كشفت الإعلامية ريهام سعيد، عن أسباب بعدها عن «السوشيال ميديا» والاختفاء عن وسائل الإعلام؛ وذلك للتفرغ لبيتها وأولادها نظرًا لما تعرضت له من أزمات وبعدها عنهم لفترة طويلة. وأعلنت ريهام سعيد، عبر حسابها الرسمي على موقع التواصل الاجتماعي 'فيس بوك'، تفاصيل اتخاذها هذا القرار قائلة: 'أقسم بالله كل حرف هاكتبه صادق ومن قلبي، أنا حاسه إني هاموت قريب عشان كده هابعد عن السوشال ميديا، عشان أقعد مع أولادي أكتر وقت ممكن، خصوصًا ابني الصغير، ويمكن سحر، ويمكن اكتئاب ويمكن حقيقي، غالبًا إحساس الظلم كان بيقتلني بالبطيء'. وتابعت قائلة: 'في يوم من الأيام الدنيا قامت عليا عشان تعلب إما المعراج وإنكارها عادي، تامر امين، يغلط في الصعايدة، قاصد أو مش قاصد يتوقف 3 شهور، لكن انا أعمل أكبر حملة للسمنة، وأعالج ألاف من السمنة، وعمليات ببلاش ويفتروا عليه ويقولوا إني قلت إن ريحتهم وحشه واتوقف سنة'. وسردت ريهام متابعة: 'وأيضًا فتاة المول و لا تحرش و لا نيلة وأجيب فيديو وهي معاه محدش يشوفوا واتحاكم وأدفع اللي ورايا واللي قدامي لسما المصري، عشان تتنازل لأن هي اللي زقاها عليا، غيره و غيره و غيره، كفاية إننا عالجنا أعداد مهولة من الشباب من المخدرات، ورحت أماكن خطر جدًا عشان أوعي الناس'. وعبرت ريهام عن حزنها قائلة: بدل ما اتكرم آلاقي نفسي نايمة في أوضة متر في متر مع تاجرة مخدرات، البرنامج يتوقف، أطفال تموت، ومدرسة ذوي الاحتياجات الخاصة اللي فاتحنها تتقفل، وتطلع ريهام أفاقة و كدابة، لو فضلت أحكي هاحكي كتير بس أنا موجوعة، ومش قادرة أحكي انتوا ظالمين، بتمشوا بكلمة من غير ماتشوفوا و لا تفهموا'. وتابعت ريهام سعيد موضحة :'عندي كلام كتير أقوله على كمية مواقف فيها ظلم رهيب لو مت أنا مش مسامحة، مش مسامحة أي حد قال عليه كلمة واحده مش حقيقية أو على السمع، مش مسامحة أي صحفي كتب عني كلمه ظلم مش مسامحة أي واحد كتب كومنت موت بيها أطفال القلب'. وأضافت 'سعيد' قائلة: كفاية إن أي حاجة الإعلام بيتكلم فيها دلوقتي أنا متكلمة فيها من عشر سنين، هانزل قبري مش مسامحة هاني عزب و لا أيمن سليم، و لا ريم، و لا بسمة، و محمد راضي، وعلاء الكحكي، ووليد مصطفى، ومحمود مملوك، وأحمد عبد العزيز، و جورج قرداحي، و كتير غيرهم، مشً مسامحة و لا هاسامح ، مش مسامحة اللي بتسحرلي كل شويه، مش مسامحه حسن شاكوش، واللي عمله في أولادي .. مش مسامحة أي حد ساهم في خراب بيتي و ضياع مجهود سنين و مش مسامحة أي حد أنا معرفوش ضدي و بيحاربني و أنا مش عارفه'. وأشارت قائلة: المهم إني أجهز للقاء ربنا أعوض الصيام، وأصلي كتير واتصدق و ادعي، أدعولي أنتوا كمان ربنا يغفر لي.. ريهام بتجيب مشاكل طب وراحت فين المشاكل لما قعدت في البيت ؟ ما هو اللي فيه طبع مابيغيروش.. واللي عشان كانوا بيعملوا المشاكل اتهدوا لما اعتزلت ؟ عشان أنا مش على الشاشه مليش قيمة ومفيش مصلحة قد أيه الناس وحشه. وأضافت 'سعيد': 'كلمت ناس كتير يساعدوني أحقق حلمي وأمثل مش عايزة أقولكوا الرد وناس ياما و قفت جنبهم، كل دور أعمله المخرج يقول لي أنه هايكسر الدنيا بس هي ماشيه بالشطاره ؟ أنا عايزه أقولكوا اللي اللقاء يمكن لمًا أخف لو عيانة، يمكن لما اتعالج من السحر لو مسحورة، يمكن في الجنه بإذن الله لو مت، ماتظلموش حد لأن أنا بعد ما تعبت أوي أوي ظلمتوني أيوه حتى لو ليه اعداء أنتوا ساعدتوهم'. وأضافت قائلة: 'أخر حاجة هاقولها للريس أنا لو مت وصيتي أولادي يعرفوا أنا حققت وعملت أيه لأن أكيد حضرتك مش عارف برضوا، أنا أولادي اتعذبوا ورايا في المحاكم و القضايا أنا ابني كان عنده شهرين زارني في السجن، أنا بهدلت أهلي معايا عشان ولا حاجة، كنت فاهمة إني هاصلح الكون، أنا آسفة إني نجحت أنا آسفة إني كنت عايزة كل الناس تعمل خير أنا آسفة إني معملتش علاقات تسندني جوه أو بره مصر.. خسارة المجهود اللي راح بدون تقدير لكن أجري باذن الله عند ربنا'. واختتمت قائلة: 'ماتوجعوش حد تاني إحساس الظلم مميت، إحنا كنا البرنامج رقم واحد في المشاهدة في الوطن العربي عشر سنين والسابع على العالم، وتعبنا أوي أوي أوي، قدر الله و ما شاء فعل حقي عندك يا رب.. في الآخر السيرة أهم من السمعة لأن السمعة دي الحاجات اللي بتسمعها وماشفتهاش وهي مش حقيقة لكن السيرة دي اللي موجودة في كل بيت فيكي يا مصر.. دي سيرة معاملتك للناس، والحاجات اللي ربنا جعلني سبب إني أعملها وهو ده المهم.. بعد ما أموت ماتقولوش دي بتمثل إنها ماتت زي ما كل مره كنت بعيا فيها، الصحفيين كانوا بيطلعوني كدابة، حسبي الله و نعم الوكيل'.
