يوميا تتفاقم مشاكل التحرش في مصر ، تتعرض بناتنا وأخواتنا لنوع خاص من القهر ، ليس فقط لانعدام الأخلاق وانما ايضا لانعدام الضمير وانعدام المسئولية من جانب الجهات التي يفرض أنها مسؤولة عن مكافحة هذه الظاهرة الحقيرة. هذا تقرير اخباري تكتبه صاحبته طالبة الحقوق التي تصادف انها كانت هدفا للتحرش نتركه كما هو بلغته العامية ، وبالقهر الذي ينضح من حروفه "النهاردة وانا مروحة اتعرضت لحادثة تحرش وانا ف عربية السيدات من أحد البياعين يعني نروح فين تاني كبنات عشان نحمي اجسادنا من الحيوانات المتحرشين والواقعة كالآتي: دخل البيه والمترو كان زحمة جدآ معرفش يتحرك جوا فضل واقف جنبي عند الباب حاول يحتك بيا كنت فاكراه مش قصده فبعدت شوية لقيته مصمم يقل ادبه ومد ايده طبعآ مسكتش وزعقت وشتمته وفرجت عليه العربية كلها وطبعا شوفت نظرات استغراب من الستات وكأني انا اللي غلطانه واللي تقولي حصل خير قولتلهم مش هسيبه غير ف القسم فردت واحدة عليا وقالتلي: ف واحدة تفضح نفسها يابنتي!! مركزتش ف كلامهم عشان مغلطش فيهم وصلنا محطة الدقي وطبعا مكنش عاوز ينزل بس من حسن حظي ان المترو كان زحمة جدآ واحنا ع الباب فشديته برا بسهولة وطبعا كان شكلنا مش طبيعي وف رجالة نزلت ع صوتي من العربية اللي جنبي كانوا فاكرين انه حرامي ولما قولت انه متحرش استغربوا ومشيوا!! وجي بعد كده عسكري الامن بردو كان فاكره حرامي وبيقولي سرق منك ايه قولتله ده متحرش فسكت واندهش وقالي كل ده عشان متحرش اومال لو كان سرق منك حاجة..وكأن جسمي ده مش ملكية خاصة ومش من حق حد يتعدى عليها!! العسكري حاول يلم المشكلة بس انا رفضت وطلبت اطلع لظابط الأمن ويوصلوني للقسم خده العسكري وانا مشيت معاهم وطلعنا ع مكتب الأمن كان ف ظابط صغير بردو افتكروا حرامي بحكم انه شكله محتاج ماديآ يعني قولتله لا ده متحرش وانا عاوزة اروح القسم اعمله محضر وطبعآ سكوت الولد كان ف صالحي لانه معترف بجريمته فالظابط سخر مني جدآ وقالي بصي احنا نضربهولك قلمين وندفعه غرامة وخلاص!!..قولتله لا هروح القسم واعمل محضر قالي هاتي بطاقتك وطلب بطاقة الشخص ده البطاقة ف الحافظة وكان جنبها كارنيه الجامعة فبص كمان ف الكارنيه وقالي عشان كده بقى عاملة قلق ودوشة قولتله عشان ايه..قالي طالبة حقوق وحافظة كلمتين ف القانون هتصدعينا بيهم!! قولتله انت بتكلمني كده ليه انا صاحبة الشكوى ع فكرة كلمني بطريقة احسن من دي قالي انتي هتعلميني ولا ايه انتي بتتنططي كده ليه ماتفوقي وشوفي بتكلمي مين..وطلب يفتش شنطتي!! ف الاول رفضت بس قولت اجاري الجو عشان شكله بيتلكك ومش عاوز يوديني القسم فقولتله انا هفتح شنطتي واطلع اللي فيها بايدي ومحدش يمد ايده ع حاجتي..ضحك ضحكة ساخرة جدآ وقالي ماشي ياهانم اخلصي! طلعت اللي ف شنطتي وكان فيها كتب للكلية وكشكول عليه ستيكر الحرية للجدعان وسكارف ورواية وكتاب رحلتي من الشك إلى الايمان لدكتور مصطفى محمود..اول ماشافه قام مسكه طبعآ اعترضت..قام قايلي انتي شيوعية يابت!! قولتله اتكلم كويس معاك بطاقتي وفيها اسمي وبعدين دي حاجة متخصش حد (مع اني مش شايفة ان ف علاقة بين الكتاب وبين الشيوعية) الباشا اتعصب جدآ قام ناده للمتحرش وقاله غور انت اما نشوف حكايتها قولتله ازاي يمشي انا جاية اعمل فيه محضر ايه الاستهتار والتهريج ده قام قايلي اسكتي خالص بدل مالبسك قضية لحد مايجي الريس يشوف شغله معاكي!! طبعا معرفش مين الريس ده واتلطعت نص ساعة ف المكتب مستنية الريس اللي جي وشكله رتبة تقيله عشان كلهم بيحترموه اوي قالي ف ايه..قولتله حصل كذا كذا قالي بصي ياانسة انتي من دور ولادي وانا مش عاوز اأذيكي ولو سبتك للظابط ده كان رحلك ع القسم ولبسك قضية بسبب الحاجات اللي معاكي!! وكده كده الواد اللي ضايقك مشي ومحدش هيعرف يعملك حاجة فخدي حاجتك وامشي قبل ماتلاقي نفسك متكلبشة ف الكرسي اللي وراكي! وطبعآ مبقتش قادرة اعمل حاجة لاني عارفة انهم مش بيهددوا وفجرهم يخليهم يعملوا اي حاجة وخدت حاجتي ومشيت وانا مخنوقة لدرجة اني مش عارفة اتنفس وحابسة دموعي بالعافية عشان معرفتش اجيب حقي..أد ايه الاحساس بالظلم وحش يعني بركب عربية السيدات عشان اتجنب القرف ده يقوم يدخل بياع يتعدى ع حرمة جسدي والناس تطلب مني اسكت ومحدش رضي يساعدني او يشهد معايا عليه والظابط هان كرامتي والتاني جي هددني..وانا مقدرتش اعمل حاجة ولا ادافع عن حقي -لما ناخد حقنا بايدينا بقى ياحكومة وندفن المتحرش ف مكانه ابقوا قولوا علينا ارهابيين"