نص الحوار الذي دار بين خالد صلاح وبين شخص يدعي عمرو يقال أنه نجل ممدوح إسماعيل صاحب عبارة الموت : خالد صلاح :أخبارك إيه عمرو :كله تمام الحمد لله خالد صلاح :استني هاحط السماعة عمرو:ماشي خالد صلاح :واحشني عمرو:وأنت كمان يا باشا ضحك من الطرفين خالد صلاح :أخبارك إيه عمرو :كله تمام عمرو:حلوة قوي المقالة بتاعتك خالد صلاح :ربنا يخليك ..المقالة !..انت شفت المقالة ؟! عمرو :خليت وليد-وليد مصطفي رئيس مجلس إدارة اليوم السابع - يقراهالي يا باشا ضحك من الطرفين عمرو :لا خليته يتصفحلي الجورنال كده علي السريع عقبال ما توصلي وبعدين المقالة بتاعتك خليته يقراهالي ..حلوة قوي ..يعني بص والله العظيم "الكونتانس "بتاعتها هايلة هايلة . خالد صلاح :وبأدب عمرو :وبأدب وبكلام وبتاع ..عايز أسألك سؤال بقي يا باشا ..انت ليه قاصد تقطعلي الخلف كل ما تطلع علي التليفزيون ؟ خالد صلاح : بص يا عمرو وركز معايا واحدة واحدة ..دلوقتي إحنا طالعين علي أرضية ان احنا جريدة رجال اعمال ..وسيبك من اشاعة ان ممدوح اسماعيل بيمولنا ..والكلام اللي الناس في السوق بيقولوه وهو غير صحيح ..ماشي سيبك من اننا نطلع نقول كدة ..احنا متهمين اننا جريدة رجال اعمال ..فمش هتبقي مع الناس وهتبقي مع الحزب الوطني ..وخالد صلاح اصلا هو معتدل فبالتالي هما بيأهلوه علشان يطلع يبقي حاجة تانية في المستقبل وممكن يكون الحكومة دعماه . يكمل خالد صلاح : أنا النهاردة مقدرش أروح في صف الاخوان ولا في صف أي حزب معارض تاني ..وانا علي الهواء النهاردة اتكلمت علي حزب الوفد كويس وقولت ده حزب أنا شخصيا بحبه ..اتكلمت علي الناصريين وقلت ان انا كنت حاضر مؤتمرهم ..وكان لازم اختم بطريقة تبين إن انا مش مع الحكومة لان الجورنال لما يتوصف انه مع الحكومة يبقي فيه خطورة شديدة جدا عليه .. فا باعمل ايه دلوقتي انا كل شوية اضرب وألاقي .. أضرب وألاقي .. وقاعد عمال أقول ايه الأستاذ جمال مبارك فيه مشروع في الحزب سواء نزل كذا او نزل كذا . خالد صلاح :لازم الناس تحس ان فيه شجاعة في شخص رئيس التحرير عمرو :متفق معاك بس عايز اقولك علي حاجة يعني فيه حتة انت كنت حتي أيدتها ورجعت خالفتها تاني لما قلت انه هو مؤهل -يقصد جمال مبارك – ورجعت قلت انه هو في المنصب فاهم أقصد ايه .. يعني هو مش هاينزل عشان هو مؤهل – يقصد الترشح للرئاسة –علي قد ما هينزل علشان هو في المنصب خالد صلاح مقاطعا :أنا بقول ان هو في موقع المسؤلية يعني جمال في موقع المسئولية . عمرو مقاطعا:يعني دين أمه ..يعني مش لاقي غير أيمن نور ..ما تخترلك أي واحد تاني يناظره. خالد صلاح :طب اديني ..لو انا قلت أي حاجة تانية ..انا قبلها بدقيقتين شاتم في الوفد وبقول ان الوفد تراشقوا بالرصاص مع انه حزب كبير .. لازم شويه كدة خلي بالك ده مش آخر لقاء تليفزيوني لازم نضرب في حته ونلاقي في حتة يا عمرو علشان الناس . يقاطعه عمر :اعملك رصيد معاهم ..