يا مصر أنا شاعر أرياف وجبان وباخاف ليلبّسونى قميص الاكتاف أبو (كُم) طويل وأعيش حياتى بين مجانين ألعب فى الطين وأفتح المندل نوبتين وأقرا الفناجيل وأفتح الصبح عيونى أعدّ نجومى وما أقرا غير شعر(فاجومى) أبو حظ قليل وأنام بعيد عنك مكبوت مضروب شلوت وأحلم بجردل شاى مظبوط محروق وتقيل وأسكن ف عشة على سطوحك وأشفى جروحك وأقرا الفاتحة لروحك ولوادى النيل يا مصر أنا اللى عشقت الناس عشق بإخلاص وبنت حلوة تشيل بلاص والقد يميل وشربت مواويلك فى الكاس وبجد الفاس كتبت غنوة ف 100 كراس ويا ليل ويا عين وعشقت خد ورمش كحيل وشواشى نخيل وعشقت مرة جاموسة بديل جوه البرميل يا مصر أنا شاعر مطحون من جيل ملعون باقضى يومى ف غسل صحون وف نشر غسيل يامصر أنا شايل همك شارب غمك وحالف إنى ماجيش جنبك ولسانى طويل يا مصر أنا شاعر بصداع من دى الأوضاع باشوف كتير مخابيل انطاع مالهمش مثيل يا مصر راحوا فين ناسك فين حراسك فين اللى حرر أنفاسك فين القناديل فين اللى عبروا بمجدافك فين أشرافك الليلة بايت ف لحافك أبو دم تقيل الليلة عايش على خيرك أولاد غيرك أما اللى قال كتر خيرك مسجون ونزيل محمد العزب السيد معلم أول ثانوى- القاهرة- مطرية