تحدثت المطربة إيناس عز الدين عن المراحل المختلفة التي مرت بها؛ قبل مرضها وفي أثناء علاجها وبعد خضوعها لعملية نحت الجسم، حيث نشرت عبر حسابها على موقع فيسبوك، ثلاث صور تبين الفرق بين كل مرحلة. وعلقت "عز الدين" على الصور قائلة: "كل مرحلة في المراحل دي كان عندي ثقة بنفسي ورضا وكنت بحب نفسي فيها ومؤمنة بإن جوهري ومضموني أهم بكتير من شكلي الخارجي ومع ذلك كنت شايفة نفسي حلوة في كل وقت، وكل مرحلة اتعلمت فيها حاجات جديدة واكتشفت في نفسي حاجات كتير ما كنتش اعرفها عن نفسي". وأضافت: "قبل كنت بريئة أوي لدرجة اني كنت بتصدم كتير واتوجع أكتر من كل اللي حواليا من كتر عشمي فيهم، ما كنتش لسه اصطدمت بشكل كافي بقذارة الحياة.. وأثناء كانت رحلة طويلة من المرض والألم الجسدي والنفسي بسبب صدماتي الكتير في الحياة وفي الناس لما بدأت تظهر حقايقهم واعرف مين بجد عدوي من حبيبي وقت الشدة والمرض والالم والمعاناة والاستسلام وكمان المرحلة دي كانت أهم نقلة في حياتي". تابعت "عز الدين": "بعد اتولدت إنسانة جديدة خالص فيها طباع كتير من القديمة بس اكتسبت طباع جديدة منها العند والقوة المفرطة والتحدي والأمل في نفسي وفي الحياة اكتشفت اني لازم أحب نفسي لأنها تستاهل إنها تتحب ومش هتعب ولا اتألم تاني وهتعالج صح وهبدأ اهتم بصحتي بعد ما أهملتها بجد واتعرضت للموت كتير بسبب إهمالي وإني دلوقتي عندي طموح وتحديات ما ينفعش استسلم قدامها ولازم أخوضها وعلى ثقة اني قدها وهنجح فيها وعلى يقين من ده". وأردفت: "بس الأكيد إن المرحلة اللي في النص كانت أهم مرحلة في حياتي لأنها هي اللي صنعت واكتشفت إيناس القوية الصلبة اللي مش بتتكسر بسهولة وتقدر تكسر بلد بحالها ومنها اتولدت إيناس بتاعة النهاردة اللي كلها إصرار وعزيمة وتحدي وقوة واللي هتبقى زي القطر هتدوس على أي إنسان يحاول يقف في طريق نجاحها وإصرارها أو يكسرها أو يقلل منها ومش هتسمح زي زمان بالمؤامرات اللي بتتعمل ضدها والحاجات اللي كانت بتحصل زمان من حواليا وانا بقف مستسلمة". واختتمت منشورها قائلة: "خلاص مافيش استسلام والجاي أحلى وأقوى علشاني وعلشان خاطر كل إنسان حبني وشجعني وآمن بيا وكان معايا على المرة قبل الحلوة وبقولكم دلوقتي خلاص المُر راح واللي جاي كله حلو وأحلى وأحلى.. ومحضرالكم مفاجآت كتير ما تتوقعوهاش".
