الانكسار الانكسار مالهوش عيون ملهوش إيدين وقت الغرق علشان تشاور أو تلمح إنه كان ممكن نعيش مساحة ما ندي لبعض الأكسجين جايز سيناريو الحلم متفصل لشئ قلوبنا مش عارفاه جايز تراجيديا الحياة كانت عشان اطلّع من العمر الأخير ورق اعتماد لعمر لسه ما عشنهوش فمتسمحيش للبرد يلون الفصل الأخير!! فيلم أقدم م الحكاية بالحم في إيه مكسور وعاوزه يعود لأصله الحياة كما سينما ترسو فيها فيلم بطله شبهي بس عنده طموح لليلي زقزقات عصافير في قلبي أو مقاومة أو حالات لقصيدتي بين مجرد حلم أبيض وانفعال موال جراحي لحد ما تبان الحقيقة بشمس غايمة قربت أقرا في عنيكي كلام مجروح إنتي إيه خلاكي تمشي للغياب وإنتي لابسة كعب عالي كنتي فاكرة الحب مهدي م الليالي كنت في وضح انكساري موارب الباب وباصص ع السنين الكل آمن بالهروب وآمنت أخوض معركتي وحدي أغلب الشوق في ضلوعي وانهزم قدام غيابك باقنع ساعات نفسي إن أيامي اللي جاية ممكن تكون شكل أحلامي اللي دوبها انتظارك البحر عارف كل حاجه بتفصيلاتها عارف إني قصيدة تاهت تفعيلاتها جوه إحساسي اللي دايساه الحياة كل يوم عجلاته أنشف م اللي قبله بيتكو مش طالل علي جراحي اللي عدت علشان تشوفي ازاي ما غيرنيش غيابك بيتكو تاه وسط البيوت واختفي راح حنانك يهدي غيري في الدفا غاب وغامت الحقايق القتيل بقي شكله قاتل اختلت الموازين وضاقت الشوارع مبقتش عارف لحد فين ح امشي وشايلِّك حنين في سندرات القلب خبيت كل صورك كل أحلامنا.. مشاويرنا اللي تعبت كل لحظة فيها وَنِّسْني اشتياقك واتقابلنا في دنيا ضاقت هل راح ألحق أخطفك وحصاني أعرج؟؟ آيس كريم الدنيا لسه ساقعة والوحدة سكة طالت كانت حدوته خلصت كانت بنهاية ناقصة أحزان ما جاش مثيلها حبيبتي في أي قصة "تافرنا كان بطعمك نجري مع بعض نضحك ونتحدي المطر دي نوة ولا أزمة حدفتني لسكتي ده غيم قتلنا لما خلصت رقصتي صحيت مالقتش روحك روحتي وسبتيلي دنيا.. عمري ما حبيتها خالص زقيت الباب لفين الوحدة برد قاتل مع إن الدنيا صيف سألت البحر ياما عن سر عروسة كانت وغياب روحها مازال ملازم خطوتي آيس كريم بيهرب من إيد الناس لإيدك بيروح يبوس شفايفك ويصنع لهفتي وياريتني كنت هو كنت أقدر أشوف حنانك وأدفي فيكي روحك أدفي أيام غريبة البرد طال ما فينا ياريتني كنت شارع آخره عنيكي تلاقيني ياريتني أقدر أروح لك وأطلق خيول حنيني لمواسم غربتك لكن البرد طالني وقتلني في لحظة ما فين راحت مني روحي ليه سرقوا ضحكتي البُعد والحنين سابوا فيا انفعال وخلوا القلب يمشي لآخر الحياة يجري يستنا حضنك في شارع مش لاقيه!! علي هيئة حزن جديد تعرف تضرب غطس في نفسك كل الأشباح بتنافسك علي جنية وبتعزمك الأحزان علي تفاح الحيرة تسكر مِ العنب اللي طرح لك ضل ولا م الأكاذيب البنت اللي لقتها علي باب اللحظة أول ما لمست ايديها حسيت بغموض مش هي اللي سقتني من كاس عنابها إمبارح أنا راجع في إيديه هزيمة مين كان بس يصدق إني راح ارجع مقتول ابريل كان لازم يطلع كداب كان لازم أعرف إن الأسباب بتخون وإن قصيدتي جريمة بالتحديد ح تغفلني وتطلع علي هيئة حزن جديد! صرخة صرخة وضاع اليوم صداها إعلانات عن بيع حاجات مبقتش في عيوني جديدة العتاب مبقاش في وسعه يرسم الصورة بدمايا كل حلم وعنده غاية إلا حلمي لتوهة ماشي ع العموم لايضايقك إني مخنوق م الطريقة راح أعدي واسمحيلي بكرة راح يسقط في يدي ح امتلك توت الغناوي واجعل الأحزان تعلمني التحدي لما وردي يمتحن كل الفصول راح أسيب لك فرصة واحدة عشان تردي اعتراف مكتوب عشان حددت جهتي الخريف الجَيّْ له سِمَّان معاند له شجر لسه بيشقر علي آخر غنايا انفرمت في دنيا عفرتها انتظاري شيلت وحدي في سدري برد جعلني خايف مهما ترتعش الشفايف للشفايف الكلام في حلقي واقف وانتي عندك فرصة واحدة عشان تردي! وإيه غيَّر هوا ستانلي؟ باتكتك زي ساعة في جيب صديري خواجة أرمنلي باتكتك في شتا عمري اللي جه عاصف وبَكَّي الضحك سألت البحر سؤال وما رد حيطان الوحده ناشعه ببرد خطفت الروح لذكري يافطة ع الكورنيش مسحها البعد وتاهت قد أيه عناوين لفيلم قديم في سينما أمير معاكي حبيبتي ما دخلتوش لكن شوفتك ف قلب الفيلم أغنية كأن عنيكي قالتها في مرة لعينيه في ساعة طيش حياتي كلها بمبي يتكتك قلبي ويبقي معاكي ع الكورنيش سما فيها عيون نجمة بتكتب شعر ما تقوليش اقولك حاجة أنا عطشان شفايفك دي مصبات نهر بطعم أنوثة مخصوصة عيونك فيها م الجنة وفيها من مدن لسه بيبنيها الخيال علي شاطئ الأحلام ونهدينك غنا المانجه فواكه من خلاصتها الهدوء يعمل جناين مهرجان لربيع من الحنية والفتنة ويطرح موسم الرغبة معالم من وطن بيحب قزازتين حب في شارع خدني من عمري غياب بيخض غياب ملعون وغيمة تحتها العالم لقيته كئيب غريب في مداه أنا اصبحت كما ميت في روحي لسه من طعمك بقايا حياة في شارع نيس في أي خميس بتظهر وحشتي جملة في قلب قصيدة من روحك وقلبي ف زحمة التروماي قَلَب فجأة الفيشار مِ الكيس بيشبه حلم ما استغناش يعيشني في سره ويضحي ولما نزلت م التروماي في عينك شوفت باب للحب مفتوحلي رسمت جناح وقلت أطير وحين قربت أنا أتغربت في غيم خدني لآخر آخر المشاوير سرقني م الربيع والصيف ومرت فوضي دي الأيام باتكتك زي ساعة في جيب صديري خواجةأرمنلي في روحك شئ رفض ياخد علي النسيان في روحي منفي أم شطآن وأيه غيّر هوا ستانلي؟ لاعندي إجابة ولا شايف عينيكي كلامها ح يقولِّلي!! زهايمر ياه كنتي فين واللي علي وِشِّك ده أيه؟ شكل السنين؟ ولا تجاعيد الفراق؟ رسمتك دلوقتي حاله خلتني أتلجلج ثواني وأسألك قوليلي من فضلك دا ليه وأنا ليه بقيت مش طعم عيل أدهشك لما قال قصيدته لعيونك وحضَنك فجأة ع الكورنيش كنت مش حاسبك قمر ولا نجمة ضوت واختفت أنا كنت فاكرك دنيتي لكن في لحظة ما لقتش غير طلة غياب أدمنتها وجعلتها بوابة شايلة ف قلبها ذكري ما لشئ جميل لكن خلص! غيرت اسمك من حبيبتي اليوم لإيه عاوز افتكر يبدو الزهايمر منحني شباك للحياة منه باشوف كل الحاجات علي قد تفاصيلها بهدوء دورت جوايه عن مكان للشوق لقيت قلبي بقي متحف قديم ملياه كراكيب السنين طب انتي فين دورت لكن ما لقتش منك غير يادوب حبة صور وقصيدة حطت نفسها ف أول ديوان مبقتش أقولها جايز دا تأثير الزهايمر أو جايز إني مبقتش أشوف الجرح غير خدش النهاردة جوه أي قصيدة ح اكتبها للسكة اللي جايه!.