جومان مراد: "شميت ريحة ريحان عند بنتى قبل ما تموت وقولت دى ريحة الجنة"

قالت الفنانة جومانا مراد إنها مرت بأوقات عصيبة بعد وفاة والدها وابنتها، مؤكدة صعوبة وصف الشعور الذى مرت به خلال تلك المحنة.
وأضافت الفنانة، خلال برنامج كلمة أخيرة قائلة: "شعور صعب الوصف.. بس ربنا لما بينزل حاجة بينزل معاها الصبر والقوة .. يوم ما كنت بتدفن بنتي كنت بقرأ قرآن واللى حواليا كانوا بيعيطوا.. متخيلة القوة والإيمان اللى ربنا نزلهم عليا؟.. مفيش أغلى من الضنا.. وهى ملاك فى السما".
وتابعت: "ما كونتش متوقعة ده .. قلت بنتي مش هتموت وهتقوم منها لغاية قبل ما تموت بيوم .. حسيت بنار قايدة في قلبي وقلت لجوزى بنتي هتموت.. الصبح لقيتها ماتت.. لكن حصل حاجة غريبة كان وقت كورونا كانوا بيدخلوني ودايما بحط إيدي علي رجلها وقلت للدكتور ممكن أحط إيدي علي جبهتها، قالي أيوه..عرفت وقتها إنها هتموت .. كأني بودعها.. شميت إيدي لقيت فيه ريحان ريحة أهل الجنة وهي طفلة ملاك .. قلت إيدي ريحتها ريحان، بعدها بساعة ماتت".
وواصلت: "الدنيا مش دايمة وبقيت أزور المقابر كتير.. قبل ما اروح الشغل بروح المقبرة كتير طول الوقت لما أبقى قادرة أروح بروح كتير لإن زيارة القبور بتريحيني، وفى النهاية لا نملك نفسنا ومش هناخد حاجة معانا"، مختتمة: "بقول إن الواحد يعيش.. بس عيشوها من غير أذى لأى أحد.. الأذى ربنا مش بيسامح فيه وكلنا رايحين".