عبر مهاجم إنبي، أحمد أمين "أوفا"، عن أمنيته باللعب جوار شيكابالا، خلال تصريحاته ببرنامج "الريمونتادا" على قناة المحور. قال "أوفا": "أول الموسم مكنتش بلعب عشان مصاب، لما رجعت قدرت اشتغل على نفسي وأنهيت الموسم ب 10 أهداف، كان نفسي أسجل أكتر، لكن الموسم الجديد هيبقى حاجة تانية". وأضاف: "لو كنت خدت الفرصة في سيراميكا مكنتش همشي وهكمل، دا نصيب إني ملعبش ف سيراميكا عشان أروح إنبي، ولما إنبي كلمني مترددتش، إنبي نادي كبير وليه اسم في الدوري، وقدرت أشارك مع إنبي وامشي بصورة إلى حد ما كويسة". تحدث أحمد أمين، عن المدربين في مسيرته، وقال:"علاء إبراهيم في الشرقية للدخان هو اللي فرق معايا وليه الفضل في اللي وصلت ليه لحد دلوقتي، كل المدربين محترمين الفكرة إن مدرب مقتنع بيك ومدرب لا، مش معنى أنه ملعبنيش إني أقول عليه مدرب مش كويس أو اقطع فيه". أكمل: "المدرب بيكون عنده وجهة نظر، شايف إني مش هفيد الفرقة أو إن دا مش وقتي، بحترم قرارات كل المدربين كنت بشتغل على نفسي وعارف إمكانياتي وقدرات نفسي، وإني لما هاخد هلعب وقدرت اشتغل على دا، كنت في الأول مصاب وبعد 6 ماتش بدأت أظهر، أول 5 مباريات من الدور الثاني كنت مسجل 3 أهداف فقط لكني قدرت أنهي الموسم مسجل 10 أهداف". تابع، "بعض الناس بتقولي زمالك، بيراميدز، البنك الأهلي، دا كله مببقاش عارفة كله مع وكيلي، كان فيه عرضين من ليبيا، النصر الليبي وأهلي طرابلس الليبي، مستر أيمن مش عايز يمشي حد ومش مقصر معايا في حاجه، هو مش عايز يمشيني وأنا تحت أمر النادي لو عايزيني أكمل هكمل". واصل عن عرض الزمالك: "النادي تواصل مع الوكيل بتاعي محدش تواصل معايا أنا، شرف لأي حد يلعب في نادي الزمالك، الكورة مفيهاش زمالكاوي ولا أهلاوي، الكورة بتبص لمصلحتك وتقعد بينك وبين نفسك تحسبها لو روحت الزمالك هتلعب، لكن محدش يقدر يفكر هيلعب في الزمالك ولا لا". أشار أحمد أمين إلى أن عقده مع إنبي يتبقى عليه 3 سنوات، ولا يملك الانتقال للزمالك، حيث يجب الحصول على موافقة المدرب، وفي حالة الموافقة لا يمانع الانتقال للقلعة البيضاء. ووصف "أوفا" شيكابالا بالأسطورة، مضيفًا:: "هقدر أسجل أهداف كتير لو لعب جنبي".
