»1« استدعاء منزلي سيب اللي في ايدك وتعالي شوفلك حل مع عيالك.. هكذا قالت لي زوجتي في التليفون.. كعادتها عندما يصل الحوار بينها وبين البنات إلي طريق مسدود ياولدي مسدود.. وبالطبع أنهيت العمل بسرعة لانطلق إلي البيت محاولا طوال الطريق تخمين المشكلة التي من الممكن ان تكون قد نشبت بين زوجتي والبنات.. وكالعادة ايضا فشلت في ان اتوقع طبيعة المشكلة قبل ان افتح الباب لتستقبلني الآنسة كلمات آخر عنقود البنات وهي تهمس في أذني قائلة: الحق يا والدي الفيس بوك مولع البيت!! وقبل ان افهم معني الكلام كانت زوجتي قد وصلت إلي باب الشقة حيث قالت لي قبل ان تدع لي حتي فرصة ان التقط انفاسي: بص بقي يا هشام يانا يالفيس بوك في البيت ده!!.. انا خلاص معدتش قادرة.. بناتك تقريبا مابيذاكروش خالص وكل ما ادخل عليهم الاوضة الاقيهم قاعدين علي الهباب اللي اسمه الفيس بوك ده سعادتك مش فاضي من شغلك ومقالاتك والنيولوك اللي عايز تعمله وسايبني لوحدي.. انت لازم دلوقتي حالا تصدر قرار بمنع الفيس بوك من البيت وإلا انا مش مسئولة عن النتيجة !!.. ثم ان الفيس بوك ده معلهوش أي رقابة ومش معقول حافضل قاعدة مراقباهم ليل نهار.. ! حاولت التهدئة من روع زوجتي فقلت: حكاية المنع دي مش معقولة.. احنا دلوقتي في زمن الشفافية والسماوات المفتوحة.. انما أنا عندي حل اسهل من كده يخليكي قاعدة مطمنة وحاطة في بطنك بطيخة صيفي.. الحل الوحيد في الحالات اللي زي دي انك تدخلي معاهم بنفسك علي الفيس بوك.. يعني تعملي لنفسك account ويبقي زيك زيهم.. اندهشت زوجتي واخذت تضرب كفا بكف وهي تقول: اعمل لنفسي ايه؟! فقالت يثرب account ياماما يعني حساب يعني تنضمي للفيس بوك.. فإذا بلقاء تتدخل في الكلام قائلة: هايل يابابا فكرة روعة.. وحضرتك كمان تعمل account وتبقي معانا علي الهواء انت وماما علي الفيس بوك وفي الحالة دي ممكن نتبادل الأفكار والمعلومات علي الفيس بوك.. فقالت اسرار: يابابا الفيس بوك دلوقتي هو البديل للعيلة بتاعة زمان يعني ممكن وحضرتك في الشغل واحنا في المدرسة ويثرب في الجامعة وماما في البيت ندخل كلنا علي الفيس بوك ونحكي ونقول اللي احنا عايزينه بدال ماحنا مش عارفين نشوف بعض ولا نقعد مع بعض.. قلت وانا اتظاهر باني متردد قليلا: والله يعني هي فكرة مش بطالة.. فإذا بزوجتي تقول: جيبتك ياعبد المعين عشان تعمل علي العيال بلوك لقيتك ياعبدالمعين عايز تعمل حساب علي الفيس بوك.. فإذا بالمفعوصة وعود التي كانت آخر عنقود البنات قبل تشريف الآنسة كلمات تقول: ده حتي المثل التاني بيقول إذا كان رب البيت بالفيس بوك ضارب فشيمة أهل البيت كلهم الماسينجر.. صدقني يابابا الفيس بوك هيخلي حياتنا اسهل بكتير .. وفي الحالة دي مش هيكون عند ماما أو حضرتك أي مجال للقلق واللي حنعمله add كلنا هنبقي شايفينه وتقدر حضرتك وماما تشاركونا الكلام والصور والافكار ولو اعترضتوا علي أي حد معانا في الفيس بوك نعمل تصويت عليه وإذا الأغلبية قالت نحذفه يبقي نحذفه علي طول.. يعني ديمقراطية بقي يابابا وحاجات من اللي قلبك يحبها!!.. »2« أبوالليف قررت ان اطرق علي الحديد وهو ساخن فقلت لزوجتي: انا شايف ان ده هو الحل الوحيد المتاح في الظروف دي وفي كل الأحوال ياستي اهي تجربة ومش هنخسر حاجة والله لو نجحت يبقي خير وبركة ولو فشلت نقفل الصفحة ويادار ما دخلك فيس بوك.. لازم ياروحي نكون عارفين العالم بيحصل فيه ايه.. العالم كله دلوقتي موجود علي الفيس بوك ده حتي المطربين بدأوا يعملوا اغاني مخصوص للفيس بوك.. فإذا بيثرب تقول: ايوه يا ماما حضرتك ماسمعتيش أغنية أبوالليف الجديدة عن الفيس بوك؟!.. اندهشت زوجتي وقالت وهي غير مصدقة: ابو ايه انتي كمان هو فيه مطرب اسمه ابوالليف وكمان بيغني عن الفيس بوك وبعد ده كله عايزيني اعمل حساب علي الهباب ده؟.. فقالت لقاء: بلاش ابوالليف ياماما اذا كان اسمه مزعلك طيب ايه رأيك في نانسي عجرم شخصيا قررت انها تغني للفيس بوك؟!.. فإذا بزوجتي تنظر لي من فوق لتحت وهي تقول: اااااه بقي الحكاية فيها نانسي عجرم كمان؟! وإذا باسرار تزيد من الطينة بلة وهي تقول: مش بس كده لا ده