أتوب ازاي و أنا التوبة عليا محال؟ أتوب من إيه و أنا لسايا مش عاصي؟ دا أنا لو ذنبي قد جبال عليا حلال و لو توبي خيوطه ذنوب ها أعيش جواه و عمري ما أتوب و أخش القبر ملفوف فيه و أنا راضي و ها اقعد أحاسب الملكين حساب دايم ليوم الدين و هااحبسهم في زنزانتي و في قيودي و أقول توبوا يقولوا ازاي تعيش صابر علي دا الحال غريب علي أرض أبوك و أمك سنين عايش كما الرحال بتروي غيطانها من دمك و خيرها يقطفه الأندال أقول عاشق تراب بلدي و دايب دوب في نهر النيل و ده ذنبي قولوا لي لو يجوز لي أتوب أتوب من حبي للطاهرة و سيدي المرسي أبو العباس و سيدي السيد البدوي أتوب من كُحل طينة مصر ست الكل أتوب من مسك أنفاسها وضحكتها اللي زي الفُل دا حتي لو يجوز لي أتوب هاموت عاصي.