بص خلي ايه ..يعني بنتناقش مع بعض ..فاهم أقصد ايه ..عشان نقد ايه ..يعني عارف لما تبقي بتدردش في موضوع ..يعني اعمل رصيد واعمل اللي انت عايزه بعد كدة فاهم. خالد صلاح :يعني الرصيد اللي لازم يتعمل دلوقتي رجل الشارع ..الشارع لازم يحس ان الجورنال ده مش جورنال سهل ..ولا جورنال ممكن يكون بيجامل الحكومة في شئ عمرو :يا حبيبي ما الجورنال النهارده ..مأنت النهاردة مش طالع هادي برضه ..فاهم أقصد ايه يعني ما فيش محاذير فيه ..أنا بكلمك ..في حاجات انت بتقولها ..فاهم أقصد ايه خالد صلاح :انا فاهمك كويس عمرو :بس خللي بالك ده مخه صغير يعني –يقصد جمال مبارك-. خالد :أنا بدعوك انك ما تقلقش صدقني ما تقلقش انت لو شفت النهاردة هالة مصطفي عاملة ايه في المصري اليوم ..يعني المصري اليوم فيه حوار لهالة مصطفي شاتمة فيه جمال شخصيا عمرو :مين هالة مصطفي ؟ خالد صلاح:هالة مصطفي دي كانت في امانة السياسات وكانت من المقربين جدا لجمال طالعة النهاردة شاتماه ..انت النهاردة بتقول انا من هنا لحد ست خمس اعداد مراهن علي الشارع ..ان الشارع يحس ان الجورنال ده بتاعه وانه مش جورنال رجال اعمال وانه مش جورنال مشبوه ..وانه مش جورنال متمول مش عراف منين .. ولازم الناس تاخد الرسالة بكل الطرق ..بس في نفس الوقت تيجي تبص للعدد تلاقي عدد فيه انت لما تلاقي صاعدون وهابطون –قسم للشتيمة والمدح في وزراء وشخصيات عامة –عندي وزراء يا راجل محييهم وعندي ناس تانية محييهم ويكمل خالد :وبعدين خد بالك يا عمرو انا برضه في ناس بيتصلوا بي من الكبار .. من الكبار قوي يعني من الي ... يقاطعه عمرو :أيوة ما انا فاهم انا عايزك تعيشني معاك في الصورة فيه ؟ خالد صلاح :لا عايز اقولك ان فيه بمنتهي الامانة اهم وأنظف وافضل مؤسسة وأشرف مؤسسة واخلص مؤسسة في مصر مبسوطة من الجورنال ومبسوطة مننا مش ها قولك اكتر من كده . عمرو طب ما توضحلي ايه اهم واشرف واخلص لخبطتني اكتبلي طيب مش لازم تقول –يقصد ان يكتب له الاسم علي غرفة الدردشة المفتوحة بينهما علي الانترنت –حطها علي الشات كده وبعدين ما تقولش اسمي ولا أنا أقول اسمك يكتب خالد صلاح علي غرفة الدردشة علي الانترنت حيث يسمع من التسجيل صوت دقات أصابعه علي لوحة المفاتيح الخاصة بالكمبيوتر عمر :ايه ياعم ده انا مش عارف أقرأ ..طب اكتبها بالانجليزي ..الانجليزي العربي عشان انا مش عارف أقرا يكتب خالد صلاح مرة اخري ويسمع صوت لوحة المفاتيح عمرو :أه خلاص خالد صلاح :فيه أفضل من دول عمرو لا مافيش بس خلي بالك ان الصغير دماغه صغيره وانت اكيد عارف الكلام ده يكتب خالد صلاح فيسأله عمرو :بعد الاصدار ولا قبل ؟ ها بعد ولا قبل ؟ يكتب خالد مرة اخري ويرد عمرو :طب هايل خالد صلاح :بص أنا ما بعتقدش ان فيه .؟.طب خليني أقولك ان ..ثانية واحدة عمرو :انا ما عنديش شك في ذكائك ..