يا فتى الأحلام ... هتيجي ولا أنام ؟؟؟ لا تكون بجد حلم !! أوعاك تقول سلام ... يا رب هو .. هو .. يارب يكون تمام !! يارب يكون كويس .. ويجيلي في المنام ... يارب أنا قلبي حابب .. وأتعلق بالأسباب ... أرزقني الصبر عندك .. وأفضل أرد الباب ... في وش كل خاين .. وفي وش الكذاب ... وأفضل أصونِّي إلى .. ما يجي صاحب السمو ... ياخدني لحتة تانية .. يرقى بيا للعلو ... يارب أنا حلمي عالي .. واصل إلى السحاب ... أنا حلمي راجل واحد .. يخفي الدنيا السراب ... يارب أنا عافة نفسي .. محتاجة بس هو ... بتتلاقى الدعاوي .. والحلم في قلبي جوه ... الحلم عمره ما كان .. ضعف بالعكس قوة ... قوة إني أحبه .. وإن كان ملهوش وجود ... قوة إني أخلصله .. لأبعد الحدود ... يارب قلبي أتعلق .. أرجوك ترده ليك ... لكني حابه أحبه .. والحب كله فيك ... يارب أنا قلبي عاشق .. وعشق السراب مباح !! إكمني بحب حد .. كان مجرد إقتراح ... فرضه خيالي ليه .. ومخلليش براح ... يا فتى الأحلام .. أرجوك تعالى بدري ... أرجوك تعال دلوقتي .. عشان العمر بيجري ... والناس بدأت تقول .. ايه اللي شاغل بالها ... لا راضية بده ولا ده .. ومحدش عاجبه حالها ... وخلاص كبرت بقى .. والعمر خفى جمالها ... امتى هنفرح بيها .. امتى هنشوف عيالها ... يا فتى الأحلام ... هتيجي ولا أنام ؟؟؟ هتيجي ولا أمشي .. وأفرض الخصام ... هتيجي ولا أهاجر .. لبلاد فيها إحترام ... لجنس كله ناعم .. مش شايفينه نعام ... يدفن راسه في تراب .. والشرف ممنوع حرام ... أقولك حاجه حلوة .. استناني خلاص ... انا داخله أهو أنام .. لو تعرف الإحساس ... كون إن دموعك بتنام .. جنبك على المخدة ... فتنام تحلم تقوم .. مسروع مفزوع من الخضة ... أشوفك جوه حلمي .. زي كل يوم ... وبإذن الله هشوفك .. لو صحيت م النوم ...