قال الإعلامي عمرو أديب: "أنا كمواطن أو ملاحظ لدي عدد من الملاحظات الأولى ما أقدرش أقول لك إن ما حدث شيء عظيم وإلا سأكون رجل غريب، ومحدش مبسوط النهارده، وأي طبقة من الطبقات اللي كلمتني النهارده قلقانين ومتضايقين، وأغلب دول العالم عندها نفس القلق والضيق والمشاكل". إدارة الحكومة للأزمة وتابع خلال برنامج "الحكاية" المذاع على قناة "إم بي سي مصر": "الحكومة أيضًا قلقانة ومتضايقة، وما أقدرش أقول إن اللي حصل النهارده حلو وجميل، والملاحظة الثانية أنا كمواطن يهمني إني عرفت إن فيه أزمة بسبب الموجة التضخمية وزيادة الأسعار ولكن اللي يهمني كيفية إدارة الأزمة وهذا ما فعلته الحكومة اليوم وأدى إلى ارتفاع أسهم البورصة، ولكن إزاي نقدر نساعد بعض ونكمل لأن محدش عارف الأزمة الروسية الأوكرانية هتطول ولا لأ والأغنى مننا وعندهم احتياطيات بيعانوا من مشاكل، واحنا كمان هيبقى عندنا ضغط على العملة، والأزمة قد تطول وقد تقصر، وقدام ممكن الدنيا تتحسن طبقًا لأمرين الأول هي الظروف في الخارج هتتحسن ولا لأ، وثانيًا الدولة هتدير الأزمة إزاي؟".
تحسن الأوضاع الاقتصادية وأكمل: "مفيش شيك على بياض بتحسن الأوضاع في المستقبل والأمر مرهون بالظروف الخارجية، وثالثًا في ملاحظاتي بعيدًا عن فهمي في الاقتصاد إن أنزل السوق ألاقي حاجتي موجودة بأسعار كويسة وما حدش يشتري حاجة مش عايزها أو حاجة سعرها غالي وما تجيبش غير اللي أنت عايزه".
تجاوز مرحلة الغضب وأضاف: "هل آن الأوان إن الناس تغير تفكيرها مع النقود؟ لازم المواطن يغير مفهومه عن حاجات كتير وياخد باله من الحياة لأن فيه حالة من عدم اليقين في وضع العالم، ومش عارفين هيبقى في حرب نووية ولا لأ، والكل في مركب واحدة، ولازم المواطن يعدي مرحلة الغضب والصدمة من اللى حصل ونبدأ في مرحلة التعامل جوا البيت وبرة البيت في التعامل مع الحياة الجديدة".
واستطرد: "احنا في حالة حرب ولازم نتعامل مع الأمر في سياقه، والملاحظة الأخيرة نداء قبل الأخير للتجار إن لو الأمر بقى فيه استغلال الناس مش هتشتري حاجة وبالمناسبة برة ابتدوا يلاحظوا المحلات الفاضية بسبب الغلاء الكبير في الأسعار، وبقول للتجارة بلاش مجازفة في السوق الأمر مش زي كل مرة".
مواجهة غلاء الأسعار وأكمل: "هو لما الحرب دي تخلص والأزمة دي تنتهي تنزل الأسعار؟ عارفين مين اللى هينزلها احنا بمقاطعة الغلاء وجشع التجار، وما تخلوش حد بقى يستغفلنا ويخلينا ندفع أكتر من اللي معانا أو إمكانياتنا".
تخزين الدولار وأكد: "اللى معاه دولار النهارده أو أي عملة صعبة مستني اللحظة المعينة الفارقة اللي يبيع فيها عملته، أول ما السعر ينزل لتحت ال 18 جنيه هيبتدي يبيع اللي معاه، ودي طبيعة البشر، وبكلم بنوك النهاردة بيقولوا ما مسكناش دولار".
دعم القطاع الخاص ولفت: "أنا شفت النهاردة الحزم الاجتماعية وتحديد سعر الخبز السياحي ورفع أجور الموظفين في الحكومة ودعم البورصة وده عظيم ولكن أرجوكم لا تنسوا المشغل الأول في مصر اسمه القطاع الخاص، والملايين الأكتر بيشتغلوا في القطاع الخاص وهل انتوا مش عايزين تعملوا لهم أي حزمة؟ لازم نعمل حزمة للقطاع الخاص حتى لا يلجأ لتسريح العمالة أو يفلس". رئيس الوزراء: ضم 450 ألف أسرة ل"تكافل وكرامة".. زيادة المعاشات 13%.. وصرف حوافز المرتبات أول أبريل بدلا من يوليو رئيس الوزراء: سنخفف حدة القرارات الاقتصادية عقب انتهاء الأزمة الحالية وتابع: "إن شاء الله الحياة الصعبة نقضيها ونعديها سوا، والعند بقى رباعي أمريكي روسي صيني أوروبي واحنا في النص ضحايا".