بس انا بتلاقيني الفترة دي بسألك ليه يكتب خالد صلاح مرة أخري علي الشات ويقول :ولا حتي بابا عمرو :لا خالص خالد صلاح :بص مش عايز أقولك ان الدواير ... عمرو :بس ما هو خللي بالك لازم تفهمني الخيوط ماشيه ازاي فاهم أقصد ايه علشان أبقي فاهم خالد صلاح :بص فيه ناس محترميين جدا جدا وشايفين احنا سواء من شغلنا علي الانترنت او من اللي طلع في العدد الاول بيقول ان احنا ماشيين في خط وطني محترم وان مصر هيا الاساس ..احنا معندناش أي موقف داخلي ولا يضر سياسات بلادنا .. بل علي العكس ان الكلام اللي بيدور في كل الدوائر المحترمة في البلد انه احنا ما بنزعلش من النقد طالما النقد ده نقد بناء وطالما ليه اساس وطالما بيهم مصلحة البلد يكمل خالد :أنا لما يجي حد يكلمني من امن الدولة ولا من الحزب ولا من أي حد كبير تاني بقولهم كلمه واحدة ادوني فرصة ..انا مع النظام وانا مع الدولة دي وانا مع ان النظام ده يبقي وانا شايف ان الحزب الوطني ..والكلام ده أنا مش "هاجخ "-أكدب بالمصري العامي –عليك انت يا عمرو .. أنا شايف ان الحزب أقوي وأفضل من أي حد تاني بس كل الحكاية ايه ..وقولتلهم كدة بوضوح بس ادوني فرصة اضبط وضعي في السوق أنا معايا ناس مساهمين ودافعين دم قلبهم ما ينفعش ان انا اطلع اقولهم ما علش ما وزعناش غير 3 آلاف نسخة ولا وزعنا زي روزاليوسف .. ما قدرش احنا عايزين نظبط في السوق ربنا يكرمنا يارب علي معدلات كويسه تليق بالسنة الاولي يعني مش عايزين نسمع 8أو 9أو 10ألاف ... عمرو :هو أول عدد باع كام ؟ خالد صلاح :احنا كنا طابعين 50 ألف باع 35 ألف وحتي بتوع التوزيع في الاهرام قالوننا ان ما فيش عدد بيعمل كده في الاول بس أنا بقي من قلبي ما برضاش ليه لان انا بقول لا ده تحت تاثير ان فيه سمعة كويسة من الموقع فاحنا مطلوب مننا ان احنا نحافظ علي الاتنين و احتمال ينقصوا العدد اللي جاي وده طبيعي نفقد مثلا كام 8أو 6 لكن ما نفقدش 10و15. عمرو مقاطعا :انا عيز أقولك ان فيه 3 أسباب علشان يبقي واضح للحساسية اللي عندنا واحد (جهلنا بالمهنة )اتنين (الموضوع التاني وانتي عارفه) ثالثا (الموضوع اللي جايللي فيه أمين ) خالد صلاح :تمام عمرو :فاهم أقصد ايه ؟ الموضوع اللي جايللي فيه امين ده ..ده عشان ايه حتي للي بيدعبس ما يعرفشي يلاقي فهمتني انا أقصد ايه –يقصد معرفة أصحاب الجريدة الأصليين والمساهمين من الخارج –بس خالد صلاح :يومئ بالمعرفة عمرو :بس هما دول الثلاثة اللي مخليين الواحد ايه بيسأل ..بيبقي عايز يتكلم معاك يعرف ايه الموضوع فاهم أقصد ايه خالد صلاح :تمام ..تمام عمرو :أما النفس فأنا بأطمنك إن النفس طويل ..طول ما جلناش لمبة حمراء –يقصد بالنفس تمويل الجريدة واللمبة الحمراء تحذير من السلطات –فاهم أقصد ايه
خالد صلاح :واحدة من الحاجات اللي هاتشوفها في العدد التاني إن لا انا ولا الراجل الكبير ولا اللي تحت منه موجدين اصلا في العدد ولا صفحة والشغل كلة ماشي في سكة تانية خالص لان انا بقول والرسالة بتاعتي ..أنا حتي في الموضوع اللي انا كاتبة عن الحزب مش كاتب اسماء صفوت الشريف ومش كاتب أي حد عمرو مقاطعا :لا وكتابة رسالة منطقية جدا ..يا جماعة دة حلم جميل بس اعملوة صح خالد صلاح :بالضبط كدة ..أنا بحط رجل في حتة والرج التانية في حتة تانية هو ده طلبي ومش هاخد في الموضوع دة إلا 5 أو 6 اعداد صدقني وبعد كدة هاظبط في التراك اللي أنا عايزه .. النهاردة المصري اليوم ما حدش بيعمل منهم حاجة لانهم واخدين أرضية في السوق وانا محتاج الأرضية دي وبعدين ألعب زي ما أنا عايز يكمل :هاقولك علي حاجة من الحاجات الجميلة ..أنت عندك احنا مهاجمين رشيد محمد رشيد لكن عارف مهاجمينه علي لسان مين علي لسان محمد نصير اللي هوه واحد من اهم رجال الاعمال في مصر ومقرب من رجال السلطة بيهاجم رشيد ..فانا مش ههاجم لله في لله ..انا هلعب في منطقة أضرب في حتة وألاقي في حتة لحد ما الجورنال ده يبقي ليه مصداقية عند الناس أول ما يبقي ليه مصداقية عند الناس نعمل اللي احنا عايزينه ويستطرد خالد صلاح :قضية أيمن – يقصد أيمن نور– هيا قضية جماهيرية ..أناعارف ان أيمن في جزء نصب كبير أنا عارف ده كويس جدا عمرو : بالضبط أيمن راجل نصاب أساسا انسي القضية اللي راح فيها مش دي السبب لكن ما يمنعشي اني انا متعاطف معاه إن نفسي يخرج كبني ادم لكن مش دي ..لكن ما عنديش استعداد ان اضرب رأسي في الحيط نظير واحد تاريخه مش نظيف اساسا ولا ...فاهم أقصد إيه يا خالد يعني مش عايز اخش في معارك تخللي حد يصغر دماغه خالد صلاح : لا انشاء الله مش ها يحصل لأن أنا هاقولك علي حاجة لطيفة جدا عمرو مقاطعا:خصوصا لازم تتوقع حاجة إن هاتلاقي اكتر من واحد بيدعبس في اللي كان قاله حمدي رزق خالد صلاح يوميء بالمعرفة ويقول :معاك معاك عمرو :دي اللي انا بلمها في الفترة دي مع سي عتريس اللي جايللي ده خالد صلاح :أه أه ..لا انشاء الله متقلقش وبقولك ان هما باين جدا في العدد التاني ان احنا متوازنين جدا ومعندناش موقف تجاه أي حد بل علي العكس احنا شاتمين الاخوان في صفحة او اتنين ..مهاجمنهم هجوم كاسح وباين جدا ان الجورنال ضد الاخوان وباين جدا ان الجورنال مش مع أي حد وباين جدا إن الجورنال مش قليل الادب لانه مش شاتم أي حد بل علي العكس بيوجه رسالة شيك وعايز اقولك أن أنا بعمل حاجات علي الهواء برجع أصلحها في الظل يعني بكلم واحد في امن الدولة أقوله مثلا كذا وأبعث برسالة للحزب الوطني أبعث ببوكيه ورد لعلي الدين هلال ..أنا عامل في الميزانية عاندي هنا مخصصات للحجات اللي بالشكل ده ..ببعث مثلا ورد ..كروت معايدة إعلان مثلا . عمرو :قولي يا باشا مش المفروض عز عامل معاك حوار –أحمد عز -؟ خالد صلاح :أه يا باشا ما هو العدد اللي جاي ..هو باعتللي رد كبير
