رسالة يكتبها: جمال الكشكي سيادة الرئيس القادم بعد التحية.. أنا مواطن مصري.. أرجوك تسمعني.. يمكن الفرصة دلوقت تسمحلي.. مش هطول عليك.. وهخش في الموضوع. من المؤكد أن سيادتكم تعرفون حجم العواصف العاتية التي يمر بها الوطن.. نعيش ليلة يحاكم فيها رئيس سابق حكم لمدة03 عاما لا يعرف فيها الشعب عنوانا لتداول السلطة, ويعيش أياما لا يعلمها إلا الله يبحث فيها الوطن عن طوق نجاة. وطن يتمزق سياسيا, وأكيد لو حضرتك متابع.. البلد بلا دستور وبلا أمن وبلا اقتصاد.. وبلا.. وبلا علشان وقتك مش هطول عليك ولو سمحتلي هكلمك بالبلدي كده: لو عايز مصيرك يكون بعيد عن القفص, والزنازين, ولو عايز ناس الوطن ما يقدموش شهدا جدد.. أرجوك حكم ضميرك وعقلك.. وبلاش إن القانون هيحاسبك لأ... عايزك تفتكر إن فيه رب كريم عادل. ملحوظة هامة يا سيادة الرئيس: الشعب خلاص مش هيخاف تاني. وحياة حبيبك النبي خلاص.. الشعب زهق وجاهز للشهادة.. لأنه الكلام ليك الشعب قرر البحث عن وطن جديد اسمه الجنة. علي فكرة يا ريس.. أنا بكلمك وجنبي أم الشهيد ووصتني أقولك: دم ابني في رقبتك لو ما جبتش حقه, وكمان جنب مني جارنا عم نصحي وطلب مني أقولك: كفاية إهانة لكرامتنا.. وذل في لقمة عيشنا. ودلوقت حالا دخل علينا لأ معلهش اسمعني يا ريس خلي بالك طويل شوية وأمال هتبقي رئيس ازاي دخل علينا شاب من بتوع الأبنودي وبيقول: الصمت عار.. لو سكتنا يقولوا ضاعوا, ولو وقفنا يقولوا باعو.. هه.. هه.. آه.. فرصة يا ريس أنا بقولك قبل ما تبقي ما بيني وبينك جسور. حتي بعيدا عن الشعر والكلام ده... الأطفال لما عرفوا إني باكلمك اتلموا في مدخل البيت وقالو لي أبلغك: إحنا أطفال لكن جوانا هموم رجال. يا ريس وحياة سيدك النبي.. أرجوك لو مش قدها بلاش.. عارف ليه.. لأنه من حوالي نص ساعة خالتي صفية عجوزة موت أي والله يا سيادة الريس لو شفت القشف اللي علي وشها تموت من الحزن عليها, المهم كانت بتسألني هتنتخب مين يا مكسور الرقبة قولتلها.. اللي ربنا يريد بيه ياخالة.. وخلعت راسها ورفعت إيديها: يارب وتك حزام الراجل الجديد.. كفاية يا ولدي.. تعبنا.. ماكدبش عليك يا سيادة الريس.. ولا مؤاخذة يعني.. يعني ما أحبش أخالف ضميري.. أنا قولتلها يا خالة.. ما تقلقيش.. مش بس الناس بتوع بحري هيروح الميدان.. لأ ده بتوع بحري وقبلي وغرب وشرق.. الموضوع ده ما فيهوش هزار.. خلاص يا خالة.. لازم الراجل الجديد يكون عنده ضمير... ولا يفرق بين الناس ويحكم بالقانون.. ويشوف الناس الغلابة.. احنا هنا أحسن من غيرنا.. لازم يشوف النايمين في العشش والناس اللي قتلهم البرد من النوم علي الرصيف. أصلك انت يا خالة عمرك مازرتي باب الحديد يقصد محطة رمسيس وتشوفي مصر علي حق.. أمال ايه يا خالة.. إنت فاكرة الحكاية سهلة. معلهش يا ريس أنا بقولك اللي دار بيني وبين خالتي صفية وعلي كل الأحوال مش هطول عليك. لكن عايزك تركز معايا في الكلام اللي جاي.. اللي قولته كوم واللي جاي كوم تاني.. معلهش أنا صدعت دماغك لكن عارف الخوف من حضرتك في ايه ياريس في الآتي: .1 الخوف إنك تخلي ولادك وزوجتك ليهم علاقة بالسياسة بمعني ايه.. بمعني إن الأمور تبدأ في الأول بكلام.. وينتهي بكلام.. وفي اللحظة دي يموت الكلام. .2 الخوف إنك تسلم مفتاح الوطن لأهل الثقة لأن التجربة أثبتت أنهم هيغرقوك.. وساعتها هتغرق معاك البلد. .3 الخوف إنك لا تعطي الفرصة الكاملة لكل القوي والأحزاب السياسية وكده معناه إنك هتكرر غلطة اللي قبلك. .4 الخوف إنك تلجأ للتزوير في الانتخابات لصالح رجالتك.. يعني مافيش حرية ولا ديمقراطية. .5 الخوف إنك تصفي حسابات علي حساب حقوق الإنسان. .6 الخوف إنك تخلي الارهاب والتفجيرات شماعة يتعلق عليها الجهاز الأمني في عهدك.. لأن الناس خلاص مش عايزة تحكمها بالحديد والنار. .7 الخوف إنك تتريق علي المعارضة وتقول خليهم يتسلوا وتعمل نفسك مش شايفهم.. عارف ساعتها هينفجروا في وشك في لحظة. .8 الخوف إنك لا توزع الثروة بالعدل علي كل المصريين لأن الغالبية العظمي من الشعب لم يحصل علي حقه.. وعلي حظك احنا في زمن أصغر واحد مش هيتنازل عن حقه. .9 أما النقطة الأهم: فهي إنك لازم تمنع الفساد نهائيا من كل مؤسسات الدولة. .01 أما الوصية الأخيرة.. ولو أنني أخذت من وقتك كتير.. فهي: أوعي تغيب عنك الرؤية وانت سايق سفينة الوطن لأنه بسهولة.. ممكن تغرق.. ولو مغرقتش.. هتتسجن! دي وصيتي ليك ياريس والسلام مواطن مصري [email protected]