أنا عارف ان أنا ف عنيكم شخص مغفل اكمني واخدها ببساطة ولا عمري باقول عن نفسي إن أنا دكتور أو شاعر وباطلّع كل عيال شراييني وقلبي ياخدوا راحتهم ف شوارع وشي ولا عمري باقول لعيل فيهم لأ أو اسكت ف يشدُّوا كل ملاية زيف عن وش و يعروا كل ستاير بتخبي ضمير مغشوش رغم اني باحوشهم أحيانا لما الكورة تكسر مرّة أي قزاز ف ملامح حد أو يرموا طوبة من غير قصد ويجيبولي كلام من واحد يسوي أو واحد تاني مابيسواش وأقرر أحبسهم في القفص الصدري واحكم علي كل ملامحي ماتطلّعهمش لكن باسامحهم و أفك حصار الوش تتنطط كل عيال جوّايا أنا عارف ان أنا ف عنيكم شخص مغفل اكمني ما عملتش زحمة ف مصالحكم ولاخدتش لقمة عيش من حد ولا سلّطت عليكم مرة سيف الواسطة ولا كلمتش أخويا الزابط يقضيلي مصالحي أو حتي يوصي عليا ما أقفش طابور إكمني ما رسمتش مرة الدور و طريقي بامشيه علي مهلي خطوة بخطوة ما وصلتش مرة علي أكتاف الغير أنا عارف ان أنا ف عنيكم شخص مغفل اكمني ... رغم الفقر ما جتش ف يوم زوّرت فاتورة ولا مديت الإيد من تحت المكتب ولا سبتش شغلي علشان أستلقط عيشي في مكان تاني أنا عارف ان أنا ف عنيكم شخص مغفل اكمني شايف صوابعكم بتسد اودانكم إلا إني مُصرّ أقول الشعر اكمني مابعتش شعري لأغاني النزوات والشهوة رغم اني ما املكش حساب الشاي أما سجايري ... دايما فرط أنا عارف ان أنا ف عنيكم شخص مغفل اكمني وبكل قواي العقلية ضامم صوتي لصوتكم إن أنا ف عنيكم شخص مغفل.