بدأت الحكاية النهاردة الصبح عندما تخانقت مع جوزى خناقة كبيرة وقالى كلام كتير وحلف علىَّ بالطلاق بس أنا كنت كمان بزعق وبتخانق وما سمعتش إللى قالوا ومش عارفة أن كان طلقنى ولا لأ وكرامتى ما تسمحليش أنى أكلمه أحسن حاجة اتصل بشيخ من اللى بييجوا فى التليفزيون وآخذ فتوى.. أيوه يا معالى الشيخ جوزى حلف علىَّ أنى ما أخرجش من باب البيت بس الباب خبط واللبان جبلى اللبن وفتحت وخبطت على جارتى علشان آخد منها فكة أبقى طالق ولا لأ. الشيخ: يا ست الكل الموضوع كده فيه حرمانية 90% و10% حلال (أتشعبطى) فى الحلال وماشيها أنك لسة متجوزة. أتشعبط أيه هو أنا راكبة أتوبيس أنا عايزة فتوى. أنا أتلخبط كده أتصل أحسن بالشيخ اللى على القناة الثانية.. يا سيدنا الشيخ ريحنى أنا اتطلقت ولا لسة. لازم تيجى باثنين شهود طوال وعراض أو راجل طويل واثنين ستات حلوين. الشيخ اللى على القناة الثانية قالى أتشعبطى اتشعبط وأركب يا سيدنا الشيخ أنا شايف أن لازم يكون فى شهود ستات على رجالة عشان تعرفى تتشعبطى أحسن حاجة أسأل جارتى أم ودان طويلة تلاقيها سمعت خناقتى مع جوزى الصبح وتقدر تفيدنى وتبقى شاهد.. يا أم حنان أنت دايماً رامية ودانك عندنا والنبى يا أختى ريحينى وهو اللى ما يتسماش رمى عليا يمين الطلاق ولا لأ والحلفان كان إيه بالضبط، ما علهش يا أختى أنا صحيت متأخرة وما سمعتش حاجة بس ده لو صحيح تبقى أنفتحتلك طاقة القدر لو طلقك بالثلاثة روحى أتجوزى موز صغير.. ربنا يهدك يا بعيدة.. طب أسمعى أنا عندى فكرة نفتح المندل أو نقرأ الفنجان وأحنا نعرف بس ياختى ده مش حرام ولا حرام ولا حاجة ما أحنا محتاسين أهو طيب بقى أقوم أعمل فنجان قهوة ونفتح المسلسل الجديد ونشوف المنيل دة طلقنى ولا لأ.