيرة ونرجع نقول ليه حصل كده.. وأنا شايف إن في حد عاوز يزق البلد لنفق مظلم. وأضاف: خريطة الطريق اللي طرحناها لا يظن أحد أنه يمكن التراجع عنها لحظة.. وقلنا لكل اللي جاءوا إلينا إننا مستعدون لانتخابات يشرف عليها العالم كله، لأننا نريد انتخابات يشهد لها العالم أجمع.