مستخدمو مواقع التواصل: جارى تجهيز "السفارة فى العمارة" لعرضه فى قضية الغاز

أثار عرض مقطع من فيلم "الباشا تلميذ" ضمن شرائط الفيديو المصورة لأحراز قضية قتل المتظاهرين، المتهم فيها الرئيس المخلوع حسنى مبارك ووزير داخليته حبيب العادلى وستة من كبار مساعديه أثناء جلسة محاكمتهم أمس، موجة سخرية وتهكم، بين مستخدمى موقعى التواصل الاجتماعى تويتر وفيسبوك، حيث وجهوا انتقادات لما اعتبروه سوء إدارة للمحاكمة واستخفاف بعقول الشعب وإهمال لأحراز قضية مهمة مثل تلك القضية.
وانطلقت تعليقاتهم الساخرة حول عرض الفيلم معتبرين أن ما حدث وإن كان خطأ غير مقصود، فهو يدل على استخفاف بالشعب المصرى وبأهمية القضية التى من الممكن أن يفسدها الإهمال، فضلا عن بروز عدد كبير من الأخطاء والسقطات التى جعلت شكل المحاكمة غير حضارى منذ بدأت، متذكرين مشهد فض الأحراز بمطواة وتصارع محامو المدعين بالحق المدنى على الشهرة دون اعتبار لحق من يدافعون عنهم، ووضع الأحراز فى كراتين مياة معدنية، وختاما عرض فيلم "الباشا تلميذ "ضمن أحراز القضية، ومن تعليقاتهم:
- الباشا تلميذ ضمن أحراز القضية يبقى أكيد بقى حسن حسنى، أحد المتورطين فى قتل المتظاهرين.. إيه العك ده منظرنا بقى زفت قدام دول العالم، قال وبيقولك محاكمة القرن قال دى لو كانت ماتش كورة كانت خرجت أحسن من كدة.
- الباشا تلميذ فى محاكمة مبارك.. نحن نختلف عن الآخرين.. محاكمات مصرى أُم الأجنبي.
- بعد عرض فيلم الباشا تلميذ داخل قاعه المحكمة.. جارى تجهيز السفارة فى العماره لعرضه فى قضيه الغاز... والله الموفق.
- لما يفتحوا الأحراز فى المحكمة ويلاقوا فيلم الباشا تلميذ متصور يبقى أنت أكيد أكيد أكيد فى مصر.
- فيلم مع أحراز قضية مهمة وخطيرة زى دى.. إيه الإهمال ده واضح إنهم بيستخفوا بعقول الشعب ومستهونين بغضبه، ومش بعيد القضية تنزل على مفيش ماهى الأحراز كلها هتقلب أفلام بقى.
- حوار لقطات فيلم "الباشا تلميذ" اللى كانت فى شرايط المخابرات فى قضيه مبارك. عشان ظباط الشرطة كان بيتقالهم باشا, هتلاعبنى بالأفلام هلاعبك.
- بعض ظهور لقطات لفيلم "الباشا تلميذ" في أحراز قتل المتظاهرين اتضح إنهم أسره "واطية"مع بعضيهم.
- الباشا تلميذ في أحراز قتل المتظاهرين؟؟؟ مش بعيد نلاقي فيلم كباريه في أحراز إهدار المال العام.
- بس باين إن النيابة قايمه بالدور بتاعها كما ينبغى.. ومظبطة أهالى الشهداء على الأخر وبيسلوهم كمان وبيشغلولهم فيلم الباشا تلميذ.
- إعلان يسر هيئة القضاء العالي افتتاح سينما ومسرح المحاكمة بصالة المخلوع وفيلم الافتتاح الباشا تلميذ.
- بيقولك شرايط المخابرات إللي متسجل عليها أكبر جريمة ارتكبتها الشرطة في تاريخها طلع متسجل عليها الباشا تلميذ!