نانسي واليسا وهيفاء وفنانين كتير ليهم account علي الفيس بوك يعني ممكن يعملوا لأي حد فينا add واحنا نوافق وكله يدلع نفسه.. فإذا بزوجتي تصرخ قائلة: ايوه كده بان علي حقيقتك.. سعادتك بقي عايز تقعد علي الفيس بوك ترغي مع مقاصيف الرقبة دول!!.. فقالت وعود: ماتخافيش ياماما احنا ناخد علي بابا تعهد ان لو أي نجمة من دول عملتله add هو يعملها ignor علي طول.. فقالت زوجتي: يعملها ايه انتي كمان؟! فقالت الصغيرة كلمات: ماتتخضيش ياماما.. بيتهيالي ignore دي يعني خطوبة بس مش كتب كتاب!.. فإذا بوعود تنهرها قائلة خطوبة ايه وجواز ايه يا عديمة اللغات انتي ignore يعني تجاهل .. ثم نظرت لامها وهي تقول: اعتمدي علي الله ياماما واتفضلي معانا علي الفيس بوك.. ثم همست في اذني قائلة: ماتقلقش يابابا مستورة ان شاء الله!! »3« نانسي علي الخط لم اصدق نفسي في اول يوم لي علي الفيس بوك وانا اري نانسي عجرم بتعملي add واذا بي اتذكر الحوار والتعهد بأني لازم اعمل ignore لأي واحدة تطلب اضافتي لان الهدف الاساسي من دخولي وزوجتي هو تفعيل الرقابة علي البنات من خلال التواجد معهم علي الفيس بوك ولكن شيطان النفس اخذ يوسوس لي قائلا: معقولة يعني تكسف نانسي عجرم؟؟ ده حتي مش حلو في حق المصريين كلهم.. دي سمعة مصر مش أي حد.. بقي الست تقول علينا ملوك الجدعنة ودي حاجة في دمهم وعاشقاهم انا واتمني قربهم وتيجي انت في لحظة طيش تعمل ignore وتكسر خاطر البنية وتتجاهلها كده؟.. ده كانت ايدي تتقطع قبل ما اعمل تجاهل لنانسي.. ثم انا دلوقتي في الشغل مش في البيت ولو دخلت علي الفيس بوك ولقيت مراتي والعيال موجودين في نفس اللحظة اقوم اعمل sin out ولا من شاف ولا من دري.. وفي لحظة وافقت فإذا بها تقول لي: ازيك يامشمش!!.. فاعتقدت انها ربما غلطانة في العنوان لدرجة اني تلفت حولي لاتاكد انها تقصدني انا بل زيادة في التأكيد قلت لها علي طريقتها: ايه قولي تاني كده.. مين؟ تقصدني انا؟ فإذا بها تقول: ايوه يا اسمراني انت.. مش انت اللي بتكتب انا والمدام والعيال كل خميس في الاخبار؟.. خبطت دماغي بكف ايدي وانا غير مصدق لما اقرأ علي الكمبيوتر وقلت: وكمان متابعة لمقالاتي اهلا اهلا ايوه يا ست نانسي انا هو.. هو بغباوته متاخذنيش اصل دي اول مرة ليا علي الفيس بوك ومكنتش متخيل اني اول ما افتح الاقيكي قدامي.. انا تحت أمرك.. فإذا بها تقول: عايزة الأول اسألك سؤال مهم هيحدد شكل علاقتنا.. انت صحيح متجوز وعندك خمس بنات؟ تلعثمت قليلا ثم قلت: مين؟ أنا؟ ااااااه يكونش قصدك بنات اختي.. انا فعلا باعزهم جدا وباعتبرهم زي بناتي.. فإذا بها تقول: طمنتني ده انا كان نفسي من زمان اكلمك بس كل ما افتكر مراتك وبناتك اتراجع.. عموما مش مشكلة لسه قدامنا العمر طويل نقدر نعوض كل اللي فاتنا.. اسيبك دلوقتي عشان بدأت اتدرب علي اللحن الجديد.. اوعي تتاخر عني بكرة انا ماصدقت لقيتك!! اسرعت إلي احد الاصدقاء من خبراء النت والفيس بوك لاخبره بما حدث لي فإذا به يضحك لدرجة انه اوشك ان يستلقي علي قفاه من شدة الضحك ثم قال: يابني هي نانسي فاضية للكلام ده؟ دي اكيد واحدة عادية أو حتي واحد مسمي نفسه نانسي عشان يشتغلك.. قلت مندهشا: يا ابني دي كانت حاطة صورتها!! فإذا به يقول: وايه يعني ماهو أي واحدة تقدر تسمي نفسها نانسي وتحط صورتها!! في هذه اللحظة بدأت اشعر بالقلق واسرعت إلي البيت لكي اطمئن بنفسي علي حقيقة ما حدث.. وبمجرد ان دخلت الشقة اذا بكلمات تتشعبطني وهي تهتف قائلة: تعالوا ياولاد خالو جه!! وهنا ادركت ان نانسي التي كنت اتحدث معها لم تكن سوي زوجتي التي لمحتها وعيناها بتطق شرار حيث همست كلمات في اذني قائلة: مكانش العشم يابابا تبيع عيالك عند أول نانسي.. فإذا بزوجتي تشهر ساطورا كانت قد اخفته وراء ظهرها فالقيت بكلمات وانا اقول بصوت عال: انتوا فهمتوني غلط انا كان قصدي اقول ان الخال والد برضه.. واخذت اردد كلمة الخال والد باسلوب هيستيري حتي فوجئت بزوجتي توقظني من النوم وهي تعطيني كوباية ميه وتقول لي: خير اللهم اجعله خير.. المرحوم خالك ميت بقاله خمس سنين ايه اللي يخليك تحلم بيه دلوقتي؟!
