لم يكن احد يتخيل ان خبرا صغيرا نشرته مجلة اسبوعية يدفع سيادة الوزير الى منع الصحفيين من دخول وزارته والاعتداء بالضرب على عدد من كبار مساعديه ... -هوه احنا عملنا ايه معاليك عشان تضربنا بالبوكسات والشلاليت وتعمل لنا عاهات مستديمة؟؟؟!! -ما هو يا غجر لما يتنشر عني خبر بالشكل ده لازم افش غلي فيكم واضربكم بالجزمة القديمة!!!! -يا باشا سعادتك عارف ان اللي نشر الخبر الاستاذ مرجان في المجلة اياها!!!! ودا راجل طيب وعلى نياته وكان عايز يجامل سعادتك!!! -عايز يجاملني والا يخرب بيتي !!!! انتو تقبوا وتغطسوا وتجيبوا لي مرجان ده من تحت سابع ارض!!!!! والا والله العظيم تلاتة لأقطع عيشكم!!!!! وبعد ساعتين كان الاستاذ مرجان ماثلا امام الوزير ... -اهلا بالكاتب الكبير!!! اهلا بالصحافة الحرة!! نورت مكتبي والله !! ايه يا راجل الحلاوة دي كلها!!! -ربنا يخليك لينا يا معالي الوزير.... والف مليون مبروك ع الجوازة السعيدة وعقبال البكاري!!! -الله يبارك فيك يا مرجان!!! انما قولى... انت عرفت ازاي يا عفريت اني ح اتجوز تاني على مراتي أم عيالي!؟؟؟؟ -يا افندم معقولة يعني خبر مهم زي ده ح يستخبي على الصحافة!!! والله خير ما اخترت سعادتك فعلا الست لولو هانم سكرتيرة سعادتك!!!! اصل وفصل وحسب ونسب واخلاق عالية.... تربية بيوتات بصحيح !!! -وكمان عرفت اسم العروسة يا مرجان!!!!؟؟؟ واضح انك صحفي شاطر ومصادرك جامدة!!!! -يا افندم الناس كلها فرحانة لك ع الآخر!!! وطبيعي يفرحوا ما هو لما سعادتك تبقا فرحان ومبسوط ومزأطط ح تقدر تخدم البلد وتدي!!!!!! -أنا يا مرجان مش عارف اشكرك ازاي؟؟؟بس لازم تقوللي اسم اللي اداك خبر الجوازة عشان اشكره وأنفذه له كل طلباته!!! -هوه فيه غيره سعادتك؟؟!!!! تلميذك وحبيبك وبلدياتك ..عطوة بيه ابو خطوة وكيل اول الوزارة!!!! وهنا صرخ الوزير صرخة زلزلت مبني الوزارة ... -هاتو لي الزفت ابو خطوة من تحت الارض!!! وانت يا مرجان اتفضل من غير مطرود مش عايز اشوف خلقتك بعد النهاردة!!!!!!! وبعد دقائق كان عطوة بيه ابو خطوة في مكتب سيادة الوزير يتلقى الطريحة المتينة بعدها خرج في حالة دهولة غير عادية وفي يده قرار الفصل بتاعه!!!!! -اندهولي يا غجر الخربوطللي بتاع الاعلام من تحت طقاطيق الارض!!! وفي ثوان كان الخربوطللي ماثلا امام الوزير.... -أؤمرني يا معالي الوزير!!!! سعادتك تؤمرني أمر .. وانا عليا التنفيذ السريع!!!! -مش عايز جنس صحفي يهوب ناحية مكتبي ولا يدخل من أصله باب الوزارة !!!! -تحت امر جنابك!! بس القرار ده ح يعمل ازمة جامدة سعادتك مع الصحفيين اللي علاقتنا بيهم آخر حلاوة!!! -انا بقا وزير مجنون ومعقد ومانخوليا وباكره الصحفيين ومش عايز اشوف خلقتهم!!عاجبك يا سي هباب والا مش عاجبك؟؟!!! وهكذا صدر منشور عاجل بمنع الصحفيين من دخول الوزارة ..... -معقولة يا خربوطللي بيه احنا ممنوعين من دخول الوزارة ؟؟؟؟...ازاي بس سيادة الوزير ياخد قرار زي كده ؟؟؟!! -معلهش يا جماعة سامحونى انا عبد المأمور!!! وانتو عارفين كويس احنا هنا في الوزارة بنحبكم ونقدركم أد ايه؟؟؟ -طيب ايه بس اللي حصل!!؟؟؟ دا لسه سيادته كان معانا في مؤتمر السلام الاجتماعي وقعد يهزر ويضحك ويكتب النكت اللي كنا بنقولها عشان يحكيها للسيد رئيس الوزرا!!!! -ما انتو عارفين جنابه لما بيزعل ويتجنن وزرابينه بتطلع ممكن يعمل ايه!! وفي المجلة اياها..... -ايه الخبر المهبب اللي نشرته يا مرجان وخللا سيادة الوزير يتهبل بالشكل ده؟؟؟ -ابدا أنا نشرت خبر جوازته التانية في ركن الاجتماعيات وقلت ان سيادته ح يتجوز الخميس الجاي!! -وفيها ايه دي!!! ما سيادته فعلا ح يتجوز!!!!! وعطوة بيه ابو خطوة وكيل اول الوزارة عزمنا كلنا نحضر الفرح ونصور سيادته في الكوشة مع عروسته الست لولو هانم !!! -سعادته زعلان يا جماعة عشان الهانم مراته الاولانية أم عياله عرفت الخبر من المجلة قبل ما يمهد لها الموضوع ويديها فكرة!!!!! وفي اليوم التالي حاول الصحفيون دخول الوزارة لمقابلة سيادة الوزير.... -ارجوكم يا بهوات ما تقطعوش عيشي!! امبارح معاليه خصم نص شهر من كل العاملين في الوزارة ونقل الخربوطللي بيه من الاعلام ورفد عطوة بيه ابو خطوة !!! -ما اهو احنا لازم نقابله يا خورنج بيه !!! هوه ايه اللي حصل ؟؟؟؟!!! ما الدنيا كلها عارفة ان سعادته ح يتجوز تاني على مراته !!!!!وان العروسة هي لولو هانم السكرتيرة!!!!! -ارجوكم توطوا صوتكم وتتوكلوا على الله دلوقتي!! ولما سيادته يرجع من شهر العسل اكيد ح يكون رايق واعصابه هادية ويمكن يرجع في قراره!!!؟؟؟؟ لكن قرار المنع اثار دوشة جامدة في الصحف...... -يعني ايه الوزير مانعكم من دخول الوزارة!!! اكيد عملتوا مصيبة والا اتخانقتوا مع حد !!! ايوه ما احنا عارفينكم بتوع مشاكل وخناقات وبلاوي سودة !!! -ابدا والله!!!! دا سيادة الوزير مانع كل الصحفيين المصريين والعرب والاجانب من دخول الوزارة !! ومانع كمان القنوات الفضائية والارضية وشبكة الانترنت!!!!! -طيب والحل؟؟؟؟؟ -مافيش غير ان البهوات رؤساء التحرير يكلموا سعادته!!!! ويترجوه ويبوس ايديه ورجليه انه يرجع في قراره!!!!! لكن الوزير كان له راي اخر... -انا مش عايز مكالمات من رؤساء التحرير!! اي حد فيهم يكلمني قولوا له اني في اجتماع او بره الوزارة او اكلني قطر او اتحرقت بجاز !!! -تمام جنابك!!! بس العايق بيه رئيس تحرير البعكوكة اتصل خمستاشر مرة!!! ومصمم يكلم سعادتك ضروري!!! -واضح يا برطوشي انك سكرتير جاهل ومتخلف عقليا!!! انت منقول الواحات ومخصوم من مرتبك سبع شهور ونص!!!!! وهكذا لجأ الصحفيون الى النقابة .... -يا سيادة النقيب أكيد ما يرضيكش الوضع ده!؟؟احنا بقا لنا شهرين مش عارفين ندخل الوزارة ولا نجيب منها خبر يوحد ربنا!!! -ايوه يا زملا يعني ايه المطلوب بالظبط!!؟؟ -ابدا سيادتك احنا عايزين نقعد مع سيادة الوزير انشا الله مرة واحدة عشان نعمل معاه حوار نصالحه بيه!!! ومش ضروري سيادته يقابلنا مرة تانية بس يسمح لنا ندخل الوزارة ونقوم بشغلنا !!! وبعد محاولات التقي النقيب بالوزير.... -ياريت معاليك تسامحهم ما هم دول زي ولادك!!! ويا بخت من قدر وعفي !! وأكيد اللي اتكسر ممكن يتصلح!!!!! -يعني يرضيك يا سيادة النقيب ينشروا خبر جوازتي التانية ويعملوا لي مشاكل مع الهانم الاولانية ام عيالي؟؟! -طيب ولو نشروا تكذيب واعتذار بالبنط العريض في الصفحة الأولى يا ترى سيادتك ممكن تسامحهم؟؟؟ -طول ما الهانم الاولانية مانعاني من دخول الفيللا ح يفضلوا ممنوعين من دخول الوزارة!!!!!!! ومع اصرار الوزير على عناده ..... -انا باقول يا جماعة نعمل وقفة احتجاجية قدام الوزارة يمكن سيادته يحن علينا ويقابلنا!!! -بالذمة ده كلام!؟؟؟ يا اخوانا ما احنا ممكن نكتب عن الوزارة من غير ما ندخلها!!! ما قدامنا الناس اللي بيتعاملوا مع الوزارة وطالع عينيهم طول النهار في عز الحر!!! احنا نقابلهم ونعرف منهم المشاكل الموجودة وننشرها !!! لكن رؤساء تحرير الصحف الحكومية رفضوا معالجة الأزمة بهذه الطريقة ... -احنا مش عايزين وجع دماغ مع حد!!! اخبار الوزارة لازم تجينا من الوزارة ومختومة بختم النسر...هوه احنا ناقصين مشاكل؟؟؟ -يا بهوات ما انتوا عارفين كويس ان الوزير مانع الصحفيين من دخول الوزارة!! -والله ده مش شغلنا !!! انتو المندوبين بتوعنا في الوزارة ولازم تجيبوا لنا اخبارها بالطريقة السليمة وسيبكم من شغل البلطجة ده!!!! وكلوا عيش خللي ربنا يكرمنا ويكرمكم !!!! -يعني يا بهوات نروح نتخانق مع الوزير عشان يقابلنا!!! والا نتهجم عليه في الأوتيل اللي عايش فيه مع مراته التانية عشان يسمح لنا ندخل الوزارة من تاني!!! -والله ده مش شغلنا !! انت تقابلوه وتحلوا مشكلتكم معاه لوحدكم !! الجورنال مالوش دعوة بمشاكل الوزرا!! احنا مش عايزين مشاكل مع حد حتى مع الكناسين وبتوع مصلحة المجاري !!!!! وفي الجرائد المستقلة كان لرؤساء تحريرها موقف آخر...... -ان شا الله ما عن اهله قابلكم!! احنا ح نقاطع اخبار الوزير ونمنع نشر اسمه وصورته لغاية ما يقول حقي برقبتي!!!! -معقولة يعني ح نقاطع اخبار معالي الباشا الوزير !! -عادي جدا !!!! وح نقطع عنه النور والمية وبناقص وزارة من تلاتين وزارة!!! يعني هوه بيعمل ايه يعني؟؟؟!!! ما احنا بننشر تصريحاته الخايبة بقالنا سنين واحنا عارفين كويس انها كلام فارغ ولا بتودي ولا بتجيب!!! وبعد فترة من الزمن لجأ الوزير لنشر اعلانات مدفوعة لمواجهة المقاطعة ... -عملت ايه يا زعبولة في الاعلان بتاع بكره !! انا عايزه يتنشر في كل الجرايد!!! عايز المسئولين الكبار يشوفوا صورتي وانا فاشخ بقي ع الآخر وباشاور بصباعي ع الانجازات!!!! -اطمن معاليك!!! الاعلان منشور بكره على صفحتين في كل الجرايد!!! بس الجرايد المستقلة للاسف لسة واخدة موقف ورافضة تنشر !!!!! -ازاي الكلام ده؟؟!!! ادفع لهم اللي همه عايزينه هوه انا باصرف حاجة من بيت ابويا؟؟؟؟ ماكله من فلوس الوزارة!!! الاعلان ده بالذات لازم يتنشر قبل التعديل الوزاري !!! انا لازم اطلع في كل الجرايد وانا فاشخ بقى ومعايا الانجازات بتاعتي!! -يا افندم احنا حاولنا معاهم بكل الطرق بس للأسف مفيش فايدة !!! همه مصممين على موقفهم وبيقولوا الوزرا اللي زي سعادتك ما ينفعش معاهم غير المقاطعة لغاية ما يعرفوا انهم من غير الصحافة مالهمش لازمة!!!!!!!!!