علق الدكتور وليد دعبس رئيس نادي مودرن سبورت السابق، على إحالة قضية وفاة اللاعب أحمد رفعت للنيابة العامة بأمر من الرئيس عبد الفتاح السيسي. وخلال مداخلة هاتفية ببرنامج "حضرة المواطن" الذي يقدمه الكاتب الصحفي سيد علي بقناة "الحدث اليوم" قال "دعبس": "قرار الرئيس بإحالة قضية أحمد رفعت للنيابة العامة يثلج الصدور، وعن نفسي عندي حالة ارتياح بأن كل الأمور ستسير بشكل صحيح بدون خوف". وتابع: "بعد إحالة قضية أحمد رفعت للنيابة العامة، كل حاجة هتمشي صح والكلام هيمشي في مكانه الطبيعي، وإللي عمل حاجة كويسة هياخد حقه، وإللي غلط في حاجة أكيد هيتحاسب وهذا ما تعودنا عليه من الرئيس لما بيدخل في موضوع بيمشي في طريقه السليم". وأكمل: "الرئيس السيسي وضع أملًا للأجيال الجديدة بوضع نظام جديد للتعامل مع الرياضيين، وهو عودنا أنه بيسبق الأحداث". وواصل: "أنا من الناس عاطفيا كنت متأثر باللي حصل للاعب أحمد رفعت لإني مكنتش عارف اللي جاي هيبقى إيه ولا هيكون فيه حيادية وعدالة ولا لأ، وعلشان كده قدمت استقالتي من نادي مودرن سبورت، ولكن بعد قرار الرئيس سأتراجع عن الاستقالة وسأعود للنادي، لإني عارف إن الحق هيجي للنادي". واختتم: "مجلس إدارة فيوتشر كان محترم جدا ومكون من رجال أعمال وكنت على رأس المجلس وكان معايا الكابتن أحمد شوبير والنائب أبو هشيمة وشريف الجبالي والكابتن أيمن منصور، وأقسم بالله لا أنا ولا هذا المجلس كان لينا علاقة بالإدارة لحد شهر 9 إللي فات، كنا مجلس شرفي فقط لا غير، ومن أول لحظة اتقال لنا شركة الكرة هي من ستدير الملف بقيادة النائب أحمد دياب، واستلمت من الإدارة السابقة زمام الأمور في سبتمبر الماضي".
