• مالك.. عاملة كده ليه؟! - ال.. عا.. • إيه!! بتقولي إيه؟ - مش... • مش سامع حاجة.. استني لما صلاة المغرب تخلص. -... • خلاص.. كنت بتقولي إيه؟ - كنت باقولك الميكرفون عالي قوي.. جالي صداع. • أستغفر الله العظيم. الواحد مش عارف يقول إيه، نفسي أفهم هم ليه بيعلوا الصوت قوي كده. - أنا رأيي نروح نعمل لهم محضر. • تاني!! - آه، مش المرة اللي فاتت لما كانت البنت بتمتحن وعملت المحضر وطوا الصوت. • بس الناس كلت وشي.. والراجل إمام الجامع بطل يكلمني، ومن ساعتها بيبص لي بصات وحشة قوي. - معقولة!! • آه، أقولك بصراحة. - فيه إيه؟ • أنا بقيت أروح أصلي في الجامع البعيد، عشان كل اللي كنت باصلي معاهم مش طايقني. - مش قادرة أصدق، بقي داخلين الجامع يصلوا ويعملوا كده!! • تفتكري هم دلوقتي بيقولوا إني مش باعرف ربنا؟. - ليه، حيقولوا كده ليه؟! • عشان عملت المحضر، سمعت انهم قالوا إن ربنا غضبان علي عشان مش عاوز أسمع صوت الأذان ولا الصلاة. - أستغفر الله العظيم، مع أن كل الجيران في العمارة كانوا مبسوطين إنك عملت المحضر وإن الصوت بقي معقول، عشان اللي عيان واللي بيذاكر. • تصدقي إني متغاظ من الجيران دول أكثر من اللي في الجامع. - إزاي، وليه، باقولك كانوا مبسوطين قوي. • يعني كانوا زينا منزعجين من الصوت بس ماحدش فيهم خد خطوة إيجابية حتي لما عرفوا اني رايح القسم، ولا واحد رضي ييجي معايا. - يمكن كانوا مشغولين. • لأ.. كلهم كانوا خايفين من اللي حيتقال عليهم. - إيه اللي حيتقال عليهم؟ • زي اللي قالوه عني، بس فيه حاجة تانيه. - إيه؟ • هم في قرارة نفسهم مش عارفين إذا كان صح ولا غلط. - هو إيه ده؟ • إن صوت الجامع يضايقهم. -هه.. عندهم حق برضه. • يا شيخه.. إذا كان انتي اللي صممتي أروح القسم أعمل المحضر، ولآ نسيتي. - أنا!! مش ممكن.. محصلش. • لأ حصل، وفضلتي تصرخي وتقولي البنت حتسقط في الامتحان. - آه صحيح، ما هي البنت كانت بتعيط ومش عارفة تذاكر. • طيب، ليه بقي بتقولي إن الجيران عندهم حق. - مش عارفه، الموضوع حساس. • أنا متأكد ان اللي بيعملوه ده ما يرضيش ربنا، المفروض الصوت يسمع اللي بيصلوا بس. - إلا صحيح، مش من كام شهر كده عملوا الأذان الموحد ووطوا صوت الميكرفونات. • فعلا. - طيب إيه اللي حصل دلوقتي، رجعنا تاني كل جامع ميكرفون ويتنافسوا مين اللي صوته أعلي من التاني. • مش في كل حته، فيه أماكن لسه ماشيه عليه، بس فيه حتت كتير بطلت الأذان الموحد خالص. - بس عندنا إحنا الصوت بقي أعلي من الأول، ياخوفي من رمضان. • اشمعني رمضان. - عشان صلاة التراويح، لا بأعرف أركز في صلاتي ولا حتي في قراية القرآن، تصدق بأفضل أقول حسبي الله ونعم الوكيل، بقي ده يصح. • لأ ما يصحش. - وإزاي الحكومة ساكته وسايباهم كده؟! • ما هو تلاقي الحكومة نفسها خايفه أحسن يكون حرام إنهم يوطوا صوت الأذان. - تعرف بقي أنا متهيألي إن السبب هو برامج التليفزيون. • قصدك إيه؟ - مش شايف كل القنوات وكل البرامج مابقتش تلاقي ضيوف غير الإخوان والسلفيين. • هم كتير قوي فعلا، بس إيه علاقة ده بالكلام اللي احنا بنقوله. - ما هو أكيد طبعا إن دول رأيهم إن لازم الأذان يبقي عالي والصلاة كمان. • وإحنا نمشي ورا كلامهم ليه؟! - الناس خايفة منهم، وهم طلعوا وانتشروا زيادة عن اللزوم. • إزاي يعني؟! - شوف يا سيدي، الناس دي منظمة وعندهم فلوس. • وبعدين. - تصدق أم سيد بتقول انهم بقوا يجيبوا أنبوبة البوتاجاز لغاية البيت وبخمسة جنيه بس. • معقولة!! طب وبيجيبوا الأنابيب دي كلها منين؟ - من أي حته وبأي ثمن، المهم شوف بقي لما يعملوا كده أكيد أي حاجة حيقولوها لأم سيد حتصدقها وتعمل لهم اللي هم عاوزينه. • ده موضوع خطير جدا. - عارف إمبارح لقيت عربية نقل كبيرة قوي واقفة قدام الجامع، عرفت علي طول إنها حتوزع حاجات علي الغلابة. • والعربية دي منين؟ - مش مكتوب عليها حاجة خالص. • وبعدين، فعلا وزعوا حاجات!! - آه، كل واحد ييجي ياخد كرتونتين، المهم أن اللي بيوزع ماسك في إيده كشف، يعني الأسامي مكتوبة. • المهم، الكراتين فيها إيه؟ - لو شاطر تقول. • أكيد رز وزيت وسكر. - أنا زيك كنت فاكره كده، وبعدين سألت البواب تصدق كان فيها أكياس بطاطس مقرمشة. • نعم!! - تفسر ده بإيه؟! • تلاقي صاحب المصنع تبعهم. بس المهم إن ده موضوع خطير، الناس لازم تفهم إن اللي بيحصل ده غلط. - عندك حق، بس الناس حتفهم إزاي؟ • لازم نلاقي طريقة. - أنا عندي رأي. • قولي، من زمان ماتحفتنيش بآرائك. - المفروض البرامج تبطل تستضيف الناس دول خالص. • إيه الكلام الفارغ ده، إحنا حنرجع تاني زي الأيام السوده اللي قبل الثورة!! - مش حنرجع، مافيش حاجة اتغيرت من أصله. • إزاي يعني؟! - يعني زمان ماكنتش البرامج بتجيبهم، دلوقتي مش بتجيب غيرهم. • مش للدرجة دي. - ركز شوية. واسأل نفسك فيه يوم بيعدي من غير ما نلاقي واحد منهم في برنامج أو اتنين؟! • لأ، بس فيه غيرهم كتير. - مش قدهم، البرامج بتتسابق عليهم ومن غير ما ياخدوا بالهم بيعملوا لهم دعاية.. أو جايز واخدين بالهم وقاصدين. • اسمعي بس، بلاش ندخل في النوايا، لكن تعالي نتكلم بالعقل. - اتكلم. • لما يكون الناس دول عندهم أفكار غلط، يبقي إحنا نمنعهم ولا الأفضل نجيبهم ونتناقش معاهم ونوضح للناس الصح من الغلط!! - الكلام ده لو الناس عندنا متعلمة وفاهمة، لكن اللي أنا باشوفه غير كده. • ازاي؟! - عندك أم سيد. • يادي أم سيد. - ما هم دول اللي المفروض نخاف عليهم. • مالها. - كنت باتفرج علي برنامج وهي بتشتغل، واحد سلفي عمال يقول كلام مستفز ع الآخر. • كلام إيه يعني؟ - مش فاكره، مش ده المهم، المهم إن واحد اتصل في التليفون وفضل يقول كلام عاقل جدا ومن القرآن والأحاديث الشريفة. • كويس. وبعدين. - السلفي قاله، أنا دارس شريعة، وإنت لأ. بس لقيت أم سيد جايه تقول نفس الكلام، ومش فاكره غير ان الراجل مش دارس وده معناه إنه ما يعرفش في الدين. • كنتي فهمتيها. - حاولت، قلت لها ده قال آية في القرآن، ولا كأني باتكلم. • الجهل ده حاجة وحشه فعلا. - عشان كده باقولك، لازم ناخد بالنا، علي الأقل لما يستضيفوا واحد سلفي يكون متفتح شويه وفيه كتير. • ما هم مش بياخدوا بالهم من المتفتحين دول. بياخدوا بالهم بس لما حد يقول كلام مثير. - يبقي عندي حق. • مش عارف. - مش عارف إزاي، ما أنا باقولك أهو. • مهما كان، ماينفعش نستبعد حد، دي بلدهم زي ما هي بلدنا. - ولما هي بلدهم، مش خايفين عليها ليه؟! • عندك حق، يبقي لازم نلاقي حل تاني. - زي إيه؟ • نركز عليهم هم. ونحاول نغير أفكارهم. - لا يا شيخ.. بالذمة. • أنا معاكي إنها صعبة بس نحاول. وعموما أنا متفائل والموضوع محتاج صبر. - نصبر لغاية إمتي؟ • مش كتير المهم نبتدي. - نبتدي إيه؟ • نهتم بالتعليم، بالأطفال الصغيرين، عشان دول في المستقبل اللي حيغيروا البلد للأحسن. - طب و...... • إيه. - يعني لو.. • مش سامع، استني لما أدان العشا يخلص.
