أبويا علمنى أكون لطيف أوى مع إخواتى قدام الضيوف حتى لو لسة باطحين بعض قبلها بربع ساعة، وعلمنى أن الكدب حرام بس ده مايمنعش أن أقول إنه مش موجود لو حد عايزه وهو مش عايزه، وكان بيعاقبنى لما اشتم حد.. بس هو بيشتم عادى، وعلمنى أن النفاق عيب بس لازم نضحك في وش ناس بنشتمهم أول ما بيمشوا، وعلمنى أن اللى بيمشى ورا الناس مابينفعش.. بس في نفس الوقت لازم نعمل حساب كلام الناس في كل حاجة بنعملها، وأنى لازم أحب اللى أنا بعمله عشان عمرى ما هعمل اللى أنا بحبه! وعلمنى أن الفنانين دول ناس منحطة بس لو قابلنا حد فيهم بنقوله أنت عظيم وبنتصور معاه، علمنى أن الحب عيب وحرام بس هو فخور أنه اتجوز أمى عن حب، علمنى أكون عندى إرادة عشان أحقق اللى أنا عايزه بس هو مش قادر يبطل يشرب سجاير، علمنى أحترم النظام بس في كل مكان بيروح يتعرف على المدير عشان مانقفش طابور.. علمنى أن الظلم وحش بس حفى على وسايط كتير تشغلنى رغم أنه عارف أن فيه متقدمين أحق منى، علمنى أن مافيش راجل بيعيط.. ويرجع يقولى أنت مال قلبك حجر ليه! أي إعلان بيكون في كلمة فور فرى كفيل إنه يحولك لكائن تانى من السعادة زى الاكتئاب بالظبط لما ييجى. أكتر سؤال ممكن تتسأله الفترة دى مالك؟ وكالعادة بيكون ردك مافيش! يكون رد اللى قدامك في أغلب الأوقات طيب يا رب دايما! وييجى في بالك وقتها يا رب دايما على الحالة اللى أنا فيها دى بس ليه! ماحدش هيحس بيا أبدا كده! اكتئاب بيجيلك باكتر من طريقة الفترة دى - انعزالك عن كل الناس سواء القريبين منك أو حتى الشخصيات اللى متعود تكلم معهم كتير. - بتبعد عن أكتر حاجات بتحب تعملها، لو تحب تخرج هتلاقى نفسك مش عايز تنزل ولا حتى تتحرك من البيت. - مايبقاش في معنى للى بتعملوه مهما كانت أهميته، وحاجة تفرح الناس من جواك مش حاسس بالسعادة وتقول لنفسك مش فارقة. - ردك بيكون على قد السؤال اللى بيتسئلك! أقل كلمة شايف إنها وصلت لقدامك إنك عايش والسلام، بتكون فاكر أن اللى قدامك عمره ما هيفهمك فبقيت توفر حتى الكلمة. - إحساس أن الدنيا بقى لونها أسود حتى لو كنت بتحب اللون ده! شايفها كآبة، بتحس في الوقت ده أنك كبرت 30 سنة بدون مقدمات وفاجأة شايل هموم الدنيا كلها. - وقت بيكون ضميرك عكسك! بتعمل حاجات غلط على الأقل من وجهة نظرك، كأنك بتثبت لنفسك أنك كرهت الدنيا والحياة كلها من النسخة الورقية
