رغم صغر حجمه وخبرته البسيطة بالدوري المصري.. إلا أنه إستطاع أن يثبت أقدامه في مركز من أصعب مراكز الدفاع في القلعة البيضاء النادي العريق في مصر وإفريقيا.. واكتسب حب ورضا مديره الفني "حسام حسن" وجماهير الفريق.. وزملاءه.. هنعرف أكتر مين هو عمر جابر في السطور الجاية... كلمنا عن بدايتك لحد ما طلعت الفريق الأول؟ بلعب فى الزمالك من وانا عندى 6 سنين وكنت فى مدرسة الكره ولما عملوا المدرسه الأساسيه دخلتها وكنت كابتن فريقى وكابتن حسام حسن كان متعود أنه يحضر ماتشات الشباب والحمد لله طلعنى انا ومحمد ابراهيم للفريق الأول. ايه اللى كان دايماً بينصحك بيه كابتن محمود جابر؟ والدى له فضل كبير عليه ودايماً بينصحنى اعمل ايه جوه الملعب وبره الملعب كمان وبصراحه انا بستفاد منه كتير أوى ولما بيكون عندى مشكله هو أول واحد برجعله اكيد. منتخب الشباب في لاعيبة كتير في الفريق الأول لأنديتهم.. الموضوع ده بيضيف إيه للمنتخب لما يكون فى احتكاك مع لاعيبه كبيره فى الدورى ده هايكون له اثر كويس جداً علينا، انا و محمد ابراهيم بنحاول دايماً أن احنا نستفاد من الكباتن اللى لعبت افريقيا كتير علشان نقدر أن احنا نكسب البطوله و نظهر بشكل كويس فى كاس العالم إنشاء الله ايه كان دور الكابتن حسام حسن مع عمر جابر؟ كابتن حسام هو اللى له الفضل الأول بعد ربنا سبحانه على عمر جابر ولو ماكانش موجود ممكن ماكنتش اتصعدت للفريق الأول خالص ومشيت زى ناس كتير، لازم فى الوقت ده ارد الجميل للعميد انا وزمايلى بالحصول على الأقل على الدورى الموسم ده. شايف الزمالك طريقه عامل ازاى الموسم ده فى الدورى ؟ احنا الحمد لله الناس كلها شايفه الزمالك عامل ازاى الموسم ده و احنا اتعلمنا من الكابتن حسام إن احنا ناخد كل ماتش بماتشه ومانبصش للمنافسين، وكل تركيزنا فى الوقت الحالى فى ماتش الإتحاد اللى جاى إنشاء الله. كابتن حسام غير مركزك من خط الوسط للمدافع الأيمن.. كلمنا عن ده اختار لى كابتن حسام هذا المركز من أول ما تم تصعيدى للفريق الأول وبفضل الله ظهرت بشكل جيد وكابتن حسام كان شايف إنه يمكن إستغلال سرعتى فى مركز الظهير الأيمن ، وفى كل الأحوال أن تحت أمر الكابتن حسام حتى لو طلب منى ان العب حارس مرمى مافيش عندى مشكله. شيكابالا هو أقرب صاحب ليك... ايه أول حاجه قالها لك لما لعب مع الفريق الأول ؟ شيكابالا صاحبى من زمان من قبل سفره لليونان هو دايماً كان ينصحنى إنى ابعد عن الغرور وإنى اكون قريب من الجماهير وقبل ما اتكلم فى فلوس أو حاجه لازم اشوف الأول انا عملت ايه لفرقتى مين أحسن لاعب فى مصر؟ شيكابالا شيكابالا مظلوم إعلامياً؟ أكيد طبعاً ، الإعلام بيصور فى كتير من الأوقات حاجات مش صح عن شيكا. ايه الكلمه اللى تحب أن تقولها فى النهايه لجمهور الزمالك ؟ طبعاً بنعتذر للجمهور العظيم ده عن السنين اللى فاتت وبنوعدهم على الأقل بالدورى الموسم ده ونظهر إنشاء الله بشكل يليق بنادى الزمالك فى بطولة دورى ابطال افريقيا اللى جايه.
