وجهت الفنانة وفاء مكي رسالة لجمهورها، بعد حالة الجدل التي أثيرت، مؤخرا، عقب تصريحات الفنانة والإعلامية ميار الببلاوي بأن وفاء بريئة من قضية تعذيب الخادمتين التي سجنت فيها منذ نحو 23 عاما، قبل أن تغير ميار كلامها مرة أخرى. وقالت وفاء مكي، في تصريح ل "أهل مصر" لجمهورها: "أنا عند حسن ظنكوا، وإذا كان طلع حد وشوه صورتي قدامكوا فبعد 23 سنة ربنا كرمني وطلعت ميار نطقت شهادة الحق". وتابعت وفاء مكي: "بس أنا بزعل على حاجة، هو ليه لما ربنا عايز يجبر بخاطر حد وينصروا الناس بتزعل وتقاوح وتشكك وتطعن فيه؟". وكانت الفنانة ميار الببلاوي كشفت، مؤخرا، عن أسرار تذاع لأول مرة في قضية الفنانة وفاء مكي، التي اتهمت بتعذيب خادمتيها، بعد مرور 23 عاما على تلك الحادثة. وقالت ميار الببلاوي، في تصريحات لبرنامج "صبايا الشمس"، من تقديم الإعلامية ريهام سعيد: "الموضوع تم فتحه حاليا وأنا متكلمتش فيه، وأنا مريضة قلب ومفيش مرة دخلت عملت عملية إلا ما بقيت قبلها أدعي ربنا يمد في عمري لحد مقول كلمة الحق". وأضافت ميار الببلاوي: "أنا كنت عاوزة أقول حاجة بس مش عارفة الطريق، وجوايا صراع إن كلامي دا هيعمل حاجة ولا لأ، بقالي 23 سنة تعبانة، وبقول يا ترى لو كنت قولت شهادتي كان هيتاخد بكلامي". وحكت ميار الببلاوي تفاصيل الحكاية قائلة: "لما اتجوزت مكنتش شاطرة ومش بعرف أعمل حاجة في البيت، وجوزي كان عاوز يجبلي ناس تساعدني، كان معايا بنت بتساعدني مدة طويلة واتجوزت ومشيت، وبوابة العمارة قالتلي في واحدة تحت معاها بنتين عاوزين يشتغلوا". وتابعت ميار الببلاوي: "بنت منهم هرشت في شعرها ولقيت شعرها أقرع، وقولتلها إيه دا، قالتلي دول اللي كانوا عند الأستاذة وفاء مكي، والبنت عندها قراع ووفاء حلقتلها شعرها، ورفضت أن تعمل البنتين معي، لكنهما كانتا بصحة جيدة، لكن خفت من اللي عندها قراع إنها تعدي ابني". وواصلت ميار الببلاوي: "شهادتي اللي بقولها إن البنتين جم من عند وفاء مكي، مكانوش محروقين ولكن حالقين شعرهم، والست مشيت وأخدت البنات، ثم فوجئت بكلام الجرائد عن تعذيب البنات، ولما شوفت صورهم قولت دول اللي الست كانت جيباهم لي وكلمت صحفي معروف، وكان صديق عزيز ليا أنا ووفاء، وقولتله الموضوع دا غلط ووفاء معملتلهومش حاجة، وهما جم من عند وفاء مكي لعندي، ثم راحوا البلد والمصور قالي فيه شخصية عاوزة تئذي وفاء، وكلامك مش هيقدم ولا هيأخر". واختتمت ميار الببلاوي: "كل الكلام دا كان من 23 سنة، وربنا مد في عمري عشان أقول كدا، والحمد الله إني قولت والموضوع دا كان تاعبني". وفاء مكي: ميار الببلاوي كتمت شهادة حق وعلقت الفنانة وفاء مكي على تصريحات الفنانة والإعلامية ميار الببلاوي، وقالت في بث مباشر ل"أهل مصر": "ميار الببلاوي كتمت شهادة الحق عشان ابنها، من حقها تخاف على ابنها كان هيندبح وسفروها بعد ما القضية خلصت". وأضافت وفاء: "أنا مش عارفة أقولها إيه الحمد لله، ربنا يسامحها ويسامحنا، دا ابتلاء وربنا إذا أحب عبد ابتلاه، أنا فيه حد قالي تعليق على فيسبوك ماذا بينك وبين ربنا يا وفاء يا مكي لتظهر الحقيقة بعد 23 سنة، ودي كلمة أسعدتني". وانهارت الفنانة وفاء مكي، أثناء مداخلة هاتفية مع الإعلامي سيد علي، نتيجة تراجع الإعلامية ميار الببلاوي عن تصريحاتها بشأن قضية الخادمتين، وقالت وفاء:"ميار طلعت برأتني لكن اتراجعت عن تصريحاتها بسبب هجوم الرأي العام عليها، كل الناس قالت دي اللي بتطلع في برامج دينية إزاي تكتم شهادة حق 23 سنة". ميار الببلاوي تتراجع عن تصريحاتها وكانت الإعلامية ميار الببلاوي، تراجعت عن تصريحاتها عن الفنانة وفاء مكي بشأن برائتها من قضية تعذيب الخادمتين. وقالت ميار من خلال حسابها بموقع فيس بوك:"اللهم لك الحمد ربنا ظهر الحقيقة من شاهد عيان، وكده أنا كنت بأنب ضميري على الفاضي، سؤال إيه اللى بتعمليه ده يا وفاء، أنا قلت إن في موقف حصل لكن كده أتحسمت كفاية بقى، ملقتيش حد تدوسى عليه غيري وتمثلي البراءة، أوعلشان أنا مش بتاجر بالموضوع ورافضة أتهم بأني بجري ورا تريند، وأفضل ألف معاكم على القنوات والمواقع بالشكل المستفز دا". وتابعت الببلاوي:"أنا قلت شكوكي وموقف حصل، الحمد لله إنه كان ولا هيقدم ولا يأخر سؤال فين دليل براءتك دا؟، أنا قلت للناس إنه حصل كذا فقط، واللي حصل دا ملوش أي قيمة خالص بعد شهادة الشاهد دا، وبعد مقريت التحقيقات والتقارير قد إيه أنا كنت هبلة". وكانت الفنانة وفاء مكي اتهمت في قضية تعذيب خادمتهيا عام 2001، وتم الحكم عليها بالسجن عشر سنوات، مع الشغل والنفاذ، ولكن تم تخفيف الحكم بعدها إلى ثلاث سنوات لتخرج عام 2004.