- بعد تشغيل فيلم الباشا تلميذ فى محاكمة المخلوع، عايزين المرة الجاية يشغلوا فيلم الكرنك علشان يعرفوا اللى هيتعمل فيهم.
- أيوه ما إحنا معملناش ثورة إحنا عملنا مكرونة بشاميل.. بيقولك الباشا تلميذ، طيب كويس إنهم ماجابوش حاحا وتفاحة.
- لما يكون أحراز قضية فيلم الباشا تلميذ يبقى عمرو مصطفى حقو يقول إنها كانت فوتوشوب
- هم مش عرضوا فى المحكمة مشاهد من فيلم "الباشا تلميذ" بس لو حق الشهداء ما جاش هتختم بفيلم "واحد من الناس"
- لما أحراز المخابرات الخاصة بقضية الشهداء يتقدمها مقاطع لفيلم الباشا تلميذ...يبقى إحنا قدام "فيلم هندى".
- هما اختاروا الباشا تلميذ مخصوص لأن المحاكمه تتم في أكاديمية الشرطة! عقبال ربنا ما يوعدنا بفيلم إعدام فرعون.
- يا جماعة عرض جزء من فيلم الباشا تلميذ أثناء عرض الأدلة فى قضية مبارك كان هدفها إنهم يخرجوا شوية من الموود.. دول بقالهم كتير بيحاكموا مبارك وأعوانه ومش عارفين يمسكوا عليهم حاجة، وشكلنا إحنا اللى هنتحبس مكانهم.
- غالبًا المخابرات حطت فيلم الباشا تلميذ فى محاكمة مبارك عشان توصل رسالة ضمنية إن المتظاهرين ماتوا من الضحك.
- أحراز قضية محاكمة مبارك.. صور للهرم وأبوالهول ومشاهد من فيلم الباشا تلميذ!! يبقى أكيد اللي عمل التحريات فريق.... من روتانا سينما!!
- السيديهات لو كانت جاية من المخابرات كان هيبقى عليها مسلسل الهجان مش فيلم الباشا تلميذ.
- الفكرة فى فيلم الباشا تلميذ ولا الفيلم اللى اتشال واتحط ده مكانه.. أكيد كان فيه مصايب وبقى دليل ضايع.
- تُعلن المحكمة عن عرض فيلم "الخطايا" بعد عرضها فيلم " الباشا تلميذ " وتتعهد بانتاج فيلم قريباً يحمل عنوان "الشعب اللي أتنصب عليه" !
- أحراز قضية مبارك عليها فيلم الباشا تلميذ.. سمعني سلام إنت من الأحراز يا علي.
من جانبه علق الكاتب بلال فضل مؤلف فيلم "الباشا تلميذ" ساخرًا على حسابه على تويتر "ماكنتش متوقع إن الباشا تلميذ هيخش التاريخ من باب زي ده عموما الحمد لله إنها جت على قد كده وماعرضوش علي سبايسي .. أعتقد كان لازم يهدوا لمبارك مشهد "بتعصبك يافاشل.. طب يافاشل يافاشل يافاشل" بس يدبلجوها ويستبدلوا يافاشل ب "يا مخلوع".
كان الحاضرون في جلسة محاكمة مبارك، أمس الأحد، قد فوجئوا بظهور فيلم "الباشا تلميذ" أثناء عرض الشرائط المسجلة بمعرفة المخابرات العامة، لأحداث الثورة عندما طلب رئيس المحكمة تغيير جهاز الفيديو لظهور الصورة مشوشة وغير واضحة بالمرة، وأثناء العرض ظهر فيلم "الباشا تلميذ" من بطولة الفنانين حسن حسنى وكريم عبدالعزيز، مما جعل المحامون يعتقدون أن الأحراز تالفة، لكن المحكمه وضحت هذا الأمر، وقالت إن ذلك لمسح "الهد" الخاص بجهاز الفيديو